Хуссарирыстойнаг хæстон аивæдты клуб «Рухс сомбон»-ы хъомылгæнинæгтæ хайад райстой Ростовы областы уагъдцæуæг дыууæ ерысты. Нырма уал сæ цæттæдзинад фæлвæрдтой æвзæнгты ‘хсæн горæт Шахтыйы квалификацион чемпионаты. Уым сын бантыст дыууæ сыгъзæрин, дыууæ æвзист æмæ иу та бронзæ майданы. Ерысты уæлахиздзаутæ систы Тедеты Амагæ æмæ Цхуырбаты Валерия. Æвзист майдантæ бафтыдысты Чехойты Алеся æмæ Гæззаты Артуры къухты. Æртыккаг бынат та бацахста Плиты Æхсæртæг.
Уый фæстæ та хуссарирыстойнаг тхэквондисттæ хайад райстой Ростовы турниры. Уым сæ бæрæггæнæнтæ ноджы фæхуыздæр кодтой. Цхинвалмæ æрцыдысты æртæ сыгъзæрин æмæ дыууæ æвзист майданимæ. Ерысты фыццаг бынæттæ бацахстой Цхуырбаты Валерия, Чехойты Алеся æмæ Плиты Æхсæртæг. Æвзист призертæ та систы Гæззаты Артур æмæ Тедеты Амагæ. Чехойты Алесяйæн ма лæвæрд æрцыд «Хуыздæр техникæ»-йы тыххæй сæрмагонд приз дæр. Спортсменты тренер у Гуыцмæзты Валери.
«Ацы ерыстæ нын тынг пайда сты фæлтæрддзинад райсынæн. Зæгъæм, Шахтыйы ерысты фæстæ дæр Ростовы мæ хъомылгæнинæгтæ архайдтой сæ тыхтыл ноджы тынгдæр баууæндгæйæ», – банысан кодта Гуыцмæзты Валери.
УÆГЪДИБАР ХЪÆБЫСХÆСТ
Хуссарирыстойнаг богал Джиоты Аслан æртыккаг бынат бацахста 23 азы онг кæуыл цæуы, уыцы спортсменты ‘хсæн уæгъдибар хъæбысхæстæй РЦИ-Аланийы чемпионаты. Ерыстæ уагъд цыдысты горæт Беслæны. Тренер Коцты Тамерланы хъомылгæнинаг архайдта 79 кг уæзы категорийы. Джиоты Аслан у Хуссар Ирыстоны паддзахадон университеты студент.
ХУРИТЫ Батрадз
