Афæдзы размæ Цхинвалы районы Къос-тайыхъӕуы астæуккаг скъолайы бæстыхайы байгом сывӕллӕтты рӕвдауӕндон. Ацы уагдоны сæргълæууæджы хӕстӕ дӕр ӕххӕст кӕны скъолайы директор Тыбылты Алекси. Уый куыд радзырдта, афтӕмӕй коллективы алы кусӕг дӕр йӕ хӕстӕ ӕххӕст кӕнынмӕ кӕсы бӕрнон цӕстӕй ӕмӕ сӕ ӕххӕст дӕр кӕнынц зӕрдӕйы фӕндиаг, нӕ рӕзинаг кӕстӕртӕ сӕ рӕвдыд ӕмӕ узӕлдӕй сты хайджын. Рӕвдауӕндоны сабиты нымӕц ныртӕккӕ у 24, фӕлӕ сӕ ныфс ис, рӕстӕджы цыдимӕ иумӕ, уыдон нымӕц кӕй фӕфылдӕр уыдзӕн. Райдианы дзы уыд иу къорд, фӕлӕ уый ӕххӕстӕй дзуапп нӕ лæвæрдта куысты рӕзгӕ домӕнтӕн ӕмӕ уыцы хъуыддаг фӕстӕдӕр бахынцыд ӕрцыд. Ныртӕккӕ ам сты кӕстӕр ӕмӕ хистӕр къордтӕ. Рӕвдауӕндоны сывæллæттæн хӕрын кӕнынц бон ӕртӕ хатты хӕрзгъӕд хӕринӕгтӕ. Уыцы хъуыддаджы раппӕлыны аккаг у хӕрина-гаразӕг Бестауты Рая ӕмӕ райгонд сты сабитӕ ӕмӕ сӕ ныййарджытӕ дӕр.
Рӕвдауӕндоны алы къорды дӕр ис фӕйнӕ дыууӕ хъомылгӕнӕджы, уыдон та сты Ходты Светланӕ, Хуыбиаты Регинӕ, Хуыбецты Светланӕ ӕмӕ Тъехты Олеся, дыджызӕйы хӕстӕ ӕххӕст кӕнынц Туаты Заринӕ ӕмӕ Хъотайты Анжелӕ, медицинон хотæй дзы кусынц Лохты Альбинӕ, Цӕриаты Алинӕ ӕмӕ Хуыбиаты Заринӕ. Хъомылгӕнджытӕ сӕ куыст ӕххӕст кӕнынц, Битарты Зоя рӕвдауӕндӕттӕн цы ахуырадон программӕ, «Малусӕг», зӕгъгӕ, бацӕттӕ кодта, уымӕ гæсгæ. Коллектив бузныгӕй баззад, ӕрӕджы сӕм нӕ республикӕйы Президент кӕй фӕуазӕг ӕмӕ сын сӕ зӕрдӕтӕ кӕй барухс кодта алыгъуызон хъазӕнтӕй, уый тыххæй. Дарддӕр бахынцинаг уыдзӕн, бæстыхайы алыварс территори схæрзарæзт кæнын дæр, ӕмӕ хъарм бонты сывæллæттæ сӕ рӕстӕг кӕм æрвитой ӕмӕ сæхи кæм ирхӕфсой, ахӕм хъазӕн бынӕттӕ сын нæй.
Хуыбиаты Никъала
Comments are closed, but trackbacks and pingbacks are open.