Хицауады Сæрдар Джуссойты Константин фембæлд Уæрæсейы Федерацийæ хæххон æрзæткъахæн къабазы специалистты къордимæ, кæцытимæ æруынаффæ кодта Хуссар Ирыстоны хæххон æрзæткъахæн куыстуæтты сæндидзын кæныны фарстатыл, минералон-хомысон базæйы рæзтыл æмæ æмгуысткæнынады гæнæуæвæн формæтыл.
Фембæлды ма хайад райстой РХИ-йы Геологи, экологи æмæ æрдзæй пайда кæныны комитеты минæвæрттæ.
Уазджытæн æгасцу зæгъгæйæ Джуссойты Константин банысан кодта, президент Гаглойты Аланы бахæсмæ гæсгæ хицауад кæй кусы республикæйы хæххон æрзæткъахæн къабазы рæзты фарстатыл, æргом у æмгуысткæнынадмæ æмæ цæттæ у зæххы хъæздыгдзинæдтæй пайда кæныны къабазы проекттæм æркæсынмæ.
«Хæххон сæудæджерад ног уавæрты гæнæн ис суа Хуссар Ирыстоны экономикæйы рæзты рахæцæн, сараза æнæмæнгхъæуæг разæууæлтæ республикæйы комплексон рæзтæн. Мах цæттæ стæм æгуысткæнынадмæ æмæ махæй цы кæнгæ уа, уый сараздзыстæм, цæмæй æндидзыд æрцæуа ацы къабаз æмæ бындур æвæрд æрцæуа дардрæстæгон перспективæйы зæххы хъæздыгдзинæдтæй пайда кæныны къабазы фидар рæзтæн, уымæн æмæ ацы къабазы æфтиæгтæм тагъд æнхъæлмæ кæсæн нæй», – банысан кодта уый æмæ ма йæ ныхасмæ бафтыдта, зæгъгæ, дзырд цæуы Къуайсайы хæххон-хъæздыггæнæн комбинаты сæндидзын кæныныл, кæцы йæ рæстæджы уыд, бюджет арæзт кæмæй цыд, ахæм кондадыл.
Уæрæсейаг специалистты къорды къухдариуæггæнæг, гом акционерон æхсæнад «Алмазинтех»-ы генералон директор Валерий Кондратьев йæ рады банысан кодта, зæгъгæ, йæ компани цæттæ у æппæт йæ фæлтæрддзинад æмæ зонындзинæдтæй Хуссар Ирыстоны хæххон æрзæткъахæн къабазы рæзты спайда кæнынмæ.
Банысан кæнын хъæуы уый æмæ «Алмазинтех» дыууын азæй фылдæр кæй кусы Уæрæсе æмæ фæсарæйнаг бæстæты хæххон проекттæ реализаци кæныныл, æмгуыст кæны Цæгат Кавказы хæххон-металлургион университетимæ, Уæрæсейы Федерацийы сæйрагдæр хæххон æрзæткъахæн куыстуæттæ æмæ сервисон компанитимæ.
Фембæлды хайадисæг, Хицауады Сæрдары хæдивæг – экономикон рæзты министр Тадтаты Дзамболат æрæмбырдуæвджыты хъусдард аздæхта, уынаффæ цы темæйыл цыд, уымæн йæ экологион хаймæ.
«Зæххы хъæздыгдзинæдтæй пайда кæныны рæзты программæйы тыххæй ныхас кæнгæйæ, махæн иттæг ахсджиаг у, цæмæй бахъахъхъæнæм хæххон æрзæткъахæн кондады экологи æмæ экономикæйы ‘хсæн баланс», – банысан кодта вице-премьер.
Фембæлды рæстæджы куыд банысанчындæуыд, афтæмæй хæххон æрзæткъахæн къабаз сæндидзын кæныны фарстмæ хъæуы бацæуын системон æгъдауæй. Рæзты программæ хъуамæ план цæуа дыууын фондз азмæ æмæ йæм хъуамæ бацæуой ахæм пункттæ, кæцытæ хауынц æрмæст раздæр архайæг кондадтæ сæндидзын кæнынмæ нæ, фæлæ къахгæ хъæздыгдзинæдты рабæрæггонд фæсауæрцтæ геологион æгъдауæй сахуыр кæнынмæ, се сгарæн куыстытæ æххæст кæнын æмæ сæ паддзахадон балансыл сæвæрынмæ.
Программæйы ахсджиаг хай хъуамæ суа къабазæн бынæттон цæрджытæй кадртæ бацæттæ кæныны фæдыл куыст æмæ нын уым та хъуамæ баххуыс кæна Цæгат Кавказы хæххон-металлургион университет.
Фембæлды ма Уæрæсейы фарсæрдыгæй хайад райстой Цæгат Кавказы хæххон-металлургион институты ректор Игорь Алексеев, кондадон акционерон æхсæнад «Русолово»-йы президент Евгени Колесов æмæ гом акционерон æхсæнад «Алмазинтех»-ы генералон директоры хæдивæг Сергей Безбородов.
Хуссар Ирыстоны фарсæрдыгæй та – Геологи, экологи æмæ æрдзæй пайда кæныны комитеты сæрдары хæдивæг Харебаты Алан æмæ ацы комитеты геологи æмæ зæххы хъæздыгдзинæдтæй пайда кæныны управленийы хистæр Кочысаты Роксанæ.
Цхинвалы уæрæсейаг специалистты уæвыны программæйы ма сты Къуайсайы зды-цинчы æрзæтгуырæнтæм бацæуын æмæ бынæттон специалисттимæ фембæлын, кæцыйы рæстæджы уынаффæ цæудзæн республикæйы хæххон æрзæткъахæн къабазы рæзты фæдыл фæндагон картæйыл.
