Ацы аз Хетӕгкаты Къостайы райгуырдыл ӕххӕст кӕны 160 азы ӕмӕ уый фӕдыл 2019 аз Хуссар Ирыстоны къухдариуæгад расидт Хетӕгкаты Къостайы азæй. Уый фӕстиуӕгӕн скъуыддзаг ӕрцыдис, цӕмӕй Паддзахадон драмон театры ногарӕзт бӕстыхайы фыццаг равдисой Хетæгкаты Къостайы æнæмæлгæ уацмыс «Фатимæ»-мæ гæсгæ æвæрд спектакль. Ӕмæ 14 февралы театры сценæйыл уыдис ацы премьерон равдыст. Спектаклмæ билеттæ ауæй сты рагагъоммæ æмæ зал æмыдзаг уыд адæмæй.
Премьерæмæ æрбацыдысты РХИ-йы Президент Бибылты Анатоли, хицауады уæнгтæ æмæ æндæр бæрнон кусджытæ, цæгатирыстойнаг делегаци сæ Парламенты Сæрдар Алексей Мачневы сæргълæудæй, Уæрæсейы Федерацийы минæварады сæргълæууæг Марат Кулахметов æмæ æндæр уазджытæ, бынæттон интеллигенци æмæ æхсæнады минæвæрттæ.
Премьерон равдыстæй театруарзджытæ дзы райстой стыр æхцондзинад. Йæ режиссер Дзуццаты Тамерланæн бантыст иттæг хорз сценæйыл актерты курдиат равдисын, кæцытæ сарæзтой зæрдæмæхъаргæ фæлгæндзтæ. Декорацитæ дæр уыдысты аив æмæ рæсугъд. Адæймаджы, спектаклмæ кæсгæйæ, йæ хъуыдытæ ахастой рагзамантæм, нæ адæмы рагон цард æмæ æгъдæуттæм. Нæ фыдæлты уæззау цард æмæ карз æгъдæуттæ ирдæй æвдыст æрцыдысты сценæйыл. Спектаклы сæйраг бынат ахсы уарзондзинад. Уацмысы сæйраг хъайтартæ басыгъдысты уарзондзинады азарæй, нæ сæм фæхудт амонд йæ мидбылты, стыр хъизæмæрттæ бавзæрстой æмæ сæ царды кæрон уыд трагедион. Ацы спектаклы мидис у цардæй ист. Къоста тынг хорз зонгæ уыд нæ рагфыдæлты æхсæнадон царды хъæндзинæдтæ, карз æгъдæуттимæ æмæ сæ йæ поэмæ «Фатимæ»-йы равдыста лæмбынæгæй.
Бибылты Анатоли зæрдиаг арфæ ракодта театры кусджытæн спектакль цæттæгæнгæйæ сæ бакæнгæ куысты тыххæй. «Иу адæймаг дæр нæ разындзæн залы, кæцымæ нæ бахъардта ацы спектаклы мидис, актерты профессионалон хъазт, кæцы нæ бадис кодта хæрзарæзт декорацитыл. Стыр бузныг зæгъын уе ‘ппæтæн дæр ахæм диссаджы лæвары тыххæй», – загъта президент.
«Фыццаджыдæр уын зæрдиагæй арфæ кæнын уæ ног театры бæстыхайы тыххæй. Стæй мæ уæлдай бузныджы ныхæстæ фæнды зæгъын тетралон труппайæн æмæ ма чидæриддæр хайад райста ацы спектаклы равдысты, æппæт уыдонæн. Стыр æхцондзинад райстон спектаклмæ кæсгæйæ æмæ уын мæ зæрдæ зæгъы ноджы бирæ æнтыстытæ», – банысан кодта Алексей Мачнев дæр.
Бузныджы ныхæстæ ма загъта Марат Кулахметов дæр. Театры бакондыл зæрдиагæй фембæлд Хуссар Ирыстоны адæмон артисткæ Галуанты Людæйæн, кæцыйыл сæххæст 82 азы. «Мæ бæллиц сæххæст ис. Хуыцаумæ-иу куывтон, цæмæй æрæййафон ногарæзт театр æмæ ма йæ сценæмæ искуы иу хатт рахизон. Ӕмæ ныр уыцы бон ныллæууыд æмæ мæхи нымайын иууыл амондджындæрыл», – цингæнгæ дзырдта Галуанты Людæ.
Театрмæ æрбацæуæг адæмæн уыцы бон уыд стыр цины бон, театруарзджытæн рагæй фæстæмæ нал уыд театрмæ бакæсынæн рæстмæ уавæртæ кæдæй-уæдæй ма сын бантыст ахæм диссаджы спектаклмæ бакæсын. Театры сфæлдыстадон коллективæн та нырæй фæстæмæ уыдзæн хорз фадат театруарзджыты зæрдæтæ рухс кæнынæн.
Джиоты Александр
Comments are closed, but trackbacks and pingbacks are open.