Хуссар Ирыстоны дзыллон-информацийы фæрæзты минæвæрттæн 22-23 апрелы уагъд æрцыдысты мастер-класстæ æхсæнадæмон проект «Школа реальной журналистики «Герои поверх границ»-йы фæлгæтты. Ардæм хуынд æрцыдысты канд профессионалон журналисттæ нæ, фæлæ ма пресс-службæты кусджытæ æмæ журналистикæйы факультеты студенттæ дæр. Æдæппæт дзы хайад райстой 60 журналисты бæрц, уыдоны æддейæ студенттæ дæр. Лекциты райдианы ардæм фæуазæг ис Хуссар Ирыстоны «Уырыссаг хæдзар»-ы сæргълæууæг Сергей Скворцов, кæцы раарфæ кодта æрæмбырдуæвджытæн æмæ æрдзырдта журналистты куысты ахадындзинадыл, се ‘ндæвдадыл.
Проект «Школа реальной журналистики «Герои поверх границ» сорганизаци кодтой Россотрудничествойы – УФ-йы Президентон грантты фонды фæрæзтæй æмæ сын портнерон æххуыс та бакодтой Уæрæсейы журналистты цæдис æмæ Федералон дзыллон информацийы фæрæзтæ. Лекцитæ дзы кастысты уæрæсейаг раззагондæр журналисттæ æмæ медиа-тренертæ. Ацы æхсæнадæмон журналистон проект нымад у иууыл масштабондæрыл, кæцы уагъд æрцыд фæстаг азты. Фыццаг тренингтæ ауагътой 2018 азы æмæ уæдæй фæстæмæ сæ архайды географи ауæрæх – лекцитæ бакастысты Беларусы, Молдовийы, Сомихстоны, Азербайджаны, Казахстаны, Хъыргъызстаны, Узбекистаны, Таджикистаны, Абхазы æмæ ныр та Хуссар Ирыстоны.
Мастер-класстæ конд уыдысты дыууæ этапæй – семинар-тренингтæ æмæ практикон ахуыртæ. Лекцитæ дзы кастысты автономон æнæкоммерцион организаци «Русские репортеры»-йы генералон директор Дмитрий Михайлин, журнал «Русский репортер»-ы сæйраг редактор Виталий Лейбин, интернет-рауагъдад «Взгляд»-ы афæлгæсæг æмæ Уæрæсейы хуыздæр репортеры номхæссæг Юрий Васильев æмæ медиа-менеджер (KP.RU, LIFE.RU), горæттаг порталты хызæджы къух-дариуæггæнæг, Тик-Ток-каналы продюсер Илья Лочканов. Ахуыргæнджытæ æрдзырдтой хорз репортажы ахадындзинадыл, ныридæгæн медиадуне куыд рæзы, исты истори рæсугъд æмæ цымыдисонæй куыд радæттын хъæуы адæммæ, информаци цыбырæй æмæ æнцон-æмбарæнæй куыд аразын хъæуы æмæ афтæ дарддæр.
Мастер-класстæ рауадысты тынг цымыдисон, алчидæр лæмбынæг хъуыста ахуыргæнæгмæ, активон уыдысты практикон ахуырты рæстæджы. Дмитрий Михайлин куыд банысан кодта, афтæмæй уыдон уый æнхъæл нæ уыдысты, афтæ сæм каст, ома журналистты профессионалон æмвæзад ныллæг уыдзæнис.
«Мах хъуыды кодтам, зæгъгæ 50 мин адæймаджы кæм цæра, уым журналисттæ уыдзæнис хæрзцъус æмæ сæм фæлтæрдзинад дæр уадиссаг нæ уыдзæнис. Фæлæ бынаты фембæлдыстæм иууыл хуыздæр аудиторийыл, кæцытæ тырнынц зонындзинæдтæм, цымыдис сæ кæны алцыдæр æмæ ма се ‘хсæн ис, куыд æрыгæттæ, афтæ фæлтæрд коллегæтæ дæр. Æппæт ацы фактортæ ныфс дæттынц, уæ республикæйæн æмæ йæ журналисттæн кæй уыдзæн хорз фидæн. Нырæй фæстæмæ «Русский репортер»-æн Хуссар Ирыстон уыдзæн уарзон регион», – зæгъы Дмитрий Михайлин.
Уымæй уæлдай ахуыргæнджытæ радзырдтой ахæм журналистон куыстыты конкурсы тыххæй дæр, куыд «Герои поверх границ». Хуссар Ирыстоны минæвæрттæн дæр дзы сæ бон у сæрибарæй хайад райсой æмæ фæуæлахизуæвджытæ стажировкæйы рацæудзысты Мæскуыйы сæйраг дзыллон-информацийы фæрæзты. Дмитрий Михайлины ныхæстæм гæсгæ ацы проект бангом кæндзæнис постсоветон тыгъдады уæвæг журналистты.
«Абоны бон æхсæнадмæ информаци тынг бирæ чидæртæ хæссы алыгъуызон техникон фæрæзты фæрцы, фæлæ уæддæр журналистты йедтæмæ, профессионалон æмвæзадыл ничи зоны кусын информациимæ. Махыл баст сты æхсæнадты, адæмты æмæ суанг бæстæты ‘хсæн æмахастытæ. Дуне æдзух ивгæ кæны æмæ мах дæр нæ профессимæ ивындзи-нæдтæ хъуамæ хæссæм, техникон фæрæзтæй пайда кæнын зонæм. Нырыккон журналист хъуамæ æдæрсгæ зона фыссын, дзурын истори, информациимæ архайын. Уымæй уæлдай ма активонæй хъуамæ пайда кæна социалон хызæгтæй, мессенджертæй», – ба-нысан кодта медиа-тренер.
Тренингты фæуды йæ хайадисджытæн лæвæрд æрцыдис сертификаттæ.
ДЖИОТЫ Алыксандр
Comments are closed, but trackbacks and pingbacks are open.