Нæ республикæйы скъолаты айзæлыдысты фæстаг дзæнгæрæджы зæлтæ

Нæ республикæйы скъоладзау фæсивæдæн 25-æм майы уыдис фæстаг дзæнгæрæджы бон. РХИ-йы Ахуырад æмæ зонады министрад нын куыд фехъусын кодта, уымæ гæсгæ ацы аз рауагъдонты нымæц у 509 бæрц. Не скъолаты  цæмæй фæстаг дзæнгæрæджы бæрæгбонон мадзæлттæ сабыр æмæ нывыл ацыдаиккой, уый тыххæй развæлгъау сæхи бацæттæ кодтой мидхъуыддæгты органты кусджытæ дæр. Скъолаты цытджын линейкæты рауагъдонтæн арфæ кæнынмæ æрбацыдысты республикæйы разамынады бæрнон кусджытæ, сæ ныййарджытæ.

Фæстаг дзæнгæрæг цытджын æгъдауæй айзæлыд Колыты Аксойы номыл аивæдты лицейы рауагъдонтæн дæр. Ацы скъолайæн хæрзбон кодтой 37 рауагъдоны. Æвзонг чызджытæ æмæ лæппутæ уыдысты скъолайон дарæсы. Уыдонæн сæ цæсгæмттыл бæрæгæй зындысты цины æмæ уыимæ æрхæндæджы æнкъарæнтæ дæр.

 Аивæдты лицейы ахуыргæнджытæ, ахуыргæнинæгтæ æмæ сæ ныййарджытæ цардмæ фæндараст кодтой сæ рауагъдонты. Цытджын мадзалмæ сæм фæуазæг сты Республикæ Хуссар  Ирыстоны  Президент  Бибылты  Анатоли æмæ РХИ-йы Ахуырад æмæ зонады министр Гасситы Натали. Бибылты Анатоли дæр йе ‘мкъай Куымæридтаты Линдæимæ фæндараст кодтой сæ фырт Ацæмæзы. Президент зæрдиаг æмæ бузныджы ныхæстимæ дидинджыты букеттæ балæвар кодта рауагъдонты ахуыргæн-джытæн.

Лицейы кæрты уал рауагъдонтæ музыкæйы æхцон зæлтæм къордгæйттæй æрбацыдысты æмæ дзы сарæзтой хъазт. Рæсугъд æмæ хæрзконд рауагъдонтæ ирон адæмон кафт «Симд»-æй байгом кодтой бæрæгбонон мадзал. Уыдон арæхстджынæй равдыстой, ацы кафты аивдзинадимæ  сæ кафыныл чи ахуыр кодтой, уыдоны фыдæбон æнæхъуаджы кæй нæ фæцис, уый дæр. Дарддæр ахуыргæнджытæ иугай хуыдтой рауагъдонты бæрæгбонвæлыст актон залмæ, цыран хъæл-дзæгæй адарддæр кодтой фæстаг дзæнгæрæджы бæрæгбон.

Президент Бибылты Анатоли бирæ хъарм ныхæстæ загъта рауагъдонтæн. «Æз абон ацы цытджын мадзалы хайад исын куыд Президент, афтæ нæ, фæлæ куыд ныййарæг. Ацы бон ныййарджытæн дæр вæййы, цæуыл батыхсой, ахæм бон æмæ уый та банкъарынц нæ хъæбултæ дæр. Куыд ныййарæг, афтæ мæ, фыццаджы-дæр, бузныджы ныхæстæ зæгъын  фæнды нæ  цытджын  ахуыргæнджытæн, кæцытæ нын нæ сывæллæтты 11 азы дæргъы кодтой рухс фидæнмæ, хорз зонындзинæдтæм тырн-гæйæ», – раарфæ сын кодта Бибылты Анатоли. Президенты цæст рауагъдонтæн бауарзта, фидар æнæниздзинад æмæ цæмæй суой нæ республикæйы сомбоны дæсны специалисттæ.

Ацы аз йæ цардæй ахицæн ис Аивæдты лицейы ахуыргæнæг Гæбæраты Нелли. Рауагъдонтæ бахатыдысты, цæмæй сæ уарзон ахуыргæнæгæн йæ рухс ном ссард-таиккой, иу уысм æмырæй алæугæйæ.

Рауагъдонтæн хорз фæндиæг-тимæ арфæ кæнынмæ сценæмæ схызтысты, сæ къласгæстæ æмæ сын райдиан кълæсты чи уыдис ахуыргæнджытæ, уыдон. Традицимæ гæсгæ та хуыздæр рауагъдон Козаты Асланæн лæвæрд æрцыдис паддзахадон Аивæдты лицейы бындурæвæрджытæй сæ иу, йæ фыццаг директор, дзæнæттаг Пухаты Фатимæйы номыл æрвылазон преми. Преми йæ хицауæн радта Пухаты Фатимæйы æфсымæр Къоста.

Фæстаг дзæнгæрæджы боны цытæн нæ буц рауагъдонтæн арфæ ракодтой РХИ-йы Ахуырад æмæ зонады министр Гасситы Натали, Аивæдты лицейы директор Кæсойты Лавренти, РХИ-йы Парламенты депутат Уанеты Æхсар, скъолайы ирон æвзаг æмæ литературæйы ахуыргæнæг Гæбæраты Фатимæ. Сæрмагондæй ма рауагъдонтæн раарфæ кодтой 10-æм къласы ахуыргæнинæгтæ дæр. Уыдон сæм сценæмæ схызтысты чысыл зæр-дылдарæн лæвæрттимæ æмæ уый фæстæ сценæйыл иууыл иумæ сæххæст кодтой ирон кафт «Симд».

Иуæндæс азы дæргъы æрыгон лæппутæ æмæ чызджытæн сæ зонындзинæдтæ чи нæ бавгъау кодта æмæ сæ ахуыры фæндагыл чи лæууын кодта, уыцы ахуыргæнджытæн бузныджы ныхæстæ загътой рауагъдонтæ сæхæдæг дæр æмæ ныййарджытæ дæр. Рауагъдонтæ ныфс æвæрдтой, се скъолайы æмæ Хуссар Ирыстоны кад дæлæмæ кæй не ‘руаддзысты.

Мадзалы кæрон рауагъдонтæн айзæлыд фæстаг дзæнгæрæг æмæ уый фæстæ зæрдылдарынæн сæ къамтæ систой Президент Бибылты Анатолиимæ.

Паддзахады сæргълæууæг ма бацыдис 11-æм скъолайы цытджын линейкæмæ дæр. Уый арфæ ракодта ацы скъолайы рауагъдонтæн, ахуыргæнджытæ æмæ ныййарджытæн. Рауагъдонтæн загъта амондджын царды фæндиæгтæ, цыфæнды зындзинæдты сæрты дæр æнцонæй цы хизой æмæ Ирыстонæн аккаг хъæбултæй цы басгуыхой. Скъолайы рауагъдонтæн ма раарфæ кодта Гасситы Натали дæр æмæ сын йæ цæст бауарзта сæ дарддæры царды хорз æнтыстытæ. Ам дæр æппæт скъола хъæлдзæгæй æрвыстой сæ фæстаг дзæн-гæрæджы бон. Ныр рауагъдонтæм æнхъæлмæ кæсынц рауагъдон фæлварæнтæ. Нæ зæрдæ сын зæгъы, цæмæй иууылдæр суой студенттæ.

Фæндараст ут, рауагъдонтæ, ног царды фæндæгтыл.

               ЦХУЫРБАТЫ Ларисæ

Comments are closed, but trackbacks and pingbacks are open.