Рæхджы та нæ республикæйы 11-æм кълæсты ахуыргæнинæгтæн айзæлдзысты фæстаг дзæн-гæрæджы зæлтæ. Ацы ахсджиаг æмæ зæрдылдаринаг бонмæ сæхи зæрдиагæй цæттæ кæнынц Цхинвалы районы ахуырады кусджытæ, скъолаты ахуыргæнджытæ æмæ ахуыргæнинæгтæ. Ахуыргæнæн уагдæтты кусынц, æвзонг фæлтæры зонындзинæдтæй схотыхджын кæныныл æппынæдзух чи архайы, нæ сомбоны цардаразджыты ахуыры фæндагыл чи æфтауы, ахæм æвзыгъд æмæ фæлтæрд ахуыргæнджытæ.
Уæлдай фылдæр бæрндзинад ахуыры азы дæргъы æнкъардтой, рауагъдон кълæстимæ чи куыста, уыдон æмæ сæ æфтыдтой ахуыр æмæ царды раст фæндагыл. Районы ахуырады хайады хистæр Козаты Олег куыд банысан кодта, уымæ гæсгæ ацы аз Бихъар, Гром, Дменис, Сатихъар, Зар æмæ Къостайыхъæуы астæуккаг скъолаты 25 майы иуæндæсæмкъласонтæн айзæлдзысты скъолайы фæстаг дзæнгæрæджы зæлтæ. Цытджын линейкæйы сын арфæйы ныхæстæ ракæндзысты сæ хъомылгæнджытæ, райдиан кълæсты сæ фыццаг ахуыргæнджытæ, сæ номыл айзæлдзысты зарджытæ æмæ кæфтытæ. Сæхи рады къæмдзæстыгæй нæ баззайдзысты сæхæдæг дæр æмæ сæ ахуыргæнджытæн ракæндзысты арфæйы ныхæстæ, 11 азы дæргъы сын сæ ахуыр æмæ хъомыладон куыстыл кæй тыхстысты, царды раст фæндагыл сæ кæй æфтыдтой, уый тыххæй. Фыццаг фæлварæнтæ уыдзысты уырыссаг æвзаг æмæ литературæйæ 3 июны.
Хуыбиаты Никъала
