Республикæйы цардуаджы алы къабазæн аргъ скæнынæн цы алыхуызон хæрзиуджытæ ис, уыдонмæ ма æрæджы бафтыд иу – Къостайы номыл орден. Хæрзиуæг сфидар кодтой Къостайы номыл культурон центр æмæ Стыр Ныхасы сылгоймæгты комитет сæ иумæйаг æмбырды. Царды та йæ йæхи фæрæзтæй рауагъта æхсæнадон архайæг, меценат Гуцаты Фридон. Хæрзиуæг рухс федта, фидæн аз Къостайы райгуырды 165 азы кæй бæрæг кæндзыстæм, уый кадæн. Орденæй хорзæхджын цæудзысты, æвзаджы, литературæйы, ахуырады, аивады, социалон къабазы стыр æнтыстытæ кæмæн ис, уыдон.
Æрæджы уый фæдыл фыццаг хатт æхсæнадон организаци «Хетæгкаты Къостайы номыл Национ зонадон-культурон центр»-ы хъæппæрисæй, Дзæуджыхъæуы бынæттон администрацийы арæзт æрцыд кадджын мадзал. Байгом æй кодта æхсæнады сæрдар Æлборты Иван. Куыд загъта, афтæмæй хæрзиуæг лæвæрд цæудзæн дыууæ азы иу хатт, Къостайы фарн абон дарддæр кад æмæ радæй чи хæссы, уыдонæн. Уый фæстæ Цæгат Ирыстоны Фысджыты цæдисы сæрдар Агънаты Гæстæнимæ орденæй схорзæхджын кодтой Ирыстоны зынгæ адæймæгтæй цалдæры.
Номинаци «Литературæ»-йы «Къоста»-йы орденæй хорзæхджын æрцыдысты газет «Рæстдзинад»-коллектив æмæ зындгонд фыссæг æмæ ахуыргонд, Хуссар Ирыстоны Фысджыты цæдисы сæрдар Хъазиты Мелитон. Мелитон ма хорзæхджын æрцыд республикæйы уæлдæр хæрзиуæг «Ирыстоны Намысæн»-æй.
Номинаци «Æвзаг»-æй амынд орденæй хорзæхджын æрцыд Хуссар Ирыстоны паддзахадон университеты профессор Битарты Зойæ.
«Культурæ»-йы номинацийы аккаг ссис УФ-йы адæмон артист Бæцæзаты Юри.
Се ʻппæты номæй мадзалы организатортæн зæрдæбын арфæ ракодта «Рæстдзинад»-ы сæйраг редактор Хозиты Барис. Куыд банысан кодта, афтæмæй Къостайы номыл хæрзиуæг стыр бæрндзинад æвæры алкæуыл дæр æмæ алчидæр хæсджын у, цæмæй йæ стыр кадимæ хæсса.
Нæ уацх.
