9-æм февралы Цхинвалы скъола-интернаты хъомылгæнинæгтæ ацыдысты улæфынмæ Згъуыбиры хосгæнæндон «Аландон»-мæ, кæцы ис Дзауы районы.
Сывæллæттæ фондз боны дæргъы баулæфыдысты нæ республикæйы рæсугъддæр бынæттæй сæ иуы. «Фынддæс сывæллоны хъæлдзæг рæстæг арвыстой зымæгон курорты, афтæ ма фæхуыздæр кодтой се ‘нæниздзинад дæр. Нæ хъомылгæнинæгтæн стыр пайда фæуыдзæн ацы улæфт, уымæн æмæ уыдон фæрынчын сты грипп æмæ коронавирусæй. Куыддæр æрбахæццæ стæм бынатмæ, афтæ сывæллæтты цинæн кæрон дæр нал уыд, уымæн æмæ фæстаг рæстæджы уыйбæрц мит никуыуал федтой. Уайтагъд хъазын райдыдтой митæй. Скъола-интернаты хъомылгæнинæгтæ Згъуыбиры хосгæнæндоны ныр баулæфыдысты дыккаг аз фæдфæдыл. Ацы акцийы инициаторæй ралæууыд Президент Бибылты Анатоли. Мах стыр райгонд стæм паддзахады сæргълæууæгæй интернаты ахуыргæнинæгтæм йæ æдзухон хъусдарды æмæ æххуысы тыххæй. Цæмæ фæнды дæр æм ма бахатæм, алыхатт дæр нæ фарсмæ æрбалæууы æмæ нын баххуыс кæны. Афтæ ма нын регулярон æгъдауæй нæ сывæллæттæн æххуыс кæны президенты цардæмбал Куымæридтаты Линдæ», – загъта Цхинвалы скъола-интернаты организатор Харебаты Мари-нæ. Йæ ныхæстæм гæсгæ сывæллæттæ райгондæй баззадысты сæ хæлцæй дæр, боны дæргъы хордтой æртæ-цыппар хатты хæрзгъæд æмæ хæрзад хæринæгтæ. Уырдæм цæугæйæ дæр æмæ фæстæмæ дæр, сывæллæтты æдасдзинады тыххæй семæ цыдысты Паддзахадон автоинсекцийы инспектортæ æмæ сын бынаты та сæ æдасдзинад хъахъхъæдтой Мидхъуыддæгты министрады кусджытæ.
Сывæллæттæ райстой ваннæтæ дæр, хъæздыг минералон сконд кæмæн ис, ахæм донæй. Процедурæтæ сты эффективон къорд низты профилактикæйæн.
Скъола-интернаты сывæллæттæ сты уæлдай фæкæсинагдæр æмæ сын ахæм акцитæ æрхæссынц стыр циндзинады æнкъарæнтæ.
Нæ уацх.
Comments are closed, but trackbacks and pingbacks are open.