Майрæмбоны, 8-æм декабры уыд Парламенты сесси. Боны фæткы фарстатæй иу уыд «2023 азы паддзахадон бюджетмæ ивындзинæдтæ бахæссыны тыххæй» закъоны проект.
Уынаффæмæ йæ рахаста Бюджет æмæ хъалонты фæдыл парламентон комитеты сæрдар Джиоты Еленæ.
Уый банысан кодта, зæгъгæ, ивындзинæдтæ баст сты, 2020 азы финансон æххуысæй ма цы 12 милуан сомы баззад, уыдон адихтæ кæнын æмæ сæ хосгæнæн фæрæзтæ, медицинон æрмæджытæ æмæ COVID-19 æмæ пневмонийæ рынчынтæн амбулаторон æгъдауæй хос кæнынимæ.
Йæ ныхæстæм гæсгæ, æфтиæгтæ иумиагæй сты 9 миллиард 95,6 милуан сомы, хæрдзтæ нæ фæивтой æмæ уыдон та сты 9 миллиард 629 милуан сомы. Бюджеты дефицит у 534 милуан сомы.
Ацы закъоны проекты депутаттæ сфидар кодтой хъæлæсæппæрсты фæстиуæгæн. ***
Джиоты Еленæ ма уынаффæмæ раразмæ кодта «2024 азы РХИ-йы паддзахадон бюджеты тыххæй» закъоны проект дæр.
Куыд банысан кодта, афтæмæй фидæн азы паддзахадон бюджеты æфтиагон хай проекты нысан æрцыд 8.835.776,93 мин сомæй. Уыдонæй 5.942.247,16 мин сомы сты Хуссар Ирыстоны социалон-экономикон рæзты тыххæй, 1.093.500,00 мин сомы та – Хуссар Ирыстоны социалон-экономикон рæзтæн ахъазгæнæг инвестицион программæйы фæлгæтты бюджетон инвестициты æххæст кæнынæн.
Джиоты Еленæйы ныхæстæм гæсгæ, бюджеты дефицит у 305 милуан сомы.
Хъæлæсæппæрсты фæстиуæгæн депутаттæ райстой закъоны проект.
***
Бюджет æмæ хъалонты фæдыл парламентон комитеты сæрдар ма раразмæ кодта РХИ-йы 2024 азæн РХИ-йы Социалон фонды бюджет дæр.
Уый куыд радзырдта, афтæмæй фидæн аз Социалон фонды иумæйаг æфтиаг уыдзæн 895 милуан 205 мин сомы. Уыдонæй 551 милуан 321 мин сомы сты куыстæй ифтонггæнджыты æнæмæнгхъæуæг пенсион фæдзæхстады тыххæй фæдзæхсты фиддонтæ, 55 милуан 132 мин сомы – куыстмыздтæй ахынцыдгонд фæдзæхсты фиддонтæ, 158 милуаны – рæстæгмæ æнæкуыстхъом æмæ маддзинадимæ баст æнæ куыстхъомдзинады тыххæй æнæмæнгхъæуæг социалон фæдзæхсты фиддонтæ.
Хъæлæсæппæрсты фæстиуæгæн фидар æрцыд 2024 азæн социалон фонды бюджет дæр.
***
Депутаттæ сфидар кодтой 2024 азы социалон-экономикон рæзты пълан.
Уынаффæмæ йæ рахаста Экономикæ, чысыл амалиуæгад æмæ хъæууон хæдзарады фæдыл парламентон комитеты сæрдар Тъехты Алан.
Уый банысан кодта, зæгъгæ, план здæхт у республикæйы социалон-экономикон рæзты фыццаградон хæслæвæрдтæ скъуыддзаг кæнынмæ, районты социалон рæзтмæ, цæмæй хъæутæ ма æдзæрæг кæной, уый тыххæй цæрджытæн æмбæлон уавæртæ аразынмæ.
«Пълан арæзт æрцыд 2030 азы онг Хуссар Ирыстоны социалон-экономикон рæзты стратегийы нысанмæ гæсгæ», – банысан кодта Тъехты Алан.
Уый ма уынаффæмæ рахаста 2024 азы социалон-экономикон рæзты прогнозтæ дæр.
Депутат куыд бамбарын кодта, афтæмæй прогнозы сæйраг параметртæ арæзт æрцыдысты паддзахады экономикон политикæйы ориентиртæ æмæ приоритеттæм гæсгæ, республикæйы социалон-экономикон рæзты хатдзæгтæ бахынцгæйæ.
Нæ уацх.
