22-æм июны Хуссар Ирыстоны паддзахадон университеты фембæлдысты Уæрæсейы Федералон таможнæйон службæйы фитосанитарон минæвæрттæ Александр Поповы сæргълæудæй æмæ РХИ-йы Паддзахадон таможнæйы управленийы сæргълæууæг Цхуырбаты Мурат. Фембæлды ма хайад истой Хуссар Ирыстоны амалиуæггæнджытæй таможнæйыл хизгæйæ цæлхдуртыл чи сæмбæлы, уыдоны минæвæрттæ дæр. Фембæлды организатор уыд нæ республикæйы Базарадон-сæудæджерадон палатæйы сæргълæууæг Æлборты Алан.
Куыд зонæм, афтæмæй хуссарирыстойнаг амалиуæггæнджытæ Дæллаг Зæрæмæджы таможнæйон пункты æвзарынц зындзинæдтæ. Республикæйæн æддейæ амалиуæггæнджытæ цы хæлцадон продукттæ æмæ товартæ балхæнынц реализацийы тыххæй, уыдонæн декларацийы домæнмæ вæййы алыгъуызон претензитæ. Сæ машинæтæ суткæгай фæлæууынц таможнæйон пункты. Ахæм проблемæтæ уыдис раздæр азты дæр. Фæлæ Евроазиаг цæдисы нормæтæ æмæ домæнтæм куы ахызт Хуссар Ирыстон, уæд дзæвгар фæзындæр уыцы процедурæ.
Фембæлд хаста кусæгон характер æмæ дистанцион форматы телемостмæ рахызтысты Цæгат Ирыстон-Аланийы таможнæйон управленийы ФТС-йы къухдариуæггæнæг Александр Струпников æмæ Санкт-Петербур-джы «БТК-ГРУПП»-ы минæвæрттæ дæр.
Уыдон дзырдтой, «БТК-4»-мæ продукци ласыны рæстæджы цы зындзинæдтыл æмбæлынц. Уæргъты консолидацийæн сæ цы фæткойтæ фæдомынц æмæ сын æппæт номенклатурæйæн баиу кæныны фадат куыд нæ фæдæттынц. Кæй сын нæй иумæйаг деклараци байдзаг кæныны фадат. Ацы фарстаты фæдыл Цæгат Ирыстоны ФТС-йы таможнæйон службæйы минæвар бамбарын кодта Евразиаг цæдисы нормæтæ хъахъхъæнын кæй хъæуы: «Уæрæсейы Федерацийы территорийыл æлхæд продукци фидар хъуамæ цæуа иу юридикон цæсгомыл, кæцы кусдзæн консолидацийыл, ома, организаци кæндзæн продуктты оптон ифтонгад», – дзырдта уый.Уый ма банысан кодта ныртæккæ амалиуæггæнджытæ уæрæсейаг базæртты кæй балхæнынц чысылнымæц, фæлæ уæрæх ассортимент продукттæ. Уымæ гæсгæ, дам, уый къуылымпы кæны таможнæйы сæрты ахизыны процедурæ.
Базарадон-сæудæджерадон палатæйы сæргълæууæг Æлборты Алан бахатыд дыууæ таможнæ-йы сæргълæуджытæм, цæмæй аскъуыддзаг кæной фарст.
Александр Поповы хъуыдымæ гæсгæ, цæмæй фарст закъоны фæлгæтты скъуыддзаг æрцæуа, уый тыххæй хъæуы канд таможнæйон фæндон нæ, фæлæ УФ Цæгат Ирыстоны-Алани æмæ РХИ-йы профилон министрадтæ æмæ ведомствоты хайадист дæр.
Хуссар Ирыстоны паддзахадон Таможнæйон управленийы сæргълæууæг Цхуырбаты Мураты хъуыдымæ гæсгæ ацы вариант у иунæг раст. Фæлæ, таможнæйыл хизгæйæ æмбæлон процедурæтæн аивæн нæй амалиуæг хъуамæ деклараци кæна йæ базайрæгтæ. Æмбырды куысты не ‘мбæстæгтæ амалиуæггæнджытæй хайад чи иста, уыдонæй сæ иу Уалыты Альберт кафе «Винченцо»-йы сæргълæууæг, радзырдта: «Æрæджы УФ-йæ рацæугæйæ мæ бинонтæн балхæдтон чысылнымæц хæлцадон продукттæ, фæлæ таможнæйы кусджытæ уыдонæн дæр домдтой гæххæттытæ байдзаг кæнын. Уыцы фæтк адæммæ æвзæрын кæны æнæразыдзинад. Фарстатæ сæм куы вæййы, уæд та нæ разыны, конкретонæй чи дзуапп кæна, ахæм адæймаг».
Амалиуæггæнджытæн бамбарын кодтой брокерон лæггæдтæй пайда кæнын кæй нæ хъæуы. Таможнæйы уагæвæрдмæ гæсгæ 263 номыры декларацийæн ис хуымæтæггонд вариант. Æмæ уымæ гæсгæ балæвæрд куырдиат байдзаг кæнынæн та хъуамæ æххуыс кæной таможнæйы кусджытæ. «Амалиуæггæнæг цы гæххæтт хъуамæ бадæтта, уым фæнысан кæнын хъæуы, кæм æрцыд æмæ цы аргъæй балхæдта товар. Гæххæттытæй иу зайы таможнæйы, иннæ та амалиуæггæнæгæн йæхимæ. Уыцы процедурæйæн фидын нæ хъæуы. Хуыздæр у уæхæдæг куы сахуыр уаиккат æмæ уæд брокеры æххуысы сæр дæр нал хъæудзæнис», – загъта Александр Попов.
Цхуырбаты Мурат дæр бамбарын кодта, зæгъгæ, дæллаг Зæрæмæджы таможнæйы УФ коллегæтимæ иумæ бадынц Хуссар Ирыстоны таможнæйы управленийы службæгæнджытæ дæр. Уыдон кæддæриддæр цæттæ сты баххуыс кæнынмæ. Кæд æмæ гæххæттытæ сæ уагыл уой, уæд.
Амалиуæггæнджыты иудзинады сæрдар Ды-гъуызты Виссарион æмбырды бадджыты æргом аздæхта, адæм æмæ бирæ амалиуæггæнджытæ дæр æххæстæй кæй нæма æмбарынц 2023 азы январы мæймæ Евразиаг цæдисмæ ахизыны фæстиуæгæн таможнæйон службæйы цы ногдзинæдтæ арæзт æрцыд, уыдонимæ. «Сымах зæгъут, зæгъгæ, ис хуымæтæггонд вариант, деклараци байдзаг кæнынæн. Фæлæ махмæ нæй уый тыххæй информаци. Цæмæннæ йæ хъусын кæнут бынæттон информацийы фæрæзты руаджы?», – дзырдта Дыгъуызты фырт.
Индивидуалон амалиуæггæнæг Бететы Юри та фæндон бахаста, цæмæй социалон хызæгты æрбайгом кæной къорд. Цыран амалиуæггæнджытæн хъусын кæндзысты рæстæгæй-рæстæгмæ таможнæйон службæйы цы ногдзинæдтæ фæзыны, уый тыххæй. Уый, дам, ахъаз уыдзæн æрыгон амалиуæггæнджытæн дæр æмæ нал зивæг кæндзысты товар ласынмæ, ныхдуртыл фембæлды тасæй. Фæлтæрдджынтæ та, дам, сын амондзысты кусын.
УФ ФТС-йы къухдариуæггæнæг хуыздæрыл банымадта, цæмæй бынæттон амалиуæггæнджытæ бæлвырд информаци базонынмæ цæуой РХИ-йы Сæйраг таможнæйон управленимæ, науæд та Базарадон-сæудæджерадон палатæмæ. Цхуырбаты Муратæн та бахæс кодта, цæмæй конкретон информаци хæццæ кæна йæ пресс-службæйы фæрцы æхсæнадмæ.
УАЗÆГТЫ Марфæ
