Горæт Цхинвалы администрацийы сæргълæууæг Хуыгаты Ромео ауагъта рауæрæхгонд аппаратон æмбырд горæты сæргълæууæджы хæдивджытæ, структурон дæлхæйтты къухдариуæггæнджытæ, Цхинвалы мэрийы управленитæ æмæ мэрийы хайадты хистæрты хайадистæй.
Боны фæткмæ хаст æрцыдысты 2008 азы августы хæсты амæттæгты мысæн мадзæлттæ æмæ хæрзаудæн концерт бацæттæ кæнын, кæцы организаци кæны администраци Украинæйы Уæрæсейы сæрмагонд æфсæддон операцийы хайадисджыты фарсхæцынады нысанæн.
«Администрацийы коллектив дыууæ хатты æрæмбырд кодта æхцайы фæрæзтæ нæ хæстонтæн, кæцытæ ныртæккæ сты фронты раззаг хаххы. Хæрзаудæн концертæй мах фæнды нæ хæстонты фарсхæцынад равдисын æмæ сын арфæйы ныхæстæ зæгъын», – загъта Хуыгайы фырт.
Горæты сæргълæууæг бузныг загъта, сæрмагонд æфсæддон операцийы хайадисджытæн баххуыс кæныны тыххæй æхцайы фæрæзтæ æрæмбырд кæныны хъуыддаджы хайад чи райста, æппæт уыдонæн.
Цхинвалы мэрийы хайадты куыстыл уынаффæ кæнгæйæ, горæты сæргълæууæг къухдариуæггæнджытæй æрдомдта администрацийы кусджытæй фæндвидар архайдтытæ æмæ куыстмæ ноджы бæрнондæр ахаст.
Афтæ ма Хуыгайы фырт бузныг загъта паддзахадон унитарон куыстуат «Водоканал», «Хæрзарæзтады комбинат» æмæ Цхинвалы администрацийы культурæ, фæсивæд æмæ спорты Управленийæн сæ компетентондзинад æмæ фæстиуæгджын куысты тыххæй.
Аппаратон æмбырды хатдзæгтæм гæсгæ лæвæрд æрцыд хæслæвæрдтæ, уыцы нымæцы цæрæнуат райсынмæ рады цы æмбæстæгтæ лæууынц, уыдонæн цæрæнуæттæ адих кæныны процессы фæдыл. Хæслæвæрдтæ сæххæст кæныныл контроль кæндзæн горæты сæргълæууæг.
