Уæззау рынчыны фæстæ 72-аздзыдæй йæ цардæй ахицæн Кæсойты Павелы фырт Лаврент. Абон аивæдты лицейыл, æппæт ирон адæмыл, æппæт нывгæнджытыл, ахуыргæнджытыл æрцыд стыр зиан. Ахуыссыд хорз Адæймаг, хорз нывгæнæг, хорз ахуыргæнæджы зæрдæ, фæлæ Лавренты чи зыдта, уыдон зæрдæтæй никуы ферох уыдзæн.
Кæсойты Лаврент райгуырд 1948 азы 9-æм ноябры Сталиниры. Ахуыр кодта 2-æм астæуккаг скъолайы. Ахуырмæ уыд æвзыгъд, раджы фæбæрæг йæ курдиат ныв кæнынмæ дæр. 1966 азы бацыд Цхинвалы нывгæнæн ахуыргæнæндонмæ æмæ йæ 1970-æм азы æнтыстджынæй каст фæцис. 1971-79 азты та ахуыр кодта Тбилисы паддзахадон нывгæнæн академийы. 1978-æм азы студент уæвгæйæ, кусын райдыдта ахуыргæнæгæй Цхинвалы нывгæнæн ахуыргæнæндоны. Йæ арæхстдзинад æмæ зонындзинæдты тыххæй йæ 1981 азы йæ снысан кодтой ахуыргæнæндоны директорæй. 1987-æм азы та йæ сæвзæрстой Хуссар Ирыстоны Нывгæнджыты цæдисы сæрдарæй. Уæдмæ дуг дæр схæццæ ис, ныппырх Советон Цæдис, райдыдта хæст æмæ ныллæууыдысты уæззау рæстæджытæ Ирыстонæн.
Ахæм æвзæр дуджы æмæ уавæрты Кæсойты Лаврент байгом кодта Колыты Аксойы номыл аивæдты лицей. Йе сфæлдыстадæй æмæ йе ‘нæрынцайгæ педагогон архайдæй Кæсойты Лаврентæн бирæ бантыст саразын, балæггад кæнын йæ уарзон адæмæн. Адæмы фарн лæгæй цæуы. Адæмæн ном æмæ цæсгом лæг кæны. Æрдз царды бирæ хорзæхтæ кæмæн радты, уый йæхицæй бирæ домы адæмы хæрзæбонæн, йæ разы стыр хæс æвæры. Уыцы дзырдтæ иууылдæр хауынц Кæсойты Лаврентмæ.
Ивгъуыд аз Хуссар Ирыстоны паддзахадон университеты байгом адæмон нывгæнæг Кæсойты Лавренты юбилейон равдыст. Равдыст арæзт æрцыд курдиатджын нывгæнæг, Советон Цæдисы Нывгæнджыты Цæдисы уæнг æмæ Хуссар Ирыстоны сгуыхт ахуыргæнæгыл 70 азы сæххæсты цытæн.
Хуссар Ирыстоны Паддзахадон аивæдты лицейы коллектив
Comments are closed, but trackbacks and pingbacks are open.