14 декабры Уӕрӕсейы Федерацийы президент Владимир Путин комкоммӕ эфиры дзуапп кодта журналистты ӕмӕ хуымӕтӕг ӕмбӕстӕгты фарстатӕн. Фарстатӕ уыдысты алыгъуызӕттӕ ӕмӕ ӕдӕппӕт сӕ нымӕц ахызт 2 милуан ӕмӕ ӕрдӕгӕй. Путин цыппар сахаты дӕргъы сдзуапп кодта 80 фарстайӕ фылдӕрæн.
Райдианы УФ-йы президент банысан кодта, зӕгъгӕ Уӕрӕсе хӕдбар куы нӕ уа, уӕд нӕ уӕвы-над кӕндзӕн, ӕмӕ уымӕ гӕсгӕ нӕ сӕйраг хӕс у нӕ суверенитет сфидар кӕнын.
«Нӕ экономикӕ фӕстаг азты афтӕ стыхджын кодтам, ӕмӕ ныр нӕ бон бацис бирӕнымӕц санкциты ныхмӕ фӕлӕууын. Ацы аз нӕ экономикӕ райрӕзт 3,5% бӕрц ӕмӕ ацы тенденци ноджы хуыздӕрырдӕм кӕны. Ӕгуыст адӕмы нымӕц нӕм ахӕм чысыл у ӕмӕ Уӕрӕсейы историйы нырма афтӕ никуы уыд. Нӕ паддзахадӕн абоны бон нӕй хӕстӕ, цӕрджыты ӕфтиӕгтӕ фылдӕр кӕнынц».
Украинӕйы фӕдыл ӕм бирӕ фарстатӕ лæвæрдтой, алкӕй дӕр цымыдис кӕны Путины хъуыды Сӕрмагонд ӕфсӕддон операцийы тыххӕй.
«Украинӕйы сабырдзинад ралӕудзӕн, уӕрӕсейаг ӕфсӕддонтӕ сӕ разы лӕууӕг хӕстӕ куы сӕххӕст кӕной, уӕд. Цы контрабырсты кой кодтой, уый сын бынтондӕр нӕ рауад. Æрмæст фæстаг мæйты дæргъы уыдон фесӕфтой дзы 747 танчъы ӕмӕ 2 минӕй фылдӕр та згъӕрварс хӕдтулæджы. Ныгуылӕн бӕстӕтӕ сын цыдӕриддӕр баныфс ӕвӕрдтой ӕхсӕнгарзӕй, уыдон сын уӕлдайджынтӕй радтой. Фӕлӕ сын сӕ фылдӕр хай скуынӕг кодтам, ома демилитаризаци цӕуы активонӕй. Уӕрӕсейы мобилизацийы рӕстӕджы кӕмӕ ӕрсидтыстæм гарзджын тыхтӕм, уыдон сӕхи ӕвдисынц иттӕг хорз – 14 дзы райстой Уӕрӕсейы хъайтары кадджын нӕмттӕ. Ӕдӕппӕт та контрактон службӕ хӕссынмӕ бацыдысты 486 мин адӕймаджы. Уымӕ гӕсгӕ, нӕ гарзджын тыхтӕн ис фаг фӕрӕзтӕ, цӕмӕй знагӕн аккаг ныхкъуырд радтой ӕмӕ нӕ ног мобилизаци саразыны сӕр нӕ хъӕуы».
Путин куыд банысан кодта, афтӕмӕй чидӕриддӕр хайад исы Сӕрмагонд ӕфсӕддон операцийы, уыдонӕн иууылдӕр хъуамӕ уа иугъуызон бартӕ, иугъуызон социалон пакет, льготӕтӕ. УФ-йы хицауад алцыдӕр аразы, цӕмӕй рохуаты мачи аззайа ӕмӕ йӕ рай-гуырӕн бӕстӕ чи хъахъхъӕны, уыдон ӕмбӕлон ӕххуыс райсой рӕхджы.
Бафарстой ма йӕ горӕт Одессайӕ дӕр ӕмӕ Путин загъта, зӕгъгӕ, Одесса рагӕй фӕстӕмӕ нымад у уырыссаг горӕтыл ӕмӕ уыцы хъуыддаг фӕивын никӕй бон бауыдзӕн. Евроцӕдисимӕ дарддӕры ахастыты тыххӕй Путин загъта, ома Уӕрӕсейы аххосӕй нӕ фехӕлдысты ӕмахастытӕ ӕмӕ сӕ сӕндидзын кӕнын дӕр Уӕрӕсейы бон нӕу, Евроцӕдисы разамынадӕй аразгӕ у.
«Венгрийы ӕмӕ Словакийы сӕргълӕуджыты Орбаны ӕмӕ Фицойы хонынц Уӕрӕсейы фарс-хӕцджытӕ. Фӕлӕ уый раст нӕу – уыдон хъахъхъӕнынц сӕ националон интерестӕ. АИШ-ы коммӕ чи нӕ кӕсы, уыдоны та алы амӕлттӕй дӕлдзиныг кӕнынц, цӕмӕй сӕ сӕхицӕн коммӕгӕстӕ саразой, кӕнӕ сӕ фӕсурой».
Путины хъуыдымӕ гӕсгӕ фронты уавӕр тынг тӕссаг у ӕмӕ бахатыд телеканалты къухдариуӕггӕнджытӕм, цӕмӕй сылгоймаг-корреспондентты ма ‘рвитой ахӕм бынӕттӕм.
Уӕрӕсемӕ цы ног территоритӕ ӕрбаиу, уыдоны цардуагон уавӕртӕ сты мӕгуырау. 30 азы дӕргъы уыдысты рохуаты сӕ разамынадӕй ӕмӕ алцыдӕр хъӕуы ногӕй ӕндидзын кӕнын, ногӕй аразын. Путин куыд фехъусын кодта, афтӕмӕй ӕрвылаз дӕр ног регионтӕм ӕрвитдзысты финанстӕ иу триллион сомӕй фылдӕр, цӕмӕй тагъддӕр сӕ къахыл слӕууой ӕмӕ иннӕ регионты баййафой.
Путин зӕрдыл ӕрлӕууын кодта Украинӕйы цауты фӕдыл Уӕрӕсейы кæй критикӕ кӕнынц сабырцӕрӕг адӕмы цӕгъдыны хъуыддаджы, кӕд ӕмӕ не фсӕддонтӕ алцыдӕр аразынц бынӕттон цӕрджыты ӕдасдзинадӕн, уӕддӕр. «Бакӕсут ма Газӕйы хӕстон цаутӕм ӕмӕ сӕ абарут не фсӕддонты архайдимӕ Украинӕйы. Кӕрӕдзийӕ цӕхгӕр хицӕн кӕнынц, нӕй сын абарӕн».
Путин раарфæ кодта ӕмбӕстӕгтӕн се ‘ххуысы тыххӕй фронтӕн. Ныридӕгӕн 10 миллиард сомӕй фылдӕр уыдон ӕрӕмбырд кодтой хӕстонтӕн ӕмӕ дарддӕр дӕр алыгъуызон ӕххуыс ӕмбырд кӕнынц Уӕрӕсейы алы къуымты ӕмӕ ма фӕсарӕнты дӕр.
Нӕ республикӕйы дӕр актуалон у ӕйчыты фӕзынаргъ. Путин банысан кодта, зӕгъгӕ проблемӕимӕ зонгӕ у ӕмӕ ввахс рӕстӕджы скъуыддзаг ӕрцӕудзӕн. «Ам бӕрнон кусджытӕ рӕстӕгыл нӕ фӕцарӕхстысты ӕмӕ проблемӕ скарз ис. Фӕлӕ ныр ист цӕуынц ӕмбӕлон мадзӕлттӕ. Бадзырдтам цалдӕр фӕсарӕйнаг бӕстӕимӕ ӕмӕ нӕм рӕстӕгмӕ уыдон ласдзысты ӕйчытӕ. Стӕй уӕдмӕ нӕхимӕ дӕр байгом уыдзысты ног кондадтӕ ӕмӕ нӕм ацы товары дефицит нал уыдзӕн».
Мигрантты тыххӕй та Путин загъта, зӕгъгӕ нӕм фӕсарӕнтӕй чи ӕрбацӕуы, уыдон хъуамӕ ӕххӕст кӕной УФ-йы закъӕттӕ ӕмӕ традицитӕ. Ныридӕгӕн Уӕрӕсейы сӕ нымӕц ахызт 10 милуанӕй ӕмӕ сӕм хъӕуы уӕлдай хъусдард здахын, аразын сын хъӕуы ӕмбӕлон уавӕртӕ цӕрынӕн ӕмӕ кусынӕн.
Ног азы къӕсӕрыл стӕм ӕмӕ Путинмӕ бахатыдсты раарфӕ кӕнынмӕ ӕмбӕстӕгтӕн. «Иууыл егъаудӕр лӕвар царды сты сывӕллӕттӕ. Уыдон Хуыцауӕй ратгӕ сты ӕмӕ дзы хайджын ут».
P.S. Ацы хатт пресс-конференцийы рæстæджы 90 проценты ныхас цыдис мидхъуыддæгты тыххæй. Æмæ 10% та дунеон политикæ, æхсæнадæмон хъуыддæгтыл.
ДЖИОТЫ Алыксандр
