Спорт

БОКС

Боксæй дунейы раздæры чемпион Гасситы Мурат азы кæронмæ хъуамæ ауадза дыууæ тохы. Уый тыххæй ТАСС-æн фехъусын кодта Уæрæсейы Боксы федерацийы генералон секретарь Умар Кремлев.

«Мæхæдæг дæр разы нæ дæн афтæ бирæ рæстæг Муратæн тохтæ кæй нал уыд, уыимæ. Тынг нæ фæнды æввахс рæстæджы йæ рингыл куы фениккам, уый. Ныфс нæ ис æмæ азы кæронмæ кæй ауадздзæн дыууæ тохы, кæцытæй фыццаг уыдзæн фæззæджы æмбисы», – загъта Умар Кремлев.

Гасситы Мурат ма фæстаг хатт рингмæ рахызт 2018 азы июлы мæйы. Уæд фæхæрд украинæйаг Александр Усикæн. Уый фæстæ ирон боксер хъавыд иууыл уæззаудæр уæзы категоримæ рахизын. Ног уæзы йын дебют хъуамæ уа 2020 азы.

ФУТБОЛ

Футболæй Уæрæсейы Кубокы финалы 1/64 хайæн уагъд æрцыдысты хæлттæппæрстытæ. Дзæудждыхъæуы «Алани»-йы ныхмæлæууæг ссис «Оренбург». Дзæуджыхъæуккæгтæ сæ хъазт акæндзысты уазæгуаты 26 августы.

Ирыстоны сæйраг футболон командæ ныридæгæн фыццаг хъазт та акодта Уæрæсейы Национ футболон къорд (фыццаг дивизион). Хъыгагæн, алайнæгтæ 2:4 хыгъдæй фæхæрд сты «СКА-Хабаровск»-æн. Хъазæн фæзмæ рахизын йæ бон нæ уыд «Алани»-йы сæйраг кулдуаргæс Ростислав Солдатенкойæн, кæцыйæн йæ арендæйы æмгъуыд фæцис. Фæлæ йæ уымæй дыууæ боны фæстæдæр «Алани» балхæдта командæ «Сочи»-йæ. Ныр Солдатенкоимæ контрактыл къухтæ фыст æрцыдысты æртæ азы æмгъуыдмæ. Йæ бæсты «СКА-Хабаровск»-имæ фембæлды хъазæн фæзмæ рахызт Георги Натабашвили, кæцы фыццаг æртæ бауагъд пуртийы рæстæджы йæхи равдыста лæмæгъæй.

***

Футболон командæ «Машук-КМВ»-йы сæйраг тренер ссис ирон специалист Цхуырбаты Станислав. Командæ хъазы Профессионалон футболон къорды (дыккаг дивизион) «Хуссар» зонæйы.

Цхуырбайы фырт 2007-2009 азты уыд «Алани»-йы сæйраг тренер. Банысан кæнын хъæуы уый дæр æмæ 2005-2006 азты кæй хъазыд Цхинвалы «Спартак»-ы сконды. Командæимæ рамбылдта РЦИ-Аланийы Кубок дæр.

УÆЗЗАУ АТЛЕТИКÆ

Дзæуджыхъæуы Уæззау атлетикæйæ Олимпион резервы спортивон скъолайы директорæй нысан æрцыд дунейы зындгонд штангист, Олимпион хъæзтыты бронзæйон призер, дыууæ хатты дунейы чемпион Æлбегаты Руслан. Уый тыххæй йын раарфæ кодта РЦИ-Аланийы Физикон культурæ æмæ спорты министр Хуыгаты Алан. Уый куыд загъта, афтæмæй йæ ныфс ис Æлбегаты Русланы фæлтæрддзинад, зонындзинæдтæ æмæ энергийы фæрцы йын уæззау атлетикæйы размæцыдмæ стыр хайбавæрд бахæссын кæй бантысдзæн.

ХУРИТЫ Батрадз