Паддзахадон телерадиокомпани «Ир»-ы бæстыхайы байгом нога-зон хæрзаудæн акци «Мæ ногазон бæллиц».
Проект бацæттæ кодтой РХИ-йы Президенты Администраци æмæ паддзахадон телерадиокомпани «Ир». Уырдæм æрбацыдысты Республикæ Хуссар Ирыстоны Президент Гаглойты Алан, Хицауады Сæрдар Джуссойты Константин хицауады бæрнон кусджытимæ. Проекты хайад райстой Дзауы районы æмæ горæт Цхинвалы скъола-интернатты æмæ Ленингоры районы сывæллæтты хæдзары хъомылгæнинæгтæ.
Сывæллæттæ Митын Дадамæ сæ бæллицтæ фыстæджыты ныффыстой æмæ сæ æрцауыгътой рæсугъд фæлыст назбæласыл. Хæрзаудæн проект ист цæудзæн ПТРК «Ир»-ы бæстыхайы. Президент Гаглойты Алан йæхæдæг республикæйы скъола-интернатты хъомылгæнинæгтæй фондз сывæллонæн сæххæст кæндзæн сæ ногазон бæллицтæ. «Сывæллæтты æппæт бæллицтæ дæр æххæст æрцæудзысты. Ног азы къæсæрыл се ‘ппæт дæр райсдзысты сæ ногазон лæвæрттæ», – банысан кодта Гаглойты Алан.
Паддзахады сæргълæууæг куыд загъта, афтæмæй йæхæдæг дæр, чысыл ма куы уыд, уæд Митын Дадамæ фыста фыстæджытæ æмæ æууæндыд ногазон диссæгтыл. «Æрмæст æз нæ, фæлæ алкæцы сывæллон дæр чысылæй Ног азы къæсæрыл Митын Дадамæ фыста фыстæджытæ. Ног азы изæр нын-иу нæ ныййарджытæ сусæгæй назбæласы бын бавæрдтой лæвæрттæ. Мах уырныдта, нæ фыстæджытæ Митын Дадамæ кæй фæхæццæ сты æмæ нын лæвæрттæ уый кæй æрбахаста», – загъта Президент.
Нæ бæстæйы сæргълæууæг рæсугъдвæлыст назбæласæй цы фыстæджытæ райста, уым сывæллæттæ Митын Дадайæ курынц велосипед, смартфон, хъарм ботинкæтæ æмæ зымæгмæ хъарм спортивон дарæс.
«Алы сывæллон дæр бæрæгбонмæ фенхъæлмæ кæсы лæвæрттæм, куы сыстыр вæййы, уæд ын ахæм бæрæгбонон эмоцитæ нал вæййы – фæлæ иумæйагæй ахæм хуызы бæрæгбонтыл куы æмбæлæм, уæд сын уыдзæн æцæг тых. Мах зæрдиагæй бацархайдзыстæм, ацы сывæллæттæн сæ ногазон бæрæгбон срæсугъд кæныныл æмæ сын афтæмæй сæххæст кæндзыстæм сæ бæллицтæ», – загъта Президент.
Не ‘мбæстæгтæй сывæллæтты барæвдауын кæй фæнды, уыдонæн сæ бон у телерадиокомпани «Ир»-ы бæстыхаймæ æрбацæуын, назбæласæй фыстæг райсын æмæ дзы цы бæллиц фыст ис, уый сæххæст кæнын.
Акци æмткæй куыд рауадис, уый та æнæхъæнæй æвдыст æрцæудзæн Ног азмæ æввахс ПТРК «Ир»-ы эфиры.
КОКАЙТЫ Зæринæ
