Бибылты Анатоли фембæлд Сауденджызон экономикон æмгуысткæнынады фæдыл Уырыссаг националон комитеты сæрдар Виктор Архиповимæ. Фембæлды хайад райстой Хуссар Ирыстоны Хицауады Сæрдар – РХИ-йы Экономикон рæзты министр Тадтаты Дзамболат, Сауденджызон экономикон æмгуысткæнынады фæдыл Уырыссаг националон комитеты советы уæнг Владимир Медведев æмæ Сауденджызон экономикон æмгуысткæнынады фæдыл Уырыссаг националон комитеты цур Республикæ Хуссар Ирыстоны Фæсарæйнаг хъуыддæгты министрады официалон минæвар Виктор Бунин.
Уазджытæн æгасцу зæгъгæйæ, Бибылты Анатоли банысан кодта форумы эффективондзинад, кæцы æрæджы ауагъдæуыд Хуссар Ирыстоны.
«Нæ разы цы нысан æвæрæм, уый серьезон у – Къуайсайы æрзæтгуырæнты уавæр сахуыр кæныны тыххæй фадæттыл бакусын. Республикæйы размæцыды тыххæй уый серьезон къахдзæф у. Знон Республикæ Хуссар Ирыстоны Экономикон рæзты министрад æмæ Сауденджызон экономикон æмгуысткæнынады фæдыл Уырыссаг националон комитет сæ къухтæ æрфыстой фæндæтты меморандумыл. Уырны мæ, Хуссар Ирыстоны экономикæйы фæдфæдылон рæзт адарддæр уыдзæн», – загъта Президент.
Бибылты Анатоли банысан кодта, зæгъгæ, Къуайсайы æрзæткъахæн управленийы реализацийы проект ахсджиаг у æрмæст горæт Къуайсайæн нæ, фæлæ æнæхъæн республикæйæн дæр.
Йæ рады Виктор Архипов бузныг загъта Хуссар Ирыстоны сæргълæууæгæн зæрдиаг химæрайсты тыххæй æмæ банысан кодта, зæгъгæ, цы форум ауагъдæуыд, уый не ‘мгуыстады уыд фыццаг къахдзæф.
«Мах æрæмбырд кодтам специалистты къорд. Фæлæ цæмæй куыстмæ æрæвнæлдæуа, уый тыххæй мах хъæуы дæ разыдзинад. Мах ауадздзыстæм иртасынгæнæн куыстытæ æмæ сбæрæг кæндзыстæм реалон фæсауæрцтæ», – банысан кодта уый.
Сауденджызон экономикон æмгуысткæнынады фæдыл Уырыссаг националон комитеты советы уæнг Владимир Медведев бамбарын кодта, сыгъдæг згъæртимæ рагæй кæй кусынц, уый.
«Проекты реализацийы фæдыл махæн ис рагон бастдзинæдтæ. Мах кусæм уæлдай сыгъдæгдæр згъæртимæ, кæцытæн ис бафтауæггаг аргъ. Æз афтæ хъуыды кæнын, æмæ Къуайсайы æрзæтгуырæнты махæн нæ бон бауыдзæн саразын хæххон-æрзæткуыстгæнæн куыстуат, кæцы дæтдзæн сыгъдæг продукци, кæцыйы реализаци кæнын нæ бон уыдзæн куыд дунеон, афтæ мидæггагон базæртты дæр», – загъта уый æмæ банысан кодта, зæгъгæ, бакæнын хъæуы геологон-развæдсгарæн куыст æмæ къухтæ æрфыссын хъæуы инвестицион сразыдзинадыл.
Йæхи рады Тадтаты Дзамболат дæр фехъусын кодта, зæгъгæ, Хуссар Ирыстоны Экономикон рæзты министр кусы æхсæнведомствæйон æмархайды фарстатыл, æмбырд кæны Къуайсайы æрзæткуыстгæнæн управленийы тыххæй информаци, цæмæй республикæйы кусыны тыххæй инвесторæн уа æппæт юридикон бындуртæ дæр.
Бибылты Анатоли радзырдта Хуссар Ирыстоны инвестицион архайды тыххæй дæр.
«Инвестортæ райгонд сты барадон æмахастытæ æмæ гарантитæй, кæцытæй сæ ифтонг кæны республикæйы къухдариуæгад. Цæвиттон – «Южный сад», йæ инвестицитæ сты 230 милуан сомы æмæ сæ дарддæр дæр фылдæр кæнынц. Уыдон дыргъдон ныккалдтой 350 гектарыл, æмæ сæ фæнды 515 онг æй баххæст кæнын. Ивгъуыд аз «Южный сад» Хуссар Ирыстонæй аласта 1050 тоннæйы фæткъуытæ. Ацы аз та фæнд кæнынц 2000 тоннæйы онгмæ сæ схизын кæнын. Сæнгуыстгæнæн завод аласта 2,5 милуан авджы. Мах сын кæй æххуыс кæнæм, уый сын дæтты стимул, цæмæй сæ кондад размæ цæуа, уый тыххæй. Æппæт дæр размæ цæуы динамиконæй», – банысан кодта уый.
Виктор Архипов дæр загъта, зæгъгæ сын ис структурæ, кæцы нырыккон фадæттæй, космикон развæдсгæрстæй, бæрæг кæны æппæт дæр – нефтæй райдайгæйæ, суанг зынаргъ æмæ æрдæгзынаргъ згъæрты онг. Уый банысан кодта, зæгъгæ, Республикæ Хуссар Ирыстоны цы пайдайаг къахæггæгтæ ис, цæмæй уыдонæн се ‘ппæты тыххæй дæр райсой æххæст геологон бæлвырдгæнæнтæ, уый тыххæй цæттæ у æмбæлон куыст бакæнынмæ.
«Фæнд цæуы экологион экспертизæ ауадзын. Æппæт кондад дæр уыдзæн экологионæй сыгъдæг. Æппæт куыстуæттæ дæр алфæмблайы æрдзæн уыдзысты экологионæй æдас. Зæронд зæххытæй та спайдагæнæн уыдзæн хъæууон хæдзарады домæнтæн», – загъта уый.
Президент бахахх кодта, зæгъгæ, æрдзы рæсугъддзинад æмæ экологи бахъахъхъæныны тыххæй кондад æнæдызæрдыгæй хъуамæ дзуапп дæтта æппæт экологион нормæтæн æмæ æнтыстджын куыстæн.
Comments are closed, but trackbacks and pingbacks are open.