Хуссарирыстойнаг скъоладзаутæй ацы аз 15-æй баулæфдзысты Хъырымы æхсæ-надæмон лагерь «Артек»-ы. Цалдæр азы фæд-фæдыл Уæрæсейы Федераци æмæ Хуссар Ирыстоны ахуырады министрадты бардзырдтæм гæсгæ уыцы зындгонд лагермæ æрвыст цыдысты æххуысхъуаг бинонты сывæллæттæ, сидзæртæ æмæ иттæг хорз чи ахуыр кæны, конкурсты æмæ олимпиадæты уæлахиздзаутæ.
Ацы аз «Артек»-ы къухдариуæггæнджытæ расидтысты сæрмагонд конкурс «Люди Артека», зæгъгæ, ахæм номимæ. Конкурсы фæлгæтты 29 бæстæйы сывæллæттæ, 12 азæй 17 азмæ кæуыл цæуы, ахæмтæ хъуамæ ныффыстаиккой оригиналон текст, сæ райгуырæн бæстæйæ раздæр азты «Артек»-ы чи улæфыд, иу ахæм адæймагыл. Конкурсы фæстиуджытæ бæрæг кодтой Мæскуыйы æмæ сæйраг приз та уыд – лæварæй Сау денджызы былгæрон æхсæнадæмон стырдæр курорт «Артек»-ы баулæфын.
Хуссар Ирыстоны ацы конкурс ауадзын сорганизаци кодта «Союз российских граждан» æмæ «Русский дом»-ы къухдариуæггæнæг Сергей Скворцов. Мæскуыйы жюри конкурсон тексттæй равзæрста 15. Уæлахиздзауты 11-æм июлы фæхуыдтой «Русский дом»-мæ. Сергей Скворцов сæм бахатыд: «Советон рæстæджы нæ бæстæйы цыдæриддæр размæдзыд ногдзаутæ æмæ пионертæ уыд, уыдонæн сæ бæллиц уыд «Артек»-ы баулæфын. «Артекæн даргъ æмæ цымыдисон истори ис. Курæг уæ дæн развæлгъау сахуыр кæнут, базонгæ ут «Артек»-ы историимæ. Зын рæстæджытæ куы уыд Уæрæсейæн, уæд йæ бынат куыд раив-баив кодта. 2014 азы Хъырым фæстæмæ УФ-йы скондмæ куы æрбацыд, уæдæй нырмæ «Артек» райста 20 мины бæрц сывæллоны. Уыдоны нымæцы сты Хуссар Ирыстоны сывæллæттæ дæр. 2025 азы «Артек» банысан кæндзæнис йæ 100-азон юбилей. Ацы цаумæ сæхи цæттæ кæнынц бæстонæй. Сæ зæрды ис масштабон мадзал ауадзын. Зæгъынц, зæгъгæ, уырдæм хуынд æрцæудзысты, Советон дугæй нырмæ дзы чи баулæфыд, æппæт уыдон».
Уæрæсейы æндæр регионтæй уыцы конкурсы уæлахиздзаутæ систы 800 скъоладзауы. Уыдонæн хæсгонд æрцыд, цæмæй алчи дæр бацæттæ кæна сæрмагонд программæ йæ бæстæйы истори æмæ традициты тыххæй. Хуссар Ирыстоны сывæллæттæ бацæттæ кæндзысты чысыл киноныв, националон кæфтытæ, зарджытæ, бакæсдзысты æмдзæвгæтæ. Нæ республикæ цы зын фæндæгтыл рацыд æмæ ныр УФ-йы руаджы цадæггай куыд æндидзы, дзурдзысты уыдæттыл дæр.
Сергей Скворцов ма сын загъта: «Курæг уæ дæн уæхи аккагæй равдисут. Уырдæм куы ныццæуат, уæд уæ адих кæндзысты къордтыл. Хайад исдзыстут конкурсты. Лагеры программæйы алыгъуызон ерыстæ цæудзæн – спортивон, сфæлдыстадон, техникон æмæ экологон фадыджы, æмæ ут активон. Сæйрагдæр та Хуссар Ирыстонæй ацæугæ сывæллæттæ иннæтæй хъуамæ хицæн кæной се ‘гъдауæй», – фæдзæхста сывæллæтты «Русский дом»-ы сæргълæууæг.
УАЗÆГТЫ Марфæ
