Ацы къуырийы кæрон махмæ æнхъæлмæ кæсынц, нæ адæмы царды ахсджиаг нысаниуæг кæмæн ис, ахæм дыууæ цауы ирон адæмы 10-æм съезд æмæ Уæрæсейы Федераци Республикæ Хуссар Ирыстоны паддзахадон хæдбардзинад кæй банымадта, ууыл 10 азы сæххæсты бон. Афтæ æрхауд æмæ дыууæ цауы дæр баст сты нымæц дæсимæ æмæ уый дæр зæрдылдаринаг у.
25 августы уал нæ республикæйы сæйраг горæтмæ æрцæудзысты нæ адæмы минæвæрттæ æрмæст Цæгат Ирыстон-Аланийæ нæ, фæлæ Уæрæсейы, дунейы бирæ бæстæты цæрæг ирæтты минæвæрттæ дæр. Æппæтирон адæмон æхсæнадон змæлд «Стыр Ныхас»-ы Хуссар Ирыстоны хайады сæрдар Гаглойты Роберт куыд зæгъы, афтæмæй æнхъæлмæ кастæуы 600 уазæгæй фылдæрмæ. Съезды делегаттæ уыдзысты 500 адæймаджы. Æрмæст Цæгат Ирыстонæй нæм æрцæудзæнис 300 адæймаджы. Цæгатирыстойнаг дзыллон информацийы фæрæзтæй та æрцæудзысты 20 журналисты.
Банысан кæнын хъæуы уый, æмæ ирон адæмы съезд фыццаг хатт уагъд кæй цæуы Хуссар Ирыстоны. Гаглойты Роберты ныхæстæм гæсгæ съезды сæйраджыдæр, дзырд цæудзæнис Ирыстоны цæгат æмæ хуссары иудзинады фарстыл. Афтæ ма уынаффæ цæудзæнис нæ традицитæ æмæ удварн сæндидзын кæныныл, нæ адæмы æнгомдзинады фарстатыл.
Стыр æхсызгонæй банысан кæнын хъæуы уый, æмæ ирон адæмы 10-æм съезд йæ куыст кæй кæндзæн Хетæгкаты Къостайы номыл Хуссар Ирыстоны паддзахадон драмон театры ногарæзт бæстыхайы. Уый цытджын æгъдауæй байгом абон – 23 августы. Уæдæ фыццаг йæ къæсæрæй чи бахиза, уыдон уыдзысты съезды делегаттæ æмæ сын нæ цæст уарзы æнтысгæ куыст нæ адæмы хæрзиуæгæн.
Comments are closed, but trackbacks and pingbacks are open.