Нæ республикæйы уагъд цæуы ногазон хæрзаудæн акци «Моя Рождественская мечта», зæгъгæ, ахæм номимæ. Ацы бæрæгбонон акци суыдзæн традицион æмæ уагъд цæудзæнис æрвылаз дæр сыгъдæг Цыппурсы бæрæгбоны цытæн. Мадзал организацигонд æрцыд Республикæ Хуссар Ирыстоны Президенты администраци æмæ Ахуырад æмæ зонады министрады хъæппæрисæй.
Ногазон мадзал «Моя Рождественская мечта» сæрмагондæй бацæттæ кодтой нæ республикæйы Сывæллæтты сфæлдыстадон галуан æмæ йæ ауагътой 7-æм январы – Цыппурсы бон. Галуаны цы назбæлас сæвæрдтой, уый алыварс ацы бон æрбамбырд сты Цхинвал æмæ Дзауы скъола-интернатты ахуыргæнинæгтæ, афтæ ма Ленингоры районы Сывæллæтты хæдзары хъомылгæнинæгтæ. Бæрæгбонмæ æрбацыдысты æмæ дзы хайад райстой РХИ-йы Хицауады Сæрдар Джуссойты Константин, РХИ-йы Президенты паддзахадон уынаффæгæнæг Беджызаты Батрадз, Ахуырад æмæ зонады министр Джиоты Арянæ, Культурæйы министр Зæгъойты Радæ, Цхинвалы администрацийы сæргълæууæг Къадзты Гено æмæ æндæр бæрнон кусджытæ.
Ног азы æрбалæуд не ‘взонг фæсивæдмæ кæддæриддæр сæвзæрын кæны уæлдай тынгдæр цины æнкъарæнтæ. Уыдонæн ногазон назбæлас æрхæссы хъæлдзæгдзинад, æнæферохкæнинаг тæлмæнтæ. Сывæллæттыл хъæлдзæгæй æмбæлдысты Митын Дада æмæ Митын Чызг аргъæутты хъайтартимæ. Ног азы æрбалæудмæ ма нымад бонтæ куы баззад, уæд ацы сывæллæттæ Митын Дадамæ ныффыстой фыстæджытæ, кæцыты домдтой, иууыл тынгдæр цæмæ бæллыдысты, уыдон сын цæмæй сæххæст кодтаид. Сывæллæттæ Митын Дадайы куы федтой, уæд сæ бæллицтæ сæ зæрдыл æрбалæууыдысты. Æппæт сывæллæттæн дæр хæларзæрдæ Митын Дада сæххæст кодта сæ бæллицтæ – æрхаста сын лæвæрттæ, уый ма сын ракодта ногазон арфæтæ æмæ сын йæ цæст бауарзта фидар æнæниздзинад. Дарддæр та сын æвдыст æрцыд музыкалон программæ, кæцыйы æрыгон артисттæ сæххæст кодтой зарджытæ æмæ кæфтытæ. Бæрæгбонон программæйы сывæллæттæ сæхæдæг дæр хайад райстой æндæр æмæ æндæр хъæзтыты. Ногазон назбæласы мадзал сывæллæттæн æхцондзинад кæй æрхаста, уый бæрæг уыд сæ цæсгæмттыл.
Нæ республикæйы Хицауады минæвæрттæ Джуссойты Конс-тантины сæргълæудæй 50 сывæллонæй фылдæры бæрцæн сæххæст кодтой сæ бæллицтæ æмæ сын сæ лæвæрттæ алкæмæндæр радтой ногазон арфæтимæ.
«Нæ зынаргъ сывæллæттæ, нæ Президент Гаглойты Алан æмæ уын мæхи номæй арфæ кæнын Ног аз æмæ Цыппурсы бæрæгбоны сæраппонд. Ацы диссаджы бон уын мæ зæрдæ зæгъы фидар æнæниздзинад æмæ стыр æнтыстытæ уæ ахуыры хъуыддаджы, Хуыцауæй кæддæриддæр арфæгонд ут æмæ уын æххуысгæнæг уæнт!», – загъта Джуссойты Константин.
Ацы мадзалы сывæллæттæй йе нæниздзинады тыххæй хайад чи нæ райста, уыдонмæ акцийы организатортæ бацыдысты хæдзæрттæм æмæ уыдонæн дæр сæххæст кодтой сæ бæллицтæ – райстой, Митын Дадайæ кæй куырдтой, уыцы лæвæрттæ.
Нæ уацх.
