2008 азы августы æртæ боны Хуссар Ирыстоны адæмæн баззадысты хъыгаг мысинагæй, уыцы бонты фыдæвзарæнтæ абон дæр мысæм æрхæндæгæй. Гуырдзыстоны гæрзифтонг æфсæдтæ бафæлвæрдтой Хуссар Ирыстонæй «сыгъдæг быдыр» аразынмæ. Фæлæ фыд лæг æмæ фыд дугæн бирæ цæрæнбон нæй рæстуд æмæ сабыр цардуарзаг адæмы ныхмæ. Бирæ уæззау рыст, Ирыстоны сæрыстыр хъæбулты туг æмæ пырх хæдзарад нын ахаста августы радон æнæадæймагадон геноцид.
Хуссар Ирыстоны Паддзахадон-нысаниуӕгджын мадзӕлттӕ бацӕттӕ кӕнын ӕмӕ уадзыны фӕдыл республикон къамис бацӕттӕ кодта 2008 азы августы мӕйы Хуссар Ирыстоны ныхмӕ гуырдзиаг агрессийыл 15 азы сӕххӕсты сæраппонд мадзӕлтты план.
Мысӕн мадзæлтты фæлгæтты бæстæйы информацион фæрæзтæ 1-8 августмæ мыхуыр кæндзысты æмæ æвдисдзысты 08.08.08 августы хæсты тыххæй къамтæ, видеоæрмæджытæ æмæ кинонывтæ.
7-æм августы Хуссар Ирыстоны Национ музейы боны 16 сахатыл байгом уыдзӕн хæсты ӕмӕ уый фӕстӕ азты цауты фæдыл РХИ-йы нывгæнджыты куыстыты равдыст «08.08.08. – 08.08.23». Фоторавдыст архайдзӕн 7 ӕмӕ 8 августы.
Изӕры 18.00 сахатыл Хетӕгкаты Къостайы номыл Паддзахадон драмон театры ӕвдыст цӕудзӕн 1920 азы ирӕтты геноциды фӕдыл спектакль «Фӕстаг ӕвдисӕн».
2008 азы 8 августы хӕстон цаутæ мысгæйæ, 7-æм августы мемориалон комплекс «Хуссар Ирыстоны Фыдыбæстæ хъахъхъæнджытӕн»-ы территорийыл изæры 22.00 сахатыл уагъд æрцæудзæн цытджын – фыдохы церемони. Уым хайад райсдзысты Республикæйы къухдариуæгад, министрадтæ уагдæтты коллективтæ ӕмӕ ӕхсӕнады минӕвӕрттӕ. Ныхасы рацæудзысты бӕстӕйы, æхсæнады æмæ интеллигенцийы минæвæрттæ. Уым ма хæсты амæттæгты рухс нæмттæ мысынæн æвæрд æрцæудзæн дидинджытæ дæр. Митинджы рæстæджы ирон адæм ноджыдæр дунеон æмæхсæнад æмæ гуырдзиаг фашизмы фарс чи уыд, уыдон зæрдыл æрлæууын кæндзысты, цы фыдракæндон архайд кодта Гуырдзыстон Хуссар Ирыстоны ныхмæ, æмæ уый фæстиуæгæн сабырцæрæг æмæ æнæаххос цæрджытæ куыд мардысты. Алы ныхасгæнæг дæр хъуамæ сидт сараза, цæмæй фашизм мауал уæвынад кæна дунейыл, дунейы тыгъдады уа сабырад æмæ фидыдад.
8-æм августы райсомы 9 сахатæй фæстæмæ нæ горæты Мады Майрæмы æмæ Сыгъдæг Æртæиууон Хуыцауы аргъуанты уагъд æрцæудзысты августы хæсты амæттæгты тыххæй мысæн бакуывтытæ Хуыцаумæ.
Уыцы бон 10 сахатæй фӕстӕмӕ бæстæйы къухдариуæгад æмæ æхсæнады минæвæрттæ азилдзысты, уыцы тохты рæстæджы нæ хъæбатыр лæппутæ цы бынæтты фæмард сты, «нæ мысынады уыцы сыгъдæг бынæттыл» – фидауынгæнæг тыхты казармæ, Галуанты Олег цы бынаты фӕмард, Уæрæсейы хъайтар Денис Ветчиновы, Милицийы сæрмагонд нысаниуæджы къорды фæмардуæвæг службæгæнджыты, «Сыгъд удты музей», Багаты Амиран ӕмӕ Джиоты Азæмæты цыртыты раз сæвæрдзысты дидинджытæ æмæ веноктæ.
Уыцы бон ма 10.00 сахатыл Анахарсисы номыл республикон Национ библиотекӕйы конференцзалы бӕстӕйы ӕхсӕнадӕн уагъд ӕрцӕудзӕн литературон-поэтикон изӕр.
Мах хъуамæ хъуыды кæнæм Фыдыбæстæ хъахъхъæнджыты, кæцытæ сæ цард рауæлдай кодтой мах тыххæй – Хуссар Ирыстоны адæмы хъахъхъæнгæйæ, æмæ уыдон номыл ссудзæм цырæгътæ. Уыдон сты Хуссар Ирыстоны хъахъхъæнджытæ, уæрæсейаг салдаттæ, кæцыты раз мах стæм хæсджын цæргæ цæрæнбонтæм. Уымæн æмæ уыдон сты нæ цард æмæ нæ бæстæйы бахъахъхъӕнджытӕ.
Мах азымджын кæнæм фашизм, ноджыдæр азымы æвæрæм гуырдзиаг фашизмы, мах нал фæнды æмæ ма искуы æвзæра фашизмы ахæм æвзар.
КЪÆБУЛТЫ Маринæ
