Куыд æрвылаз, афтæ та ацы аз дæр рафыстон газет «Хурзæрин». Йæ алы номырмæ дæр ын фенхъæлмæ кæсын цымыдисæй, ног хабæрттæ базонынмæ. Æмæ йæ мæ посты асыккæй куы сисын, уæд мыл цыма, æцæгæйдæр, хурзæрины хъарм тынтæ атыхсынц, ахæм хъарм уылæн бахизы мæ зæрдæмæ æмæ æнæмæнг мæ мидбыл бахудын.
Мæнмæ тынг хъыг кæсы, адæмæн кæй дзурынц, цæмæй ирон газет рафыссой, уый. Диссаг у, дæхи ирон куы хонай, ирон мыггаг куы хæссай, уæд дын исчи куыд хъуамæ зæгъа, ирон газет рафысс. Уымæй дæр, йæ адæмæн йæ рацыдæй фæстæмæ стыр лæггад чи бакодта, уыцы иунæг ирон газет. Хæрз чысылæй, 6-æм къласы ма куы ахуыр кодтон, уæд базыдтон ирон периодикон мыхуыры ад æмæ уæдæй фæстæмæ æнæ ирон газет мæ бон цæрын нæу.
Мæ мад æмæ мæ фыд ахуыргæнджытæ уыдысты, Зары хъæуы цардысты æмæ нæ хъуыды кæнын ахæм бон, постхæссæг нæм ирон газет не ‘рбахаста. Кæд-иу кæддæр чысыл бафæстиат, уæддæр-иу æрхъæцмæ нал лæууыдыстæм. Æмæ канд мæ ныййарджытæ нæ фыстой газет, фæлæ æгас хъæу-бæстæ дæр. Æмæ алкæмæн дæр циндзинад хаста. Раст у, ныр интернеты алцы дæр вæййы бакæсæн, фæлæ раст, æцæг ныхас, æрмæстдæр газеты фæрстыл ис бакæсæн. Интернеты раст ныхас арæх нæ фехъусдзынæ. Уым фылдæр кæнынц дам-думтæ, кæрæдзийыл цъыфкалæн. Уымæ гæсгæ нæ уарзын интернетмæ бахизын. Куы бахизай, уæд та дыл бафтдзæн æрхæн-дæгдзинад, фехъусæн дзы вæййы, бауырнæн кæмæн нæ вæййы, ахæм хъуыддæгтæ. Нæ паддзахадон университеты куы ахуыр кодтон, уæд та газет алы студент дæр хъуамæ истаид, уый уыд æнæмæнгхъæуæг, уымæн æмæ уый у мадæлон æвзаджы æвдисæндартæй сæ иу. Æмæ йæ студент уæвгæйæ кæд мæхæдæг дæр истон, уæд дæр-иу мæ мады зæрдæмæ цы æрмæджытæ фæцыдысты, уыдон-иу нывæрдта æмæ-иу нын сæ нæ разы æрæвæрдта, бакæсут ма, сæ, зæгъгæ. Æмæ-иу кæд мæнæн газет каст уыдис, уæддæр-иу мын æхсызгон уыдис мæ мады ныхас.
Ныртæккæ дæр канд ирон газет нæ кæсын, фæлæ иннæ газеттæ дæр. Фæлæ уæддæр фыццаг мæ къухмæ райсын, мæ зæрдæ йæ иу фендæй дæр кæмæй ныррухс вæййы, уыцы «Хурзæрин»-ы.
Ныртæккæйы рæстæджы материалон æгъдауæй бирæтæ цыбыркъух кæй сты, алы къапекк дæр сæм нымады кæй ис, уымæ нæ кæсгæйæ æз сидын не ‘мбæстæгтæм, цæмæй алы ирон хæдзар дæр рафысса ирон газет. Уый у не ‘мбæстагон хæс, нæ нацийы цæсгомыл дзурæг. Бирæтæ фæзæ-гъынц, зын мын у иронау кæсын. Ахæмтæн та мæ ныхас у: уый у стыр худинаг. Кæд дæхи нæ уарзыс, уæд куыд бауарздзынæ искæй.
Уадз, газет «Хурзæрин» алы ирон хæдзармæ дæр хæсса æрдзон хурау йæ хъарм. Кæд нæхи ирæттæ хонæм, аланты фæдонтæ, уæд нæ алчи дæр хъуамæ тыхса, цæмæй ирон æвзаг, ирон фарн æмæ ирон æгъдау ма фæцудой, ууыл, цæмæй иннæ стыр нациты æхсæн ма батайæм. Æмæ уый тыххæй та фыццаг рады мах хъуамæ фæста-гæттæн бахъахъхъæнæм æмæ бавæ-рæм не стырдæр хæзна – не ‘взаг. Уыцы хъуыддагæн та саразæн нæй, ирон периодикон мыхуыр нæ хæдзæрттæм куынæ хæццæ кæна, нæ кæстæртæ йыл чысылæй куынæ цайдагъ кæной, уæд.
Цхуырбаты Луизæ,
6-æм скъолайы ирон
æвзаджы ахуыргæнæг
Comments are closed, but trackbacks and pingbacks are open.