Сырх Дзуары Æхсæнадæмон Комитет дарддæр кæны йæ хæрзиуæгон архайд Хуссар Ирыстоны горæттæ æмæ хъæууон бынæтты дæр, бакæны комплексон æххуыс иууыл тыхстдæр категорийы æмбæстæгтæн. 1989-1992 азты æмæ 2008-æм азы августы хæсты рæстæджы æбæрæгæй чи фесæфт, уыдоны хъысмæт базонын æмæ сын сæ бынат рабæрæг кæнын у Комитеты сæйрагдæр здæхтытæй иу. Организаци кæны æдзухон ныхас Хицауады æппæт æмбæлон структурæтæ æмæ чи фесæфт, уыдон бинонты уæнгтимæ, цæмæй сбæлвырд æмæ рабæрæг кæной, чи фесæфт, уыцы фесæфæг адæймæгты хъысмæт. 2019 азы 30 августы æбæрæгæй фесæфæг æмбæстæгты тыххæй Æхсæнадæмон боны Комитеты хъæппæрисæй уагъд æрцыд мадзал киноконцертон зал «Чермен»-ы æмæ дзы уыдысты сæ бинонты уæнгтæ, хицауады минæвæрттæ æмæ æхсæнады активисттæ. Æбæрæгæй фесæфæг адæймæгты бинонты æнцой балæууыны тыххæй сентябры мæйы РЦИ-Аланийы Хидыхъусы моладзандоны уыд фембæлд æмæ дзы хайад райстой бинонты 16 минæвары.
Бинонты бастдзинад сæндидзын кæныны программæйы фæлгæтты организаци æххуыс кæны, конфликты фæстиуæгæн йæ хæстæджытимæ бастдзинад кæмæн нал ис, уыдонæн, фадат радты æввахс æмбæстæгтæн Сырх Дзуары Ныстуан арвитынæн, кæнæ та бацархайы телефонон бастдзинадæй сæ сифтонг кæныныл. Конфликты фæстиуæгæн чи фæиппæрд вæййы, уыдон бинонты уæнгтæн арæх зын вæййы æдзухон бастдзинад дарын сæ хæстæджытимæ. Ахæм бинонтæн Комитет ивгъуыд азы дыккаг æрдæджы баххуыс кодта 25 телефонон бастдзинады руаджы. Афтæ ма Комитет æмархайд кæны, сæ кæрæдзийæ чи фæхицæн, уыцы бинонты уæнгты æрбангом кæнынæн. Йе ‘ххуысы фæрцы ацы рæстæгмæ се ‘ввахс хиуæттимæ сæмбæлын кодтой 7 адæймаджы. Йæ æмархайды фæрцы куыд гуырдзийæгтæ, афтæ хуссайраг ирæттæй дæр ахст чи ис, уыдон хæстæджытæ сæм æрбарвыстой æрвитæггæгтæ. Цæвиттон, июлæй декабры мæйы онг Комитеты делегаттæ дыууæ хатты уыдысты ахст æмбæстæгты бынаты.Сырх Дзуары дыууæ Ныстуаны райст æрцыдысты æмæ сæ арвыстой сæ адресаттæм.
Сырх Дзуары Æхсæнадæмон Комитет æххуыс кæны иууыл тыхстдæр категорийы æмбæстæгтæн, фæхæццæ сæм кæны хæлцадон æмæ æнæхæлцадон товартæ. Ахæм æххуыс æрвылквартал дæр фæхæццæ кæнынц, æввахс хиуæттæй хъусдард кæмæ нæй, уыцы иунæгæй цæрæг зæрæдтæм. Афæдзы дыккаг æрдæджы æххуыс райстой 261 бинонтæй 361 адæймаджы Хуссар Ирыстоны цыппар районы. Иумиагæй сисгæйæ, сæм аластой 1472 хæлцадон пакеты, 499 гигиенæйы æмбырдгонды æмæ хъармгæнæн сезонмæ та 400 кубометры суг.
Комитеты кусджытæ дарддæр цæуынц санитарон хъусдарды тыххæй хæдзæрттæм æмæ бабæрæг кодтой ацæргæ æмæ иунæгæй цæрæг 13 æмбæстаджы. Уыцы нысанæн æрвылбон дæр цыдысты Цхинвалы горæт æмæ къуыри иу хатт та – Цхинвал, Ленингор æмæ Знауыры районты хъæутæм. Æмбæстæгтæй алкæмæн дæр хæлцадон продукттæ, стæй фыццаградон æндæр товартæ æлхæныны се ‘нцой балæууыдысты, æфснайдтой сын сæ цæрæн бынæттæ, хастой сын дон, афтæ ма сын æххуыс кодтой æнæниздзинад хъахъхъæныны уагдæттæм сæ бакæныны. Комитеты экономикон æдасдзинады хайады кусджытæ бынæттон хицауадимæ æнгом бастдзинады фæстиуæгæн бакодтой административон æххуыс 12 бинонтæн. Уыдонæн алыгъуызон аххосæгтæм гæсгæ сæхицæн сæ бон нæ уыд сæ документтæ бацæттæ кæнын кæнæ та социалон æххуыс райсын. Декабры мæйы организаци æрцыд æртæбонон тренинг Æнæниздзинад хъахъхъæнын æмæ социалон рæзты министрады 36 социалон кусæг æмæ психологæн посттравмæйон ситуацитæ æмæ стрессты баххуыс кæныны тыххæй. Ацы тренингы нысан уыд, цæмæй баххуыс кæной цæрджыты иууыл тыхстдæр категорийы адæймæгтæн. Комитет ма се ‘нцой балæууы, йе нæниздзинад мæгуырау кæмæн вæййы, уыцы рынчын æмбæстæгтæн дæр. Афтæ æмæ афæдзы дæргъы æнæаргъæвгæ медицинон æххуыс бакæныны тыххæй тагъд æххуыс ацыд 115 хатты.
ХУЫБИАТЫ Никъала
Comments are closed, but trackbacks and pingbacks are open.