Хетæгкаты Къостайы номыл Хуссар Ирыстоны Паддзахадон драмон театры дыууæ боны дæргъы уагъд цыд Гуыцмæзты Михалы пъесæмæ гæсгæ æвæрд спектакль «Бирæгътæ», зæгъгæ. Йæ бацæттæ кæныныл артисттæ куыстой иу мæйæ фылдæр. Спектаклы æвæрæг-режиссер у Тъехты Уасил. Комеди у тынг цымыдисон, кæцыйæ бирæ цæвиттонтæ рахæссæн ис ныры дугмæ дæр. Сæйраджыдæр дзы дзырд цæуы ныййарджыты æмæ сывæллæт-ты æмахастытыл. Æртæ æфсымæрæн сæ ныййарæг фыдыл азтæ сæ уæз куы æруагътой æмæ йæ бон куы ницыуал уыд, уæд раппар-баппайраг фæцис, йæ сывæллæттæ йæм кастысты пайдайы цæстæй, йæ чындзыты æрдыгæй дæр æййæфта æфхæрд. Рагфæндтæ кодтой, зæгъгæ, нæ фыд куы амæла, уæд ын стыр хист сараздзыстæм, æрхондзыстæм бирæ адæм, цæмæй нæм бирæ сабæттаг æртымбыл уа æмæ, зæгъ, æй уæд кæрæдзийыл адих кæндзыстæм. Зæронд лæгмæ йæ хъæбулты æрдыгæй ахæм ахаст æгад æркаст æмæ сфæнд кодта иу хатт ма сæ бафæлварыныл. Йæ хуыз фæивгæйæ, æндæр адæймаджы хуызы уый æрцыд, ома дард горæт Сочийæ, æмæ бинонтæн фехъусын кодта сæ фыд кæй фæзиан æмæ сæм радта, йæ «амæлæты» размæ цы фыстæг ныффыста, уый. Фырттæ йын йæ фæстаг фæдзæхстытæй ницы сæххæст кодтой æмæ сæ спектаклы кæрон «бирæгътæ» дæр уымæн хоны.
Тъехты Уасилы ныхæстæм гæсгæ, спектаклы равæрдыл куыст цыд тынг цымыдисонæй. «Артисттæ импровизаци кодтой тынг бирæ. Ахæм нырыккон сфæлдыстадон куыст спектаклы процесс кæны химæлвасагдæр, йæ фæстиуæг та – цымыдисон»,- загъта уый.
Спектаклы кæрон Хуссар Ирыстоны паддзахадон драмон театры адæмон артисттæ Хаситы Вильгельм æмæ Уанеты Ӕхсарæн лæвæрд æрцыдысты «Цæгат Ирыстон-Аланийы Адæмон артист»-ы кадджын нæмттæ. Бæрзонд паддзахадон хорзæхтæ Цæгат Ирыстон-Аланийы Сæргълæууæг Битарты Вячеславы номæй радта РХИ-йы Президент Бибылты Анатоли “Бирæгътæ”-йы премьерæйы рæстæджы. Уый артисттæн ракодта зæрдæбын арфæтæ сæ арæхстдзинад аивæй кæй равдыстой сценæйыл æмæ сын йæ цæст бауарзта дард-дæры сфæлдыстадон æнтыстытæ. Бузныджы ныхæстæ загъта Цæгат Ирыстоны Сæргълæууæгæн дæр хуссарирыстойнаг артистты аивадæн афтæ стыр аргъ кæй скодта, уый тыххæй.
“Стыр бузныг Битарты Зелимханы фырт Вячеславæн. Ӕз афтæ хъуыды кæнын, æмæ ам адæмон артисты ном кæмæн радтой, уый йæ хъуамæ райса цæгаты дæр, цæгаты кæмæн ис, уымæн та йæ хъуамæ радтой хуссары, уымæн æмæ махæн Ирыстон у иу” – банысан кодта Президент Бибылты Анатоли.
Йæ рады Уанеты Æхсар дæр бузныджы ныхæстæ загъта Ирыстоны дыууæ хайы сæргълæуджытæн æмæ банысан кодта, зæгъгæ, «ме ‘нæниздзинад фæцудыдта æмæ мæ куысты нæ уыдтæн, фæлæ мын уæддæр саргъ кодтой мæ куыстæн. Бузныг дæн Президентæй, уый фæрцы ацыдтæн хоскæнынмæ. Мæхи номæй æмæ Ирыстоны адæмы номæй дæр стыр бузныг зæгъæм Битарты фыртæн”, – загъта уый.
Спектаклы сæ арæхстдзинад равдыстой Хаситы Вильгелм, Пæррæстаты Дима, Гобозты Инал, Натия Чохели, Дыгъуызты Жаннæ, Козаты Роман, Хуыгаты Дзамболат, Букуылты Сослан, Цоциты Николай æмæ Багаты Гиуæрги.
Сценæмæкæсджыты тыхджын къухæмдзæгъдæй бæрæг уыд, спектакль сæ зæрдæмæ тынг кæй фæцыдис, уый.
Кокайты Заринæ
Comments are closed, but trackbacks and pingbacks are open.