Гуырдзиаг-ирон паддзахадон арӕнтӕм хӕстӕг Эргнеты хъӕуы цыппӕрӕмы уагъд ӕрцыд Инциденттӕ ма ӕруадзын ӕмӕ сӕм хъусдард здахыны фӕдыл механизмты радон фембӕлд. Хуссар Ирыстоны меха-низмты формат нымад у ахæм фæзуатыл, цыран дунеон организациты минæвæртты хайадистæй Хуссар Ирыстон æмæ Гуырдзыстоны минæвæрттæн фадат ис сæвзæргæ инциденттæ, паддзахадон арæнтыл уавæр æмæ æндæр æрцæугæ цаутыл æмæ сæйраг та – æдасдзинады фарстыл комкоммæ æруынаффæ кæнынæн.
Фембӕлды фӕстиуджыты тыххӕй Хуссар Ирыстонæй механизмты форматы хуссарирыстойнаг делегацийы сæргълæууæг, Фæсконфликтон фарстатæ бæстон кæныны фæдыл Президенты æххæстбарджын минæвары хæдивæг Коцты Егор, фембæлдæн хатдзæгтæ аразгæйæ, информацион фæрæзтæн радзырдта, зӕгъгӕ, механизмты фæлгæтты куыст абоны онг уыд иууыл сабырдӕр, ома, фӕстаг фембӕлдӕй фæстæмæ ницы фӕткхалӕн цаутӕ ӕрцыд хынцыд.
Паддзахадон арӕнтӕ халыны тыххӕй хуссарирыстойнаг фарс нӕ бахынцыдта фӕткхалæн цаутæ, нӕдӕр гуырдзиаг фарсы ‘рдыгӕй хынцыд ӕрцыдысты фӕткхалджытӕ. Уӕлдӕфон тыгъдады ӕнӕпилотон тӕхӕн аппараттӕ фехалынимæ баст инцидентты нымӕц дӕр уыд хӕрзцъус. Гуырдзыстоны ӕдасдзинады органты, полициӕгты кӕнӕ ӕндӕр гарзджын минӕвӕртты руаджы паддзахадон арӕнтӕ фехалыны цаутæ дæр не ‘рцыд хынцыд.
Хуссар Ирыстонӕй делегацийы сӕргълӕууӕг банысан кодта, ныфс сӕ кӕй ис, ацы тенденци кӕй дарддӕр кӕндзӕн ӕмӕ паддзахадон арӕнтӕм хӕстӕг фӕткхалӕн цаутӕ кæй къаддӕр кӕндзысты. Йӕ ныхӕстӕм гӕсгӕ, ацы уавӕрыл, гӕнӕн ис, бандава ӕрдзон уавӕр – зымӕджы мӕйты стыр митуард, аннӕмӕй та гуырдзиаг фарс активон куыст кӕны йе ‘мбӕстӕгтимӕ. Гуырдзыстоны ӕмбӕстӕгтӕ ӕмбарынц уый, ӕмӕ паддзахадон арӕнтӕ фехалыны фӕстиуӕгӕн Хуссар Ирыстоны закъондӕттынады архайдмӕ гӕсгӕ баййафынц ивар, науӕд цалдӕр хатты чи фехалы арӕнты фӕтк, уыдоныл та конд ӕрцӕуы уголовон хъуыддаг. Уый зӕрдыл даргӕйӕ, архайынц, цӕмӕй мауал халой арæнты тыххæй сфидаргонд фӕтк.
Механизмты фембӕлдты ахсджиаг дæр фарстытӕй иу
Кӕй зӕгъын ӕй хъӕуы, механизмты фæлгæтты ацы фембӕлды рӕстӕджы дæр хуссарирыстойнаг фарс раразмӕ кодта, цалдӕр азы размӕ Хуссар Ирыстоны территорийыл цы гуырдзиаг полициӕгты пост ӕвӕрд ӕрцыд, уый фӕдыл фарст.
Хуссар Ирыстоны фарс ӕрӕджы ацы районы цы инцидент ӕрцыд, уый фӕдыл равдысты йӕ æнæразыдзинад – гуырдзиаг фарс уыцы постмӕ продукттӕ баласыны тыххӕй спайда кодта бронетранспортерӕй.
«Уыцы цауы фӕдыл мах райстам лӕмбынӕг дзуапп – фæндаджы уавæрты аххосмæ гæсгæ ахæм транспортæй пайда æрцыд. Уымӕй дӕр, бронетранспортерӕй ист ӕрцыд хӕцӕнгарз ӕмӕ дзы спайдачындӕуыд, куыд æвзæр фæндæгтыл цæуæн машинæ, афтæ”.
Хуссар Ирыстоны территорийӕ ӕнӕзакъонон пост аиуварс кӕныны фарсты фӕдыл абоны онг дӕр гуырдзиаг фарс нӕ аивта йӕ хъуыды. Фӕлӕ уӕддӕр ӕмӕ уӕддӕр хуссарирыстойнаг фарс дарддӕр дӕр активонӕй рӕгъмӕ хӕсдзӕн ацы проблемӕ, цӕмӕй, боны фӕстагмӕ, Гуырдзыстоны къухдариуӕгад райса ӕмбӕлон уынаффӕ.
Евроцӕдисы миссийӕн – ног сӕргълӕууӕг
Механизмты фӕлгӕтты радон фембӕлды хайад райста, Гуырдзыстоны Евроцӕдисы миссийæн цы ног сӕргълӕууӕг ис, уый – Димитриос Карабалис. Ацы ног адӕймаг исты ивындзинӕдтӕ бахӕсдзӕн механизмты куыстмæ, уый нырма бӕрӕг нӕу.
Коцты Егоры ныхӕстӕм гӕсгӕ, хъуыддӕгтӕ ӕмӕ уавӕримӕ куы базонгӕ уа, уӕд, гӕнӕн ис, исты фӕива хорзæрдæм.
«Абоны фембӕлдӕй ӕз куыд бамбӕрстон, уымӕ гӕсгӕ конструктивон бадзырдтыты тенденци дарддӕр кӕндзӕн. Ныфс мӕ ис, ӕмӕ йӕ сӕрдариуӕгадӕй фӕрсты ӕхсӕн, нӕ делегаци ӕмӕ Евроцӕдис ӕмӕ ЕÆÆО-йы сомодератроты ӕхсӕн серьезон негативон ивындзинӕдтӕ хынцыд не ‘рцӕудзӕн», – банысан кодта уый.
Информацион фæрæзты минæвæрттæ информаци хъуамæ æмбырд кæной бынаты
Ацы фарстыл фембæлды рæстæджы кæд уынаффæ нæ цыд, уæддæр фембæлды фæстæ хус-сарирыстойнаг делегацийы къухдариуæггæнæг цымыдис кодта æмæ йæ радта хъусдарджыты миссийы минæвармæ. Лæмбынæг дзуапп нæма райста йæ фарстæн, фæлæ уæддæр рæгъмæ хаст цæудзæн ацы фарст. Уымæн æмæ стыр нысаниуæг ис уымæн, цæмæй гуырдзиаг фарсмæ дæр мах информаци хæццæ кæна.
Коцты Егоры ныхæстæм гæсгæ, дзырд цыд механизмты куысты хайадисджыты скондыл дæр. Бæрæг куыд у, уымæ гæсгæ коронавирусы пандемийы рапарахаты рæстæджы йæ хайадисджыты сконд фæкъаддæр. Æмæ цæмæй раздæры скондмæ раздæхой, уый тыххæй рæгъмæ хаст æрцыд ацы фарст, уымæн æмæ æххуысгæнджытæ, науæд æндæр службæты минæвæрттæ хъæуынц уынаффæйы рæстæджы.
Механизмты хайадисджытæ куыд бадзырдтой, уымæ гæсгæ йæ фæлгæтты радон раунд уагъд æрцæудзæн ацы аз 25 апрелы.
КЪÆБУЛТЫ Маринæ
Comments are closed, but trackbacks and pingbacks are open.