Хуссар Ирыстоны Информаци ӕмӕ мыхуыры паддзахадон комитеты пресс-центры уазӕг ӕрӕджы уыд Цхинвалы мидхъуыддӕгты управленийы Ӕнахъомты хъуыддӕгты фӕдыл хайады сӕргълӕууӕг, булкъон Гатайты Лали.
Пиротехникон ӕрмӕджытӕ – иуварс
Бӕрӕг куыд у, уымӕ гӕсгӕ Ног азы агъоммӕ арӕх æрцӕуынц пиротехникон фӕрӕзтӕй пайда кӕныны цаутӕ. Уыдонӕй пайда кӕнын тӕссаг кӕй у, уымӕ гӕсгӕ хайады инспектортӕ республикӕйы скъоладзаутимӕ ауадзынц профилактикон беседӕтӕ.
Пресс-конференцийы рӕстӕджы Гатайты чызг куыд фехъусын кодта, уымӕ гӕсгӕ ацы азы райдианы, пиротехникон фӕрӕзтӕй арӕхстгай пайда кӕй нӕ цыд, уый фӕстиуӕгӕн дыууӕ ӕнахъомы ӕнӕниздзинад хъыгдард баййӕфта. Ӕмӕ дарддӕр ахӕм цаутӕ цӕмӕй мауал ӕрцӕуой, уый тыххӕй ахуырадон уагдӕтты рӕзгӕ фӕлтӕримӕ хъомыладон куыст фӕкӕнынц инспектортӕ, цӕмӕй ма амал ӕмӕ пайда кӕной уыцы тӕссаг пиротехникон фӕрӕзтӕй.
Ацы хъуыддагмӕ стыр хъусдард здӕхт цӕуы фадыгон инспекторты рдыгӕй дӕр – уыдон базаргæнджытæй байсынц ахæм ӕрмӕджытӕ, уымӕн ӕмӕ сертификаци нӕ вӕййынц ӕмӕ пайдагӕнгӕйӕ сты тӕссаг.
Ӕнахъомты хъуыддӕгты фӕдыл хайады сӕргълӕууӕг Гатайты Лалийы ныхӕстӕм гӕсгӕ ниридӕгӕн байстӕуыд дыууӕ минӕй фылдӕр пиротехникон ӕрмӕджы.
Ног азы агъоммӕ нӕ горӕты «Чысыл базары» цы ногазон армукъа ӕрбайгом вӕййы, уым уӕйгӕнӕн бынæттæ ӕппынӕдзух сгӕрст цӕуынц, цӕмӕй дзы бынат ма уа ахӕм товар уӕй кӕнынӕн. Кӕй зӕгъын ӕй хъӕуы, амалиуӕггӕнджытӕ дӕр ӕрцӕуынц фӕдзӕхст, цӕмӕй ма ласой ӕмӕ реализаци кӕной пиротехникӕ. Уымӕн ӕмӕ закъонмӕ гӕсгӕ бар нӕй йӕ уӕй кӕнынӕн.
Цы пиротехникӕ ист ӕрцӕуы, уый дарддӕр цы бавæййы? Ахæм фарстæн хайады сӕргълӕууӕг дзуапп радта, зӕгъгӕ, куынӕг ӕрцӕуы ӕмӕ йӕ чи парахат кӕны, ууыл та конд ӕрцӕуы административон хъуыддаг, æмæ ӕрвыст ӕрцӕуы тӕр-хондонмӕ.
Хайады куыст вазыгджын ӕмӕ бӕрнон у
Гатайты Лалийы ныхӕстӕм гӕсгӕ æнахъомты хъуыддӕгты фӕдыл хайады куыст вазыгджын ӕмӕ бӕрнон у. Мидхъуыддӕгты министрады системӕйы ацы службӕйӕн ис ахсджиаг бынат. Сӕ куыст, сӕйраджыдӕр, баст у нӕ рӕзгӕ фӕлтӕримӕ – нӕ фидӕнимӕ. Уымӕ гӕсгӕ уый ӕрсидт рӕзгӕ ныййарджытӕм, цӕмӕй цырддзастдӕр уой сӕ сывӕллӕттӕм, уæлдайдæр уымӕн ӕмӕ ныртӕккӕ рӕстӕг хуымӕтӕг нӕу.
Ӕнахъом фӕсивӕд фыдракӕнддзинадмӕ сӕ хъус къаддӕр дарынц
Ӕнахъомты хъуыддӕгты фӕдыл инспекцийы къухдариуӕггӕнӕджы ныхӕстӕм гӕсгӕ фӕстаг 20 азы дӕргъы ӕнахъомты хайадистӕй къаддӕр кӕны уголовон фыдракӕндты нымӕц, фӕлӕ уый афтӕ нӕ нысан кӕны, ӕмӕ уавӕр бынтон хорз у.
«Нӕ фӕсивӕд бирӕ хатт сӕхи бынтон хорз нӕ фӕдарынц. Уымӕн бирӕ хъуыддӕгтӕ сты ахъазгӕнӕг. Бирӕ ныййарджытӕ сӕ ӕвӕджиаг хӕстӕ ӕвӕрынц скъолайыл, кӕнӕ ӕндӕр искӕуыл æмæ сывӕллон баззайы ӕнӕхъусдардӕй.
Уымӕ гӕсгӕ хайадӕн ис, цӕуыл ӕмӕ куыд кусой, уый. Нӕ рӕзгӕ фӕлтӕры моралон-хӕрзӕгъдауон хъомылад мӕн тынг тыхсын кӕны. Уымӕн ӕмӕ йын ахсджиаг нысаниуӕг ис нӕ сывӕллӕтты раст хъомыл кӕныны хъуыддаджы», – банысан кодта уый.
Хъуамӕ архайӕм ӕгъдауджын фӕсивӕд хъомыл кӕныныл
Гатайты Лали ма дзырдта сӕ ӕрвылбонон куысты цы проблемӕтыл æмбæлынц, уыдоныл – интернет куыд ӕндавы рӕзгӕ фӕлтӕрыл ӕмӕ йӕ уацары куыд хауынц; ӕппынӕдзух телефонтӕ ӕмӕ ӕндӕр гаджеттӕ сӕ къухӕй кӕй нӕ хауынц. Уымӕ гӕсгӕ ноджы фылдӕр бӕрндзинад ис ныййарджытыл, уыдон хъуамӕ сӕ хъус дарой, сӕ сывӕллӕттӕ кӕм сты ӕмӕ цы архайынц, уыцы хъуыддагмӕ. Хисдӕр кълӕсты лӕппутӕй та бирæтæ пайда кӕнынц электронон сигареттӕй. Уыдон се скондмӕ гӕсгӕ сты хъӕстӕ ӕмӕ зиан хӕссынц ӕвзонг ӕмӕ рӕзгӕ фӕлтӕрӕн. Мах та хъӕуы нӕ ӕвзонг ӕмӕ рӕзгӕ республикӕйӕн ӕнӕниз, зондджын, фӕзминаг ӕмӕ ӕгъдауджын кӕсдӕртӕ хъомыл кӕнын.
Уавӕрӕй пайдагӕнгӕйӕ пресс-центры уазӕг нӕ республикӕйы цӕрджытӕн арфӕ ракодта ӕрбалӕугӕ азы цытӕн.
КЪӔБУЛТЫ Маринæ
