Фыдыбæстæ хъахъхъæнæджы боны цытæн нæ республикæйы Национ музейы байгом бæрæгбонон равдыст, цыран адæмы рæгъмæ хаст æрцыдысты патриотикон, æфсæддон æмæ Райгуырæн зæхмæ уарзондзинады темæйыл фыст хуызфыссынадон куыстытæ. Экспозици цы хъæздыг æмæ мидисджын нывтæй конд у, уыдонæн сæ автортæ сты зындгонд нывгæнæг Тугъанты Махарбег æмæ нырыккон нывгæнджытæ. Равдысты цы æрмæджытæ ис, уыдоны æвдыст цæуынц Ирыстоны историйы трагикон цаутæ, кæцыты ирдæй æвдыст цæуы Фыдыбæстæ хъахъхъæнджыты тох знæгтимæ Райгуырæн зæхх бахъахъхъæныны сæрвæлтау.
Национ музейы директор Зассеты Мераб куыд загъта, афтæмæй ацы равдыст у цымыдисон алы кары адæмæн дæр. «Бæрæгбонон равдыст кæстæр фæлтæрæн у тынг пайда, уымæн æмæ базонгæ уыдзысты нæ истори æмæ йæ хъайтартимæ. Равдысты хайад исынц куыд зындгонд нывгæнджытæ, афтæ æрыгæттæ дæр. Нæ фæсивæд, æмткæй нæ адæм, хъуамæ аивады руаджы дæр зоной ацы ахсджиаг бæрæгбоны нысаниуæг æмæ нæ истори», – банысн кодта музейы директор. Уый ма куыд фехъусын кодта, афтæмæй равдыст уагъд цæудзæнис 28-æм февралмæ.
Нæ уацх.
Comments are closed, but trackbacks and pingbacks are open.