Президентон æвзæрстыты къæсæрыл кæй стæм, уымæ гæсгæ со-циалон хызæгты хаттæй-хатт фæзыны алыгъуызон æнæраст информацитæ. Дæнцæгæн æрхæсдзыстæм уый, æмæ æрæджы, интернеты тыгъдады фæзынд ахæм информаци ома, Уæлдæфон-десантон æфсады ветеранты цæдис хæцы бæстæйы президенттæм кандидат Гаглойты Аланы кандидатурæйы æвварс.
Уыцы информаци стыр æнæразыдзинад сæвзæрын кодта ацы ветеранты цæдисмæ æмæ уый тыххæй æрæмбырд сты, уазæгдон «Алан»-ы сын цы сæрмагонд бынат ис, уырдæм.
Организацийы сæргълæууæг, Уæлдæфон-десантон æфсады ветеран Джиоты Азим куыд банысан кодта, уымæ гæсгæ ацы информаци у бынтон æнæраст æмæ йыл æууæндын нæ хъæуы. Йæ ныхæстæм гæсгæ социалон хызæгты цы информаци тезгъо кæны, уый бафарстой се ‘ппæтдæр, æмæ десантон æфсады службæгæнджыты къорд ахæм хъуыдыйыл хæст кæй не сты, уымæ гæсгæ æвдисынц се ‘нæразыдзинад.
«Ацы къорд сты цыппар адæймаджы скондæй æмæ кæй фарс лæууынц, уый сæхи сæрмагонд хъуыддаг æмæ фæндон у. Алы адæймагæн дæр бар ис, æмæ балæууа иу кæнæ иннæ кандидатурæйы фарсмæ. Фæлæ къордыл дзырд куы цæуа, уæд уый нысан кæны, æмæ æгас организацийы архайдыл цæуы дзырд. Афтæмæй та нæ бæстæйы десантон æфсады службæйы ветерантæн уый фæдыл ис бынтон цæхгæр хъуыды», – дзырдта организацийы къухдариуæггæнæг.
Уæлдæфон – десантон къорды уæнг Куымæридтаты Таймураз стыр æнæразыдзинад равдыста ацы хъуыддаджы фæдыл, уымæн æмæ организацийы номæй ахæм митæ кæнын раст нæу. Цыппар адæймаджы фæндон уый нæ нысан кæны, æмæ, зæгъгæ, мах не ‘ппæтдæр уыцы хъуыдыйы фарс стæм. Уымæ гæсгæ раст нæу æгас десантон организацийы номæй ахæм æнæраст инфомаци дæттын.
Организацийы æндæр уæнг Уанеты Альберты хъуыдымæ гæсгæ ахæм зыгъуыммæгæнджыты хъæуы бæрндзинадмæ æркæнын, ахæм æнæраст информаци чи дæтты æмæ десантон æфсады ветеранты номæй зыгъуыммæ информаци чи дæтты.
«Мах никæй бабæрнджын кодтам, цæмæй нæ организацийы номæй цавæрдæр информацитæ мыхуыр кæной интернеты тыгъдады. Науæд та сæ ном æмæ мыггæгтæ дæр бафыссæт мыхуыргонд уацы бын», – ахæм фæндон та бахаста Шауердаты Реуаз.
Иумиагæй сисгæйæ та, зæгъгæ, алы адæймагæн дæр йæхи бар у, æвзæрстыты кæй кандидатурæйы фарс лæууы, уый.
Организацийы æндæр минæвæрттæ дæр равдыстой сæ фæндондзинад, кæй лæууынц сæ орга-низацийы уæнг, архайæг Президент Бибылты Анатолийы кандидатурæйы фарс.
Организацийы сæргълæууæг Джиоты Азим йæ ныхас дарддæргæнгæйæ банысан кодта, зæгъгæ, ивгъуыд аз организацийы уæнгтæй цыппар адæймаджы сæхи сæрмагонд амбициты тыххæй ахицæн сты Уæлдæфон – десантон æфсады ветеранты цæдисæй. Фæлæ уый нæ нысан кæны, æмæ æмткæй æхсæнад зыгъуыммæ кæнæм.
Иумиагæй сисгæйæ ацы организаци уæвынад кæны 2017 азæй фæстæмæ. Организацийы сырæзты агъоммæ дæр раздæры «æрвгъуыз береттæ» хæсджытæ кæрæдзи фарсмæ лæууыдысты æмæ иу алы бæрæгбон дæр 2 августы æрæм-бырд сты æмæ нысан кодтой сæ бæрæгбон.
Ацы æфсады службæгæнджытæн æнæивгæйæ баззад сæ тых, ныфсхастдзинад, адæмыл æнувыддзинад. Сæрыстыр сты, кæй службæ кодтой ацы æфсады рæнхъыты æмæ уыцы сæрыстырдзинад хæссынц сæ царды æрвылбон дæр, цæрынц ахæм принципмæ гæсгæ – «Никто кроме нас!».
КЪÆБУЛТЫ Маринæ
Comments are closed, but trackbacks and pingbacks are open.