Фыдыбæстæ хъахъхъæнæджы боны цытæн нæ республикæйы бирæ алыгъуызон мадзæлттæ уагъд æрцыдис. Бæрæгбоны сæраппонд Цхинвалы районы Къостайыхъæуы нывгæнæн скъола-студийы ахуыргæнинæгты куыстытæн 3-æм марты киноконцертон зал «Чермен»-ы фойейы уыд бæрæгбонон равдыст. Равдыстмæ æрбацыдысты Къостайыхъæуы скъолайы ахуыргæнинæгтæ æмæ ахуыргæнджытæ, нæ горæты Колыты Аксойы номыл аивæдты лицейы нывгæнæн хайады чи архайынц, уыцы кæстæр кълæсты ахуыргæнинæгтæ сæ ахуыргæнджытимæ, афтæ ма Республикæ Хуссар Ирыстоны Культурæйы министрад æмæ Цхинвалы районы администрацийы минæвæрттæ. Бæрæгбонон мадзал организацигонд æрцыд РХИ-йы Культурæ, Ахуырад æмæ зонады министрадты хъæппæрисæй.
Къостайыхъæуы нывгæнæн скъола-студийы бакондыл нырма æххæст фондз азы дæр нæ рацыд, фæлæ сын ныридæгæн ис зæрдæрухсгæнæн æнтыстытæ, аивады дунемæ кæнынц сæ фыццаг къахдзæфтæ æмæ сæ сæ ахуыргæнджытæ æмæ ныййарджытæ сты сæрыстыр. Равдыстмæ ахуыргæнинæгтæ цы нывтæ бацæттæ кодтой, уыдон уыдысты Фыдыбæстæ хъахъхъæнæджы бон æмæ 8-æм марты бæрæгбоны тыххæй, афтæ ма æндæр темæтыл дæр. Экспозицимæ хаст æрцыдис сæдæмæ æввахс куысты æмæ сæм стыр цымыдисимæ кастысты æрæмбырдуæвджытæ. Æрыгон нывгæнджытæ сæ куыстыты æвдисынц райгуырæн бæстæмæ сæ уарзондзинад, Ирыстоны алæмæттаг æрдз, ис дзы натюрморттæ æмæ хицæн предметтæ, Ирыстоны герб, горæт Лазаревскы пейзажтæ (сывæллæттæ сыл бакуыстой пленэрты рæстæджы, Лазаревскы денджызы былыл куы уыдысты, уæд).
Дæ цæст равдыстыл куы ахæссай, уæд дзы зыны, нывкæнынадмæ нырма фыццаг къахдзæфтæ чи аразынц, фæлæ йæ уд æмæ йæ зæрдæйæ чи бауарзта, уыцы æвзонг курдиæтты цымыдисон куыстытæ, бæрæг у æнтыстджынæй кæй архайынц, уый.
Скъола-студийы ахуыргæнæг Хуыбиаты Роберт нын куыд радзырдта, афтæмæй уыдон развæлгъау сæхи бацæттæ кодтой бæрæгбонон равдыстмæ. «Фыдыбæстæ хъахъхъæнæджы бон æмæ Сылгоймæгты дунеон бæрæгбон кæрæдзийы фæдыл кæй сты, уымæ гæсгæ нын бахæс кодтой, цæмæй дыууæ бæрæгбоны цытæн бацæттæ кодтаиккам равдыст. Æдæппæтæй не скъола-студийы ахуыр кæны 18 ахуыргæнинаджы æмæ нæ абоны равдысты та хайад райстой 12 сывæллоны. Се ‘хсæн ис фыццагкъласонтæ дæр. Сывæллæттæ нæм æрбацæуынц сæ урокты фæстæ æмæ акусынц æртæ сахаты бæрц. Фыццаджыдæр мæ цы фæнды зæгъын? Нæ хъомылгæнинæгтæй нæ зæрдæ рухс кæны, сты æгъдауджын æмæ коммæгæс, тырнынц ныв кæнынмæ. Нæ хъомылгæнинæгтæй ис цалдæр адæймаджы, кæцытæ дарддæр дæр ацæудзысты нывкæнынады хаххыл. Уыдон сты Тараты Ирэнæ, Джиоты Дианæ, Хуыбиаты Аннæ æмæ æндæртæ. Мах сын æххуыс кæнæм, цæттæ сæ кæндзыстæм ноджыдæр. Æнæуый та цалдæр хатты не скъола хайад райстой Уæрæсейы уагъд-цæуæг æндæр æмæ æндæр конкурсты æмæ нын дзы уыд хорз æнтыстытæ, фæстаг хатт цы конкурсы хайад истам, уым бацахстам фыццаг æмæ дыккаг бынæттæ. Фæнды мæ, цæмæй нæ сывæллæтты арæхдæр кæнæм республикæйæн æдтæ-мæ, цæмæй фылдæр цымыдис кæной аивадмæ», – загъта Хуыбиайы фырт. Уый ма нын куыд загъта, афтæмæй сæрды фæнд кæнынц ацæуын Фыййагдонмæ пленэртæм дæс боны æмгъуыдмæ. «Ууыл ны-ридæгæн ныхас цæуы æмæ хъуамæ нæ фæнд сæххæст уа. Уадз æмæ сывæллæттæ сæ ахуыры фæстæ улæфгæ дæр бакæной æмæ ма се сфæлдыстадон куыс-тæн дæр фæпайда уа», – зæгъы ахуыргæнæг.
Æрыгон нывгæнджытæн сæ радон равдысты тыххæй æмæ бæрæгбонты цытæн арфæйы ныхæстæ загътой сæ ахуыргæн-джытæ æмæ аивадæн табугæнджытæ. Æнтысты фæндиæгтæ сын се сфæлдыстадон хъуыддаджы загътой районы администраци æмæ РХИ-йы Культурæйы министрады минæвæрттæ дæр.
Нывгæнæн скъола-студийы сывæллæтты се ‘нтысгæ архайды æмæ бæрæгбонон равдысты активон хайад кæй райстой, уый тыххæй сæ Цхинвалы районы администраци схорзæхджын кодта грамотæтæй.
ЦХУЫРБАТЫ Ларисæ
Comments are closed, but trackbacks and pingbacks are open.