Нæ горæты æрыгон техникты станц бирæ ахуыргæнинæгтæн ссис сæ уарзондæр бынат. Скъолайы уроктæ куы фæвæййынц, уæд ардæм æрбацæуынц сæ уарзон кружоктæм æмæ сæ цы техникон предметтæ цымыдис кæны, уым практикон æгъдауæй фæархайынц. Ныртæккæ станцы архайы ахæм кружоктæ, куыд робототехникæ, арæхстджын къухтæ, хъæддæсныйы, электроникæ, математикæ, компьютерон класс, 3 D моделтæ аразæн, хъæдæрмæгыл нывæфтыдтæ кæнын. Фæсурокты ардæм цы 150 скъоладзауы æрбацæуы, уыдон фылдæр сты лæппу ахуырдзаутæ. Иууыл тынгдæр сæ цымыдис кæны робототехникæ æмæ 3D моделтæ аразыны кружоктæ. Чызджытæ та фылдæр цæуынц арæхстджын къухты кружокмæ. Хъæдæрмæгыл нывæфтыдтæ кæй цымыдис кæны, ахæм-тæ дæр разыны чызджытæй.
Æвзонг техникты станцы куыд зæгъынц, афтæмæй сæ сæйраг хæсыл нымайынц, цæмæй сæм цæуой фылдæр æвзонг лæппутæ æмæ чызджытæ. Уымæн æмæ, зæгъгæ, ныртæккæ техникты станц ифтонг у æппæтæй дæр. Цалдæр азы размæ станцы бæстыхай цалцæг æрцыд æмæ ныр алы аз дæр Ахуырад æмæ зонады министрады хъæппæрисæй кружоктæ баххæст вæййынц нырыккон ифтонггæрзтæй. Цæмæй фылдæр сывæллæттæ зоной сæ кружокты архайды тыххæй, уыцы нысанæн ахуыр-гæнджытæ алы ног ахуыры азы райдианы азилынц, куыд горæты, афтæ районты скъолатыл дæр æмæ сын бамбарын кæнынц кружокты нысаниуæджы тыххæй. Райдианы сывæллæттæн фæамонынц теоретикон зонындзинæдтæ, уый фæстæ ахизынц практикон ахуыртæм. Скъолатыл зилгæйæ, ахуыргæнджытæ семæ акæнынц ахуыргæн-инæгтæй дæр цалдæры, цæмæй уыдон сæ тæлмæнтæ радзурой, куыд архайынц кружокты.
Кружоктæй иууыл фылдæр ахуыргæнинæгтæ архайы робототехникæйы къорды æмæ мах дæр фæуазæг стæм уырдæм. «Нæ кружок нырма ивгъуыд аз байгом, фæлæ махмæ тынгдæр цымыдис кæнынц ахуыргæнинæгтæ, уымæн æмæ нæм ис роботтæ, ис сын сæрмагонд конструктор æмæ йæ хъуамæ сæмбырд кæнай. Развæлгъау бацæттæгонд программæмæ гæсгæ æххæст кæны, цы хæстæ йын кæныс, уыдон. Уый сывæллæттæм æвзæрын кæны стыр цымыдис æмæ махмæ зæрдиагæйдæр уымæн цæуынц», – зæгъы ацы кружокы ахуыргæнæг Плиты Инал.
Æвзонг техникты станцы хъомылгæнинæгтæ арæх вæййынц Цæгат Ирыстон-Аланийы техникон центр «Квантори»-йы. Уым цы конкурстæ ауадзынц, уым фылдæр хатт бацахсынц призон бынæттæ.
Плиты Инал ма нын куыд загъта, афтæмæй йæ ахуыргæнинæгты Цæгат Ирыстонмæ уый акæны практикæйы рацæуыны нысанæн дæр. Уымæн æмæ уым ис нырыккондæр робототехникæ æмæ уадз, фæлтæрддзинад исой. Цæгаттаг коллегæтæ, зæгъгæ, æрвылхатт дæр хорз райсынц сабиты, ауадзынц сын мастер-къластæ.
Раздæр Æвзонг техникты станцы уыд радиокружок дæр. Фæлæ фæстаг 10 азты йæ куыст банымæг. Иуæй дзы ифтонггæрзтæ кæй нæ уыд, уый аххосæй, аннæмæй та кружокæн нæ уыд специалист. Ныр сæм фæзынд ахæм ахуыргæнæг, кружок дæр сифтонг кодтой æнæмæнгхъæуæг техникæйæ. Нæ дуджы ацы кружок æрбакæнынæн стыр ахадындзинад ис. Уымæн æмæ нæ республикæйы арæзт æрцыд нымæцон телеуынынад, ис нæм радиостанц дæр. Ацы профессийыл куынæ цайдагъ кæнæм хъомылгæ-нинæгты, уæд фидæны нæ уыдзæн, уым чи куса, ахæм специалисттæ.
Æвзонг техникты станц интенсивон куыст кæны, районты сын цы къордтæ ис, уыдонимæ. Зæгъæм, сæ филиалтæ сты Дзауы астæуккаг скъолайы, Цхинвалы скъола-интернаты æмæ ма 10-æм скъолайы. Уым дæр кружоктæ ифтонг сты хъæуæг æрмæджытæй. Сабиты куыстытæ бæрæг кæнынмæ ацæуынц профилон кружокты ахуыргæнджытæ. Цæмæй Æрыгон станцы ахуыргæнинæгтæ æмæ районты сывæллæттæ æмбæлой æмæ кæрæдзийы зоной, уый тыххæй сæ арæх æрбакæнынц, станцы цы равдыстытæ уагъд фæцæуы, уырдæм. Уыцы хъуыддаджы сын ахъаз у, Хицауады æххуысæй цы машинæ балхæдтой, уый.
Хъæддæсныйы æмæ арæхстджын къухты кружокты сывæллæттæ цы дзаумæттæ саразынц, уыдон æлхæнынмæ арæх æрбацæуынц не ‘мбæстæгтæ. Иууыл хуыздæр куыстытæ та æфснайд æрцæуынц станцы музейы.
УАЗÆГТЫ Марфа
Comments are closed, but trackbacks and pingbacks are open.