ВЕЛОАЛЫГЪД – КЪУЫДАРГОММÆ

Республикæ Хуссар Ирыстоны Хæххон лыжæты спорты федерацийы сæргълæууæг Тедеты Лери сорганизаци кодта велоалыгъд егъаудæр дæрддзæфы æмæ равзæрстой Цхинвал-Къуайсайы маршрут. Акци уагъд æрцыд, Кавказы сæрыл тох æмæ йæ бахъахъхъæныныл 80 азы кæй сæххæст, уый сæраппонд. Ацы хъуыддагыл стыр æхсызгонæй сразы сты нæ бæстæйы велоспортуарзджытæ.

Мадзал ауадзыны хъуыддаг, фыццаджыдæр, баст у нæ адæмы æхсæн æнæниздзинад сифтонг кæнын æмæ позитивон эмоцитæ райсыны тыххæй. Уый та ныртæккæйы дуджы у иууыл ахсджиагдæр, æнæниздзинадæн коронавирусы фæзындимæ тынгдæр райдыдтой аргъ кæнын æмæ æхсæнад фылдæр хъусдард здахын райдыдтой спортмæ.

Велоалыгъд «Цхинвал-Къуайса» старт систа сабаты райсом раджы, 6 сахатыл нæ горæты Театралон фæзуатæй. Акцийы хайадисджытæ уыдысты æртын спортсмены бæрц. Ам сæм спортивон акцийы сæраппонд арфæтимæ æрбаиу ис нæ бæстæйы сæргълæууæг Бибылты Анатоли дæр. Уый велоалыгъды хайад кæй райста, уый стыр цыт æмæ кад уыдис командæйæн æмæ хорз зæрдæйы равгимæ, хъазгæ-худгæ афæндараст сты сæ дард фæндагыл. Велоалыгъды маршрут уыдис 60 километры бæрц æмæ йыл æнтыстджынæй фæтых сты мадзалы хайадисджытæ, æхсæз сахатмæ бацыдысты банысангонд бынатмæ.

Велоалыгъды мадзал йæ хайадисджытæн стыр æхсызгондзинад кæй æрхаста, уый тыххæй нын радзырдта нæ республикæйы Хæххон лыжæты спорты федерацийы сæргълæууæг Тедеты фырт. Уый куыд банысан кодта, афтæмæй акцийы хайадисджытæ уыдысты æндæр æмæ æндæр кары адæймæгтæ, се ‘хсæн 13-аздзыд дæр. «Куыд зонут, афтæмæй мах сорганизаци кодтам ахæм егъау дæрддзæф æмæ бæрзонд ранмæ ве-лоалыгъды мадзал «Цхинвал-Къуайса». Кæй зæгъын æй хъæуы, æнцонвадат нæ уыдис, фæлæ сæрыстырæй мæ бон зæгъын у, бынатмæ кæй бахæццæ стæм æхсæз сахатмæ. Мадзалы хайадисджытæ се ‘ппæт дæр баззадысты тынг райгондæй, уымæн æмæ сæрдыгон райсом раджы, Къуыдаргомы   сатæг уæлдæфы велойыл цæуын уыдис тынг цымыдисон, адæймагæн хаста æрмæстдæр позитивон эмоцитæ, æхцондзинад æмæ арвыстам хъæлдзæг рæстæг. Къуайсамæ фæндагыл мах æрлæууыдыстæм нæ фæллад суадзыны тыххæй Хъемултайы хъæуы. Уый уыдис нæ иууыл стырдæр улæфæн рæстæг. Куы ныххæццæ стæм бынатмæ, уæд ныл Къуыдаргомы сæмбæлдысты стыр æх-сызгонæй, хъарм ахастимæ. Велоалыгъд сорганизаци кæныны хъуыддаг сæрмагондæй уыдис уый тыххæй, цæмæй нæ кæстæр фæлтæрæн, мах, хистæртæ æвдисæм адæмы æхсæн æнæниздзинад парахат кæнын кæй у ахсджиаг æмæ сын кæддæриддæр  спорты хъуыддаг уа дæн-цæг. Мæнмæ гæсгæ ацы хъуыддаг у тынг хорз дæнцæг нæ рæзгæ фæлтæрæн, æмткæй нæ фæсивæдæн. Уый ныртæккæ тынг ахсджиаг хъуыддаг у æмæ махыл та æнцой кæны уыцы бæрндзинад, цæмæй размæ, уæрæх фæндæгтæм кæнæм нæ сомбоны фæлтæры», – банысан кодта Тедейы-фырт. Уый ма банысан кодта, кæй фæнд кæнынц  æнгæс мадзæлттæ ауадзын, цæмæй сæ фылдæр адæм хайад исой. «Ахæм спортивон мадзæлттæ уадзын хъæуы арæхдæр, цæмæй дзы хайад исой, цас гæнæн ис, уыйас адæм. Ацы мадзæлттæ уадзыны хъуыддаджы фарс лæууы Республикæ Хуссар Ирыстоны Президент Бибылты Анатоли дæр æмæ йæхицæн та куыд фæгæнæн вæййы, уымæ гæсгæ сæ хайад райсы», – загъта Тедеты Лери.

Бибылты Анатоли стыр аргъ кæй кæны спортæн, уымæн мах кæддæриддæр вæй-йæм æвдисæн æмæ та ныр дæр æрсидт хуссарирыстойнаг адæммæ, цæмæй се ‘нæниздзинад фидар кæной активон спорты руаджы, уый æмрæнхъ велоалыгъдты дæр исой хайад. «Ахæм акциты руаджы бирæтæ равзæрстой велоспорт æнæниздзинад пропагандæ кæныны сæраппонд. Уый у тынг ахсджиаг æмæ хорз хъуыддаг. Дæнцæг у уымæн, цæмæй фылдæр адæм се ‘ргом аздахой спортмæ, улæфты активон хуызтæм æмæ уæм иууылдæр æнæниз. Кæд наци æнæниз уа, уæд ын уыдзæнис размæцыд дæр æмæ фæрныгад. Бирæ фæндтæ æмæ нын плæнттæ ис, фæлæ уал нæ рæхджы фæнды Зары фæндагыл Нары хъæумæ ацæуын велоалыгъды æмæ, æвæццæгæн, уыцы хъуыддаг дæр уыдзæнис. Зæгъæм, мах развæлгъау куыд банымадтам, афтæмæй абон ацы бынатмæ хъуамæ æрбахæццæ уыдаиккам æхсæз сахатмæ æмæ афтæ дæр рауад», – загъта РХИ-йы Президент Бибылты Анатоли. Уый ма спорт æмæ æнæниздзинадыл дзургæйæ, ской кодта ныры рæстæг æмæ дуджы тыххæй: «Æз абон сидын нæ адæммæ, цæмæй саразой вакцинæ, дунейыл цы фыдрын апарахат, уый ныхмæ. Фыццаджыдæр уый тыххæй æмæ дзы бахизæм нæхи æмæ нæ сомбон. Ацы вирус у агрессивон æмæ, куыд уынæм, афтæмæй æгъатырæй куынæг кæны адæмы. Саразут вакцинæ, æмæ иумæ бахъахъхъæнæм нæ адæмы, не ‘хсæнад, нæ фидæн. Диссаг уый у æмæ социалон хызæгты цы фейктæ вæййы, уыдоныл æууæндæм æмæ, зæгъæм, дунейыл йæ ном кæмæн ныхъхъæр ис æмæ мингай адæймæгты мæлæты дзæмбытæй чи байста, уыцы дохтыр Леонид Рошальыл не ‘ууæндæм. Мæнмæ гæсгæ, хъæуы саразын вакцинæ», – банысан кодта нæ бæстæйы сæргълæууæг Бибылты Анатоли.

ЦХУЫРБАТЫ Ларисæ