РХИ-йы Юстицийы министрады сæйраг тæрхондонон пристав Дзæгъиаты Вадим хайад райста VIII-æм дунеон зонадон-практикон конференцийы, кæцыйы рæстæджы хорзæхджын æрцыд Уæрæсейы тæрхондонон приставты федералон службæйы «150 лет основания института судебных приставов»-ы майданæй. Дзæгъиаты Вадим куыд фехъусын кодта, уымæ гæсгæ «Тыхæй æххæст кæныны фадыджы информацион технологиты» темæйыл конференци уагъд æрцыд Владимиры областы горæт Суздалы 21-22 сентябры.
Йæ ныхæстæм гæсгæ, конференцийы программæйы уыдысты пленарон рабадтытæ ауадзын, хайадисджыты докладтæ æмæ дискуссион сесситæ.
«Конференцийы рæстæджы уыдысты алы паддзахадты минæвæртты тематикон раныхæстæ, кæцытæ баст уыдысты тыхæй æххæст кæныны системæйы информацион технологитæ æмæ перспективæты рæзтимæ», – загъта Дзæгъиаты Вадим.
Уый радзырдта, зæгъгæ, Уæрæсейы тæрхондонон пристав, йæ кабинетæй нæ рахизгæйæ, йæ бон у хæсджыны тыххæй æппæт æнæмæнгхъæуæг информаци æрæмбырд кæнын, ома, йын бангты хыгъдтæ æмæ уыдоны æхцайы фæрæзтæ, кæнæ исад ис æви нæ, уый фæдыл. Йæ ныхæстæм гæсгæ Хуссар Ирыстоны абон уавæр у æндæргъуызон. «Тæрхондоны пристав домæн (запрос) аразы фысгæйæ æппæт æнæмæнгхъæуæг паддзахадон органтæм æмæ йæ æнхъæлмæ кæсын бахъæуы бæрæг рæстæг. Уыцы рæстæгмæ, хъыгагæн, хæсджынæн йæ бон у йæ исад аласын, кæнæ та сæ йе ‘ввахс хионыл ныффыссын», – бамбарын кодта Дзæгъиаты Вадим.
Сæйраг тæрхондонон пристав банысан кодта, зæгъгæ, Хуссар Ирыстоны фылдæр хъусдард аздахын хъæуы нырыккон информацион компьютерон технологиты фарст æрбиноныг кæнынмæ. Дунеон зонадон-практикон конференцийы ма хайад райстой Герман, Франц, Бельги, Финлянди, Латви, Эстони, Албани, Черногори, Чехи, Серби, Китай, Камбоджа æмæ Хæдбар Паддзахадты Æмхæларады бæстæты минæвæрттæ.
Comments are closed, but trackbacks and pingbacks are open.