Бæрæг куыд у, уымæ гæсгæ гуырдзиаг фарс дунеон фæдагуырдмæ радта Хуссар Ирыстоны дыууæ æмбæстаджы: Гуырцъыты Дауыт æмæ Тæбойты Аликы. Ацы æмбæстæгты Гуырдзыстон аххосджын кæны Арчил Тъатъунашвилийы амарыны хъуыддаджы. Уый у развæлгъау ахъуыдыгонд, æнæсбæлвырдгонд азымæвæрд нæ дыууæ æмбæстагыл. Гуырдзиаг фарс та радон хатт равдыста йæ деструктивон позици, Интерполы хаххыл хуссарирыстойнаг æмбæстæгты дунеон фæдагуырдмæ кæй радта, уымæй.
Знон, Инциденттæ ма æруадзын æмæ сæм хъусдард здахыны фæдыл механизмты фæлгæтты куысты райдианы дæр хуссарирыстойнаг фарс боны фæткы фарстытæм æркæсыны фæстæ фæндон бахаста, цæмæй уырдыгæй ист æрцæуой Тъатъунашвилийы æмæ Башарулийы тыххæй фарстытæ. Уымæн æмæ уыдоныл лæмбынæг дзырд цыд уымæй размæ фембæлдтыты рæстæджы. Ууыл, кæй зæгъын æй хъæуы, гуырдзиаг делегаци не сразы. Протесты нысанæн хуссарирыстойнаг делегаци рацыд, Механизмты куыст цы бынаты уагъд цыд, уырдыгæй.
Хуссар Ирыстоны делегацийы сæргълæууæг, Фæсконфликтон бæстонкæнынады фæдыл Президенты æххæстбарджын минæвары хæдивæг Коцты Егор нын куыд радзырдта, афтæмæй фæндон бахастой, цæмæй Механизмты фæлгæтты куыст хаст æрцæуа фæстæдæрмæ. Уымæн æмæ ныртæккæ Гуырдзыстоны уагъд цæуы президентон æвзæрстытæм цæттæгæнæн компани æмæ дзы ис уæззау политикон уавæр. Фæлæ, хъыгагæн, гуырдзиаг фарс æмæ фæсарæйнаг организациты минæвæрттæй бæрæг дзуапп нæ райстæуыд.
Коцты Егоры ныхæстæм гæсгæ, Механизмты куысты форматæн Хуссар Ирыстоны ахсджиаг нысаниуæг ис, æмæ уый хынцгæйæ, ацы форматы куыст дарддæр хъуамæ цæуа. Ныфс бавæрдта, гуырдзиаг фарс нырæй фæстæмæ конструктивонæй, ахъуыдыгондæй кæй бацархайдзæн боны фæтк саразыны фарстыл.
Уымæ гæсгæ хуссарирыстойнаг делегацийы ахæм къахдзæфы фæдыл Коцты фырт афтæ радзырдта, зæгъгæ, мах цы протест равдыстам, уый нæ нысан кæны, æмæ ацы форматы куыстыл разы не стæм, ацы форматы куысты фæсарæйнаг организациты минæвæрттæ хайад кæй исынц.
«Фæндон бахастам, æрмæстдæр, ацы фембæлд фæстæдæрмæ ахæссын, боны фæтк рараст кæнын æмæ радон фембæлд 8 ноябры ауадзыны тыххæй», – дзырдта Егор.
Механизмты фæлгæтты куысты хæдразмæ уагъд фæцæуы техникон фембæлд йæ хайадис-джытимæ. Уыцы фембæлды рæстæджы, Егоры ныхæстæм гæсгæ, хуссарирыстойнаг фарс кæд архайдта боны фæткыл бакусын, уæддæр боны фæтк хаст не ‘рцыд уынаффæмæ. Дзырд цыд конкретон фарстайыл Гуырдзыстон æмæ Хуссар Ирыстоны паддзахадон арæнтыл æдасдзинадыл æруынаффæ кæнын. Фæлæ гуырдзиаг фарс нæ равдыста æмбаргæ ахаст. Уый нæ, фæлæ ноджы фæкарздæр кодтой уавæр – бахастой йæм Давид Башарули æмæ Арчил Тъатъунашвилийы фарст.
Хуссар Ирыстоны делегацийы ныфс уыд Механизмты фæлгæтты куыст ауадзынæй. Уымæн æмæ хуссарирыстойнаг фарс фæстаг раунды бафæдзæхста гуырдзиаг фарсы, зæгъгæ, Башарулийы фарст ма боны фæткы куы уа, уæд форматы куысты хайад нæ райсдзысты.
Коцты Егоры ныхæстæм гæсгæ, арæнтæм хæстæг Механизмты фæлгæтты цы фембæлдтытæ уагъд цæуы, уый руаджы фадат ис алы сæвзæргæ фарстытыл дæр уынаффæ кæнынæн, уымæй йæхи нæ иуварс кæны хуссарирыстойнаг фарс, фæлæ 89-æм раунды, уæлдæр ранымад аххосæгтæм гæсгæ, хайад нал райста.
Къæбулты Маринæ
Comments are closed, but trackbacks and pingbacks are open.