22 ноябры Хуссар Ирыстоны паддзахадон университеты ахуыргæнджытæ æмæ студентон фæсивæд ректор Тедеты Вадимы сæргълæудæй арфæтæ кодтой зынгæ ирон поэт, прозаик, драматург, тæлмацгæнæг, литературæйы историйы иртасæг, æхсæнадон архайæг, Ирыстоны Фысджыты цæдисы æмсæрдар, Хетæгкаты Къостайы номыл премийы лауреат Хъазиты Резойы фырт Мелитонæн йæ 75 азы юбилейы цытæн. Йæ юбилейы сæрты Мелитон акаст 10-æм ноябры æмæ уæдæй фæстæмæ арфæтæ исы æндæр æмæ æндæр мадзæлтты, бæрнон æмæ хуымæтæг адæймæгтæй. Сæрмагондæй йæм хæдзармæ бацыд æмæ йын уым ирон æгъдаумæ гæсгæ раарфæ кодта Республикæ Хуссар Ирыстоны Президент Гаглойты Алан дæр.
Бацæуæн ныхасæй изæр байгом кодта ректор Тедеты Вадим. Сæйраджыдæр, уый банысан кодта фыссæджы стыр курдиат æмæ йе стыр лæггæдтæ ирон ахуырад æмæ культурæйы. Тедеты Вадим ма йæ раныхасы бузныг загъта ацы арфæйаг æмæ цины бæрæгбон чи бацæттæ кодта, æппæт уыдонæн. «Махæн ахсджиаг у, цæмæй Ирыстоны кадджын æмæ зынгæ адæймæгтæн æгъдау кæнæм æмæ сын куыд æмбæлы, афтæ лæггад кæнæм. Мелитоны цы бон базыдтон, уыцы бонæй абонмæ нæ ахастытæ сты хъармæй-хъармдæр æмæ уый мæнæн у стыр кады нысан æмæ æнтыст, ахæм хистæры фарсмæ кæй лæууын. Фæнды мæ бузныг зæгъын нæ Президент Гаглойты Аланæн нæ цытджын юбилярмæ кæй фæуазæг ис æмæ йын кæй сæгъдау кодта, уый тыххæй. Уым дæр бирæ хъарм ныхæстæ загъдгонд æрцыд юбилярæн æмæ уый та дзурæг у, Мелитон царды цы фæд уадзы æмæ сфæлдыстады цы стыр мæсыг самадта, ууыл. Хъазиты Мелитонæн абоны онг дæр цы бантыст саразын æмæ сфæлдисын, уыдон дæр фаг сты йæ кады номæн. Мелитонæн йæ алы чиныджы рауагъд дæр Ирыстоны свæййы стыр цау. Фæнды мæ, цæмæй нын Мелитон уа æнæниз æмæ æнæмаст, кæддæриддæр нæ буц кæна йæ нуарджын æмæ мидисджын сфæлдыстадæй. Мах та кæддæриддæр уыдзыстæм йæ фарсмæ æмæ йын афтæмæй æххуыс кæндзыстæм», – банысан кодта ректор.
Хъазиты Мелитонæн йæ царды бирæ кæй бантыст, уый фæдыл та цымыдисон доклад «Хъазиты Мелитоны цард æмæ сфæлдыстадон фæндæгтæ» бакаст университеты ирон литературæйы хистæр ахуыргæнæг Плиты Серго. Уый ма йæ доклады фæстæ адæмы рæгъмæ рахаста юбилярыл цы æмдзæвгæ ныффыста, уый æмæ йæ аивæй бакаст. Хъазиты Мелитоныл ирон фысджытæ цы æмдзæвгæтæ ныффыстой, уыдон та радгай кастысты университеты психологи æмæ журналистикæйы дæсныйæдты студенттæ.
Зынгæ ирон фыссæджы тыххæй юбилейон изæры хайадисджытæ сæрыстырæй сæ хуыздæр арфæтæ кодтой Хъазиты Мелитонæн.
ЦХУЫРБАТЫ Ларисæ
