15 азы рацыд августы хæстæй, уыцы темæйыл бирæ æрмæджытæ мыхуыргонд æрцыдысты, фæлæ уæддæр рæстæг нæ бандæвта ныгуылæйнаг иртасджыты цæстæнгасыл. Уыдон æдзæсгомæй сæ кæнон кæнынц, ацы хæсты тыххæй фактты зыгъуыммæ кæнгæйæ, мæнгдзинад парахат кæнгæйæ.
Кæд Х. Тальявини йæ доклады банысан кодта, 2008 азы августы хæсты инициатор чи уыдис, уый, уæддæр нырма дæр «фондзбонон хæсты» ныгуылæйнаг, афтæхуыйнæг, эксперттæ аххосджын кæнынц Уæрæсейы. Бирæтæ йæ «чысыл хæст» дæр хонынц, фæлæ уыцы «чысыл» хæст цас зиан ракодта Хуссар Ирыстонæн, цас уды зиæнттæ дзы æрхаста, уыдæтты кой нæ кæнынц. Уымæ нæ кæсгæйæ, «чысыл» хæст Фæскавказы фæивта паддзахадон арæнтæ, уыцы «чысыл» хæст фæивта дунейы хиæмбарынад, сырæзтысты ног паддзахадтæ.
Уыцы ивындзинæдтæ Хуссар Ирыстонæн зынаргъ слæууыдысты. Пырх æмæ сыгъд республикæйыл куы нæ дзурæм, кæй сæндидзыдта æмæ дарддæр дæр кæй æндидзы, уый тыххæй, уæддæр республикæйыл бирæнымæц уды зиæнттæ æрцыд, уыдонæн та нæй раздахæн.
Августы хæсты «чысыл» чи рахуыдта, уыцы ныгуылæйнаг политиктæ æмæ «эксперттæ» августы тугкалæн бонты Цхинвалы куы уыдаиккой, фынæй горæты сабыр цæрджыты Гуырдзыстоны тугмондаг хæстонтæ 50-йы бæрц «Град»-ы установкæтæ æмæ бирæнымæц артиллери æмæ танктæй куы æхстой, уæд æй бамбæрстаиккой, цас «чысыл» уыд уыцы хæст. Æниу, йæ организатортæ дæр сæхæдæг уыдысты æмæ йæ бæлвырдæй зыдтой, хæст Гуырдзыстоны фашистон режим кæй райдыдта, фæлæ æппæт мадзæлттæй дæр архайдтой æмæ ныры онг дæр архайынц æцæг аххосджыны бааууон кæныныл.
Гуырдзиæгтæ горæты зынджы хай кæй фæкодтой, уый нæ тыхсын кæны Ныгуылæны «рæстаг» политикты, уыдон æппæт амæлттæй дæр архайдтой æмæ архайынц уыцы хæсты Уæрæсейы фæаххосджын кæныныл.
Абон ныгуылæйнаг бæстæтæ Уæрæсейы оккупант кæй хонынц, æмæ йæм кæй сидынц, цæмæй йе ‘фсад Гуырдзыстоны территорийæ ракæна, уый дæр раст нæу. Гуырдзыстоны территорийыл иунæг уырыссаг салдат дæр нæй. Уырыссаг салдаттæ сты Республикæ Хуссар Ирыстон æмæ Абхазы территоритыл. Уыдон та сты хæдбар республикæтæ æмæ сæ территорийыл кæй æфсад уой, уый сæхи бар у. Уыимæ ма суверенон республикæтæ Уæрæсеимæ уый тыххæй сарæзтой æмбæлон бадзырдтæ, уыцы бадзырдты бындурыл уæрæсейаг æфсады контингенттæ сты республикæты территоритыл. Уыцы контингенттæ хъахъхъæнынц æвзонг республикæты сабырад, уыдон сты æдасдзинады гарант. Уымæн æмæ Гуырдзыстон кæд йæхи чырыстонæй æвдисы, уæддæр абон нырма тæссаг у. Уымæн æвдисæн у, Женевæйаг дискусситы Гуырдзыстон йæ къух кæй нæ фыссы тыхæй ма спайда кæныны документыл, уый дæр.
Абоны онг нæдæр Гуырдзыстон æмæ нæдæр йæ «босстæ» 2008 азы августы цаутæй ницы хатдзæгтæ сарæзтой, нæдæр хатыр ракуырдтой сæ бакæнгæ фыдракæнды тыххæй, хæдбар Хуссар Ирыстон æмæ Абхазы нырма дæр хонынц æмæ дарддæр дæр хондзысты «оккупацигонд территоритæ».
Абон дæр, Украинæйы фашистты ныхмæ Уæрæсейы сæрмагонд æфсæддон операцийы рæстæджы Ныгуылæны бæстæтæ Гуырдзыстоны ардауынц, цæмæй дыккаг фронт бакæна. Уый та нысан кæны Хуссар Ирыстон æмæ Абхазмæ бабырсын. Кæд Гуырдзыстоны къухдариуæгад нырма нæ разы кæны дыккаг фронт бакæныныл, уæддæр сом цы уыдзæн, уымæн ничи ницы зоны. Уæдæ цалынмæ Гуырдзыстон йæ къух не ‘рфысса тыхæй ма спайда кæныны документыл, уæдмæ нæ республикæйæн Гуырдзыстонæй тæссаг уыдзæн. Уый тыххæй та нæ Гарзджын тыхтæ æппæтмæ дæр цæттæ хъуамæ уой.
ОСИАТЫ Индирæ
