Ацы уагдоны цурты фæцæй-цæугæйæ, æнæмæнг дæ хъусты азæлдзысты музыкæйы æхцон зæлтæ, зарæджы зæлланггæнæг хъæлæстæ æмæ ахуыргæнæг-педагогты аив æмæ цæстуарзон амындтытæ райдайгæ музыканттæн. Ахæм æнæрынцой фæллой кæнынц æрвылбон дæр фæлтæрд ахуыргæнджытæ, стæй музыкæ æмæ зарæджы дæсныйад чи бауарзта, сомбон ацы хъуыддаг чи дарддæр кæндзæн, концертдзаутæн йæ диссаджы курдиатæй чи лæггад кæндзæн, уыдон дæр. Æмæ уал цалынмæ уыцы арфæйаг хъуыддаг сæ къухты бафта, уæдмæ сæ хъæуы æвæллайгæ куыст кæнын, хистæры хæслæвæрдтæ æнæзивæгæй æххæст кæнын.
Афтæ у се ‘нувыд куыст Æлборты Феликсы номыл Цхинвалы музыкалон ахуыргæнæндоны коллективæн йæ сырæзтæй фæстæмæ. Ахуыры хайады сæргълæууæг, фортепианойы хайады ахуыргæнæг Хъуылымбегты Маринæ уал æхсызгондзинады æнкъарæнтимæ дзырдта, ивгъуыд азты ахуыры хорз бæрæггæнæнтæ чи равдыста, уыдоны тыххæй. Зæгъæм, ацы аз фортепианойы хайад каст фæци Гаглойты Александрæ, вокалист Бекъойты Филипп дæр æнтысгæйæ каст фæци ахуыргæнæндон, уый ма ахуыр кæны Хуссар Ирыстоны паддзахадон университеты актерон факультеты. Джиоты Михаил та ахуыр каст фæуыны фæстæ зары ансамбль «Симд»-ы хоры. Не ‘взыгъд æвзонг зарæггæнæг Хаситы Сослан ахуыр каст фæуыны фæстæ ансамбль «Симд»-ы дæр кусы æмæ нæ паддзахадон театры дæр. Сæ зонындзинæдтæ сын æнæвгъауæй лæвар кодтой ахуыргæнджытæ Гасситы Ацæмæз æмæ Сланты Ацæмæз. Гаглойты Александрæйæн та музыкæйы сусæгдзинæдтæ лæвар кодта æвзонг чызг, Ростовы консерваторийы рауагъдон Пухаты Ландæ.
Дарддæр Хъуылымбегты чызг æрдзырдта, ахуыргæнæндоны кæй ис æппæт фадæттæ æмæ уавæртæ, ахуыргæнджытæ се ‘ппæт дæр сты, йæ хъуыддаг иттæг хорз чи зоны æмæ æвзонг курдиæтты æппæт гæнæнтæ дæр райхалын йæ бон кæмæн у, ахæмтæ. Ис дзы хъæздыг библиотекæ, уый рæстæгæй рæстæгмæ баххæст æрцæуы хъæуæг литературæйæ æмæ дзы пайда кæнынц, чи йæм æрбацæуы, уыдон. Фæлæ иууыл сæйрагдæр педагогты фæстæ сты музыкалон инструменттæ æмæ ахуыры хайады сæргълæууæг куыд банысан кодта, уымæ гæсгæ уыдонæй дæр сты ифтонг.
Рæхджы музыкалон ахуыргæнæндон документтæ исын райдайдзæн абитуриенттæй, уыдонæй алчи дæр равзардзæн, цы дæсныйадыл æй фæнды ахуыр кæнын, уый.
ХУЫБИАТЫ Никъала
Comments are closed, but trackbacks and pingbacks are open.