Хуссар Ирыстоны Паддзахадон статистикон управлени у иууыл рагондæр паддзахадон структурæтæй сæ иу. Æххæст кæны вазыгджындæр хæстæ – республикæйы министрадтæ, уагдæттæ, организацитæй æмбырд æмæ бæстон кæны статистикон информаци.
Æрвылаз дæр Статистикон управленийы службæ цы æрмæг æрæмбырд кæны цæрджыты тыххæй – царды æмвæзад æмæ куыстифтонгады фæдыл, экономикæйы, æнæниздзинад хъахъхъæнын, арæзтад æмæ æндæр фадгуыты, уыдонæй æрвылаз дæр мыхуыр æрцæуы хицæн бæрæгуат. Фæстаг рæстæджы Хуссар Ирыстоны æрæмбырдгонд статистикон информацийæн ис ныфсæвæрæн фæстиуджытæ.
Хуссар Ирыстоны Информаци æмæ мыхуыры паддзахадон комитеты сæрдар Хъотайты Марияимæ информацион агентад «Спутник»-ы пресс-центры брифинджы рæстæджы йæ куысты фæстиуджытыл дзырдта Статистикон управленийы сæргълæууæг Тыбылты Инал.
«Нæ куысты нысан у, цæмæй агурæм ног фæдыздæхтытæ. Фæстаг авд азы пайда кæнæм 50 фылдæр хыгъдон статистикон формæйæ. Планы нын хаст ис, ацы аз апрелы мæйæ фæстæмæ нæ хъус кæй дардзыстæм продукттæ æмæ æндæр æнæмæнгхъæуæг товарты æргътæм», – дзырдта уый.
Куыд радзырдта, уымæ гæсгæ управлени уагдæттæй æмбырд кæны зонæнтæ. Уыцы æрæмбырдгонд информацийыл куыст цæуы æмæ уый фæстæ сæрмагонд бæрæгуатæй уагъд æрцæуы. Уыдонæй экземпляртæ лæвæрд цæуынц министрадтæ æмæ профилон органтæм, кæцытæ сæ пайда кæнынц сæ куыст æмæ архайды.
«Ацы иумиаг бæрæгуаты æнæ-мæнгхъæуындзинад у ахадæн – зæгъæм, информацион фæрæзтæн, уымæн æмæ æнæ уыдонæй æнцонвадат нæ уыдзæн сæ куыст», – дзырдта Инал.
Куыд банысан кодта, уымæ гæсгæ, фæстаг азты статистикон бæрæггæнæнты фылдæр хай фадат дæттынц оптимистон фæстиуджытæ аразынæн.
Тыбылты Инал куысты сæйраг проблемæйыл нымайы иуæй-иу организациты мæгуырау хыгъдон дисциплинæ. Йæ ныхæстæм гæсгæ бирæ организацитæ æрæгмæ æрбавдисынц статистикон хыгъдтæ. Æмæ уый та бæрæгуат мыхуыр кæныны рæстæг фæстæ кæны.
«Ис ахæм структурæтæ, кæцытæ бæрнон ахаст дарынц ацы фарстмæ, сæхæдæг рæстæгыл æрбарвитынц æппæт хъæуæг информаци. Вæййы иннæрдæм дæр – нæ кусджытæ организацитæй æппынæдзух фæдомынц æмæ сын зæрдыл лæууын кæнынц, бæрæггæнæнтæ æрбавдисын кæй хъæуы », – банысан кодта уый.
Уымæй дарддæр Статистикон управленийы чысылнымæц кусджыты уæхсчытыл ис уæззау уаргъ информаци æмбырд кæныны хъуыддаджы.
«Зонæнты гуырахст рæзы, фæлæ кусджыты нымæц та у бæрæг къаддæр. Ис нæм ахæм ветерантæ, кæцытæ кусынц 40-48 азтæ», – загъта уый.
Статистикон управлени, Иналы ныхæс-тæм гæсгæ, æдзух кусы йæ методтæ æмæ авналæнтæ ног кæныныл. Уыцы хъуыддаджы управленийы фарс æдзух лæууынц УФ-йы Росстатæй сæ коллегæтæ. Уыдон фæлтæрддзинад стыр у. Делегацитæ æрцæуы уырдыгæй, æмæ сæ куысты фæлтæрддзинад дих кæнынц хуссарирыстойнаг коллегæтимæ. Се ‘хсæн ис æм-гуыстады фæдыл бадзырд арæзт.
Уымæй дарддæр ма Инал банысан кодта, Паддзахадон статистикон управлени Цæгат Ирыстон æмæ Абхазы йæ коллегæтимæ кæй кæны æнгом архайд.
Хуссар Ирыстоны Статистикон управленийæн, йæ сæргълæууæджы ныхæстæм гæсгæ, тагъд скусдзæн ног официалон портал, цыран бакæсæн уыдзæн статистикон бæрæгуаттæ æмæ управленийы архайды ног хабæрттæ.
КЪÆБУЛТЫ Маринæ
Comments are closed, but trackbacks and pingbacks are open.