Хорзæхджын æрцыд майданæй йæ амæлæты фæстæ

Æвзонг лæппу Гæджиты Роберты сгуыхтдзинады истори, кæцы йæхи царды аргъæй бахъахъхъæдта Коцты Лорæйы цард, айхъуыст æрмæст Ирыстоны нæ, фæлæ æнæхъæн Уæрæсейы дæр. Хъайтары равдисгæ æхсардзинад æвæлмасæй никæйы ныууагъта. Дзæуджыхъæуы базарадон-экономикон техникумы студент йæ амæлæты фæстæ хорзæхджын æрцыд Ветеранты æппæтуæрæсейаг æхсæнадон организаци «Боевое братство»-йы майдан «За ратную доблесть»-æй.

Хорзæх радтыны тыххæй Гæджиты Роберты ныййарджытæм Цæгат Ирыстонмæ æрцыд мæскуыйаг делегаци: организаци «Боевое братство»-йы сæрдары фыццаг хæдивæг Дмитрий Саблин, инæлар-лейтенант Иван Агеенко, инæлар-булкъон Евгений Зубарев, федералон проект «Форум маленьких героев»-ы организацион комитеты къухдариуæггæнæг Цхуырбаты Аланæ. «Нæ организацийы сæрдар, Советон Цæдисы хъайтар Борис Громов райста уынаффæ Роберты йæ амæлæты фæстæ майдан «За ратную доблесть»-æй схорзæхджын кæныны тыххæй. Абон мах сæххæст кодтам ацы хæслæвæрд. Ноджыдæр нæ арфæйы ныхæстæ зæгъын фæнды хъайтары мад, æппæт хиуæттæн, хъомылгæнджытæн, ахуыргæджытæн ахæм лæппу кæй схъомыл кодтой, уый тыххæй. Мах ын йæ ном макуы хъуамæ ферох кæнæм. Уый у цæвиттон æрмæст Ирыстоны адæмæн нæ, фæлæ æппæт бирæнацион Уæрæсейæн. Хуыцау зæгъæд, цæмæй ахæм цаутæ макуы фæуд кæной мæлæтæй», – загъта Дмитрий Саблин.

Дзæуджыхъæуы базарадон-экономикон техникумы залы майдан радтыны церемонийы уыдысты Роберты ныййарджытæ Гæджиты Светланæ æмæ Хетæг, йæ хæлæрттæ, ахуыргæнджытæ, афтæ ма кæй фервæзын кодта уый – Коцты Лорæ. «Æгæрыстæмæй, нæ зонын цы зæгъон, уый, ногæй хатыр курон мæ рæдыды тыххæй æмæ æгæрон арфæ кæнон Робертæн, йæ ныййарджытæн?! Уый куынæ уыдаид, уæд æз абон сæрæгас нæ уаин, нæ уыдаиккой мæ сывæллæттæ дæр. Кæд исчи афтæ хъуыды кæны æмæ  Роберты ферох кодтон, уæд уый афтæ нæу. Æз æй никуы ферох кодтон æмæ йæ никуы дæр ферох кæндзынæн. Æз ын йæ ном дзурын æрвылбон дæр, мæ хъæбул Робертмæ куы фæдзурын, уæд. Алцыдæр сараздзынæн, цæмæй мæ сывæллон макуы фегад кæна, кæй ном ыл сæвæрдтон, уыцы стыр адæймаджы ном», – загъта Коцты Лорæ.

Церемонийы ма банысанчындæуыд ацы техникумы ахуыргæнæг Цориты Аланы сгуыхтдзинады тыххæй, кæцыйы арæхстджын архайдтыты фæрцы мæлæтæй аирвæзт сылгоймаг, кæцыйæн уыд инсульт. Дмитрий Салбин ын радта арфæйы фыстæг. «Фæнды мæ ирон адæмæн цыт æмæ дисы ныхæстæ зæгъын, кæцы хъомыл кæны хъайтарты. Уый у цæвиттон æрмæст сывæллæттæн нæ, фæлæ ма хистæртæн дæр», – загъта уый.

Уæ зæрдыл уын лæууын кæнæм, 2006 азы Дзæуджыхъæуы базарадон-экономикон техникумы студент Гæджиты Роберт кæй аирвæзын кодта æртындæсаздзыд Коцты Лорæйы. Чызг йæ хоимæ портийæ хъазыд Терчы  былгæрон æмæ порти æнæнхъæлæджы ныххауд донмæ. Лорæ бафæлвæрдта порти сисынмæ, фæлæ йæхæдæг дæр доны бахаудта. Æххуысмæ йæм фæзынд хъæбатыр Роберт æмæ чызджы раласта дамбæмæ, фæлæ йæхицæн йæ бон нал ссис донæй рахизын…

2007 азы 31-æм январы УФ-йы Президент Владимир Путины Барамындæй хорзæхджын æрцыд «За спасение погибающих»-ы майданæй йæ амæлæты фæстæ.