10-ӕм майы коронавирусон инфекцийæ хи бахизыны фæдыл оперативон штабы рабадты адарддӕр кодтой фӕкъуындӕггонд мадзӕлттӕ 31-ӕм маймӕ. Фӕлӕ хӕлцадон продукттӕй, арӕзтадон ӕмӕ ӕнӕмӕнгхъӕуӕг товартӕй республикӕйы сифтонг кӕныны тыххӕй 18-ӕм майӕ фӕстӕмӕ нӕ паддзахадон арӕнтӕй мидӕмӕ уадзын райдыдтой уӕзласӕн машинӕтӕ. Ацы хъуыддагӕн ӕнӕсаразгӕ нӕ уыд, уымӕн ӕмӕ нӕ дуканиты бирæ товарты хуызтӕ сыстӕм сты. Стӕй ма республикӕйы территорийыл цӕуы алыгъуызон арӕзтӕдтӕ, куыд инвестпрограммӕйы фӕлгӕтты, афтӕ хисӕрмагонд арӕзтадон объекты дæр. Ӕмӕ цӕмӕй арӕзтады темп графикмӕ гӕсгӕ цӕуа, уый тыххӕй цух ма хъуамӕ ӕййафой арӕзтадон ӕрмӕджытӕй.
Коронавирусы инфекци COVID -19 ныхмæ архайды оперативон штабы рабадты мӕйы размӕ фӕндон рахастой, цӕмӕй нӕ республикӕйы территоримӕ цыдӕриддӕр автотранспорт цӕуы, уыдоныл контрол цӕуа. Уый фӕдыл Мидхъуыддӕгты министрадæн бахӕс кодтой, цӕмӕй уӕзласӕн машинӕтӕ ӕмӕ автобустимӕ цӕуой милицийы кусджытӕ суанг арӕнтӕй ӕрбахизынӕй фӕстӕмӕ. Ныры онг дӕр-иу автотранспорт куы ӕрбахызт арӕнӕй, уӕд-иу ӕй милицийы кусджытӕ комкоммӕ бакодтой рынчындонмӕ, цӕмӕй йӕ бӕлцӕттӕ конд ӕрцӕуой карантинмӕ. Уӕзласӕн машинӕты шофыртӕ дӕр-иу сӕ гуыффӕтӕ равдӕлон кӕныны фӕстӕ конд ӕрцыдысты карантинмӕ уазӕгдон «Алан»-мӕ. Кӕд дзы искӕцы шофыр фӕстӕмӕ Цӕгат Ирыстонмӕ здӕхтис, уӕд-иу ӕй ахизын кодтой суанг паддзахадон арӕны онг.
Уӕзласӕн машинӕты шофыртимӕ ацы процедурӕ аразынц ныр дӕр. 18 ноябрӕй фӕстӕмӕ нӕ республикӕйы территоримӕ ӕрбахызтис 30 уӕзласӕн автотранспортӕй фылдӕр алыгъуызон товартимӕ ӕмӕ та ныр дӕр милицийы кусджытӕ цӕуынц семӕ суанг магазинты ӕмӕ арӕзтадон объекты онг. Шофыртӕн сӕ фылдӕр хай аздӕхт фӕстӕмӕ ӕмӕ иннӕтӕ та конд ӕрцыдысты карантинмӕ. Милицийы кусджытӕн кӕд зын у, се ‘рвылбонон службӕйон хӕстӕ ӕххӕст кӕнынимӕ ма иумӕ уӕзласӕн автотранспорт дӕр контроль кӕнын, уӕддӕр абоны онг нырма иу уӕзласӕн машинӕ дӕр ӕнӕхъусдард нӕ баззад. Ӕмӕ уый та стыр ахъаз у коро-навирусон инфекцийӕ не ‘мбӕтӕгты бахизыны хъуыддагæн.
ДЖИОТЫ Александр
Comments are closed, but trackbacks and pingbacks are open.