Хуссар Ирыстоны столицæ æхсынц стыркалиброн артиллерийæ æмæ минометтæй, 23:56 сахатыл Цхинвалы штурм райдыдтой Гуырдзыстоны гарзджын тыхтæ.
07.08.2008 00:05
Гуырдзыстоны дæлбаруæвæг Ереды хъæуы æрдыгæй интенсивонæй æхсын райдыдтой Цхинвалы районы Дменисы хъæу минометтæй. Æхстытæ тынгæй тынгдæр кæнынц. Иу адæймаг фæцæф.
07.08.2008 00:52
Гуырдзиæгтæ стыр калиброн артиллерийæ дарддæр æхсынц ирон хъæуты. Дменисы фæстæ æхсын райдыдтой Сарабукы, Сатихъары хъæуты æмæ Цхинвалы хуссарыфарс.
07.08.2008 01:35
Дменисы хъæуы хæдзæртты 20 процентæй фылдæр ныппырх сты. Хъæуы цæрджытæ сæ хæдзæртты ныккæндты кæй æмбæхсынц, уый тыххæй зын базонæн у, цы зиæнттæ æрцыд, уый. Гуырдзыстоны территорийæ ноджыдæр Дменисы ʻрдæм цæуынц бронетехникæ, артиллери æмæ фистæг æфсæддонтæ. Дарддæр æхсынц Сатихъар æмæ Сарабукы хъæуты.
07.08.2008 01:35
Гуырдзиаг хъæутæ Никоз æмæ Эргнеты æрдыгæй Цхинвалы æхсынц стыркалиброн артиллери æмæ минометтæй. Æхстытæ нæ банцадысты æнæхъæн æхсæв. Фæцæф сты 6 адæймаджы.
07.08.2008 08:01
Республикон рынчындоны бæрæггæнæнтæм гæсгæ, æхсæвы æхстыты рæстæджы республикæйы цæрджытæй фæцæф 6 адæймаджы. Дменисы хъæуы цæрджытæй фæмард цыппар адæймаджы.
07.08.2008 10:27
Гуырдзиæгтæ гуырдзиаг хъæу Нулы æрдыгæй ногæй стыркалиброн артиллерийæ, минометтæ æмæ гранатометтæй æхсын райдыдтой Знауыры районы Убиаты хъæуы.
07.08.2008 10:37
Æхсæвы æхстыты рæстæджы республикон рынчындонмæ баластой 18 цæф æмбæстаджы Цхинвалы æмæ Знауыры районтæй.
07.08.2008 10:42
Æхсæвы гуырдзиаг фарс радон хатт бафæлвæрдта ирыстойнаг территорийы санекси кæныныл. Ирон хъæутæ Прис, Дменис æмæ Сарабукъы хъæуты æхстой 150-миллиметрон хæцæнгæрзтæй. Сабыр цæрджыты æрдыгæй ис цæфтæ. Уæрæсейаг фидауынгæнæг тыхты барамындмæ гæсгæ хуссарирыстойнаг фарс нал æхста. Гуырдзиæгтæ се ‘хсынæй не ‘рлæууыдысты.
РХИ-йы Президент Кокойты Эдуард куыд банысан кодта, афтæмæй ирæттæ цæттæ сты бадзырдты процессмæ Æмхæццæ контролон къамисы цыппарфарсон форматы фæлгæтты. Хъуыддаг баст у Гуырдзыстоныл.
Гуырдзиаг фарс куынæ байхъуса уæрæсейаг фидауынгæнæг тыхтæм, уæд райдайдзыстæм бæрзæндты сыгъдæг кæнын. Республикæйы дæлхæйттæ æнхъæлмæ кæсынц сæйраг уæлдæр командакæнынады барамындмæ», – загъта Президент.
07.08.2008 11:36
Æмхæццæ тыхты командæгæнæджы æххуысгæнæг Владимир Иванов куыд фехъусын кодта, афтæмæй гуырдзиаг-ирон конфликты зонæйы фидауынгæнæг тыхты æппæт постты дæр хæлд æрцыдысты æхстытæ æруромыны тыххæй бадзырдты фæткойтæ. Ирон æмæ гуырдзиаг хъæутæ кæрæдзи æхстой алыгъуызон калибры хæцæнгæрзтæ æмæ гранатометтæй.
Уый куыд загъта, афтæмæй, нысан æрцыдысты æхсæвы дæргъы фæтк фехалгæйæ, Гурæй Дзауы ‘рдæм Су-25 хæдтæхджыты тæхыны факттæ æмæ аст хатты та – æнæпилот тæхæн аппараты тæхыны факттæ. «Ныртæккæ фидауыынгæнæг тыхты контингент сты хæстæввонг», – банысан кодта Иванов.
07.08.2008 15:52
Гуырдзиаг фарс Эргнет æмæ Аунейы æрдыгæй РХИ-йы столицæ Цхинвалы цæрæн кварталты æхсы минометтæ, гранатометтæ æмæ æндæр хæцæнгæрзтæй.
07.08.2008 15:45
Гуырдзыстоны фарсæй Æмхæццæ тыхты цæстдарджытæ ныууагътой Æмхæццæ тыхты баиугонд штаб, уымæй дарддæр ма, уæвæг бадзырдтæм гæсгæ, Гуырдзыстоны фарсы æфсæддон хъусдарджыты хайадист кæм хъуыд, уыцы посттæ æмæ ацыдысты Гуырдзыстонмæ.
07.08.2008 17:44
Сæрмагонд хъуыддæгты фæдыл министр, хуссарирыстойнаг фарсы æрдыгæй Æмхæццæ контролон къамисы æмсæрдар Цоциты Барис Гуырдзыстоны фæаххосджын кодта Хуссар Ирыстоны ныхмæ агрессийы æмæ банысан кодта бадзырдтæм хуссарирыстойнаг фарсы цæттæдзинад, æрмæстдæр конфликт æрбæстон кæныны фæдыл Æмхæццæ контролон къамисы дунейы нымадгонд форматы.
Уый банысан кодта, зæгъгæ, 7-æм августы æхсæвы Гуырдзыстон Хуссар Ирыстоны территори кæй æхста, уый афтæ нысан кæны, æмæ гуырдзиаг фарс нæ разы кæны конфликт сабырæй æрнывыл кæныныл.
07.08.2008 21:02
Æхсæвы æхстытæй республикæйы æмбæстæгтæй фæмард сты дыууæ сабыр цæрæджы, дыууæйæ та цæфтæ фесты.
07.08.2008 21:14
Уæрæсейы Федерацийы Фæсарæйнаг хъуыддæгты минæвар Юрий Попов Цхинвалы консультацитæ ауагъта æртæфарсон форматы бадзырдты процесс сног кæныны фæдыл. Развæлгъау сразы сты, цæмæй бадзырдтæ ацæуой 8-æм августы Цхинвалы.
07.08.2008 22.28
Гуырдзиаг-ирон конфликты зонæйы Æмхæццæ тыхты командагæнæг Марат Кулахметов банысан кодта уæрæсейаг фидауынгæнæг тыхты нымæц фæфылдæр кæныны æнæмæнгхъæуындзинад. «Иу сахаты размныхас кодтонгосподин Якобашвилиимæ. Уый фехъусын кодта Гуырдзыстоны президенты фæндон, зæгъгæ, конфликты зонæйы тыхæй спайда кæныныл гуырдзиаг фарс разы нæу, цалынмæ уавæр æрнывыл уа, уæдмæ», – загъта Кулахметов.
07.08.2008 23:56
Гуырдзыстоны гарзджын тыхтæ штурм райдыдтой Цхинвалы. Гуырдзиаг артиллери стыркалиброн хæцæнгæзтæй æхсын райдыдта фынæй горæт. Развæлгъау информацимæ гæсгæ, «Град»-ы системæйы хæцæнгарзæй, минометтæ, гранатометтæй æмæ æндæр хуызы стыркалиброн хæцæнгæртæй æхсынц Гуры æрдыгæй. Снарядтæн сæ фылдæр хауынц горæты центры.
