Кæсæг-Балхъары Эльбрусы хохы цур уагъд æрцыдысты 14 азы онг кæуыл цæуы, уыцы спортсменты ‘хсæн ерыстæ стъолы теннисæй «Будущее России», зæгъгæ. Ерысты хайад райстой Цæгат Кавказы Федералон зылды 16 иууыл цæттæдæр æвзонг теннисисты. Уыдон ‘хсæн уыдысты хуссарирыстойнаг спортсменкæтæ Тедеты Алинæ, Майя Касрадзе æмæ Къуылыхты Зæринæ. Турнир цыд къуырийы дæргъы. Йæ фæстиуджытæм гæсгæ нæ спортсменкæтæ бахаудтой 10 иууыл хуыздæр теннисисткæты нымæцмæ. Уыдонæн ма хъæзтыты фæстæ та уагъд цыдысты тренировкæтæ. Турниры кæронбæттæн та сын бакодтой лæвæрттæ. Тедеты Алинæ æмæ Майя Касрадзейы цæттæ кæнынц Джиоты Мириан æмæ Уалыты Иринæ. Чызджытæ ахуыр кæнынц Цхинвалы скъола-интернаты. Къуылыхты Зæринæ та ахуыр кæны гимназ «Альбион»-ы. Йæ тренер у Остъаты Лидия.
БОКС
Хуссарирыстойнаг боксер Коцты Давид дыккаг бынат бацахста Профцæдисты физкультурон-спортивон æхсæнад «Россия»-йы централон советы чемпионаты. Ерыстæ уагъд цыдысты Уæрæсейы хъайтар Канамат Баташевы номарынæн. Тренер Куымæридтаты Родионы хъомылгæнинаг архайдта 80 кг уæзы категорийы. Уый финалмæ цæугæйæ фæуæлахиз дыууæ ныхмæлæууæгыл.
ХУРИТЫ Батрадз
