Паддзахадон киноконцертон зал «Чермен»-ы фыццаг хатт уагъд æрцыд гала-концерт нæ горæты æмæ районты скъолайы агъоммæйы кары уагдæтты хъомылгæнинæгты хайадистæй «Сегодня – звездочки, завтра – звезды», зæгъгæ, ахæм номимæ. Мадзал сорганизаци кодта республикæйы ахуырад æмæ зонады министрад. Йæ сæйраг нысан уыд курдиатджын сабиты рабæрæг кæнын. Ацы конкурс уагъд цыд иу мæйы дæргъы. Мадзалы хайад райстой иууыл курдиатджындæр сывæллæттæ, кæцыты æвзарæн туры рæстæджы равзæрста компетентон жюри. Сывæллæттæ сæ арæхстдзинад æвдыстой æртæ номинацийы: «Аив кæсын», «Хуыздæр вокал» æмæ «Хуыздæр кафт»-æй. Мадзалмæ фæуазæг сты РХИ-йы Ахуырад æмæ зонады министр Гасситы Натали, Республикæйы Культурæйы министр Зассеты Жаннæ æмæ Хицауады æндæр минæвæрттæ.
Æвзонг стъалытæ сценæйыл аив æмæ арæхстджынæй æвдыстой сæ номыртæ. Кастысты æмæ зарыдысты куыд ма-дæлон æвзагыл, афтæ уырыссаг æвзаг-ыл фыст æмдзæвгæтæ æмæ зарджытæ, сæххæст кодтой национ æмæ фæсарæйнаг кæфтытæ дæр. Алкæцы чысыл артист дæр тырныдта йæхи хуыздæр равдисынмæ. Номыртæ ‘ппæт дæр рауадысты тынг цымыдисон, фæлæ се ‘ххæстгæнджытæй уæддæр равзæрстой уæлахиздзауты. Сабитæ сæ ирд æмæ хъæлдзæг номыртæй барухс кодтой æрæмбырдуæвджыты зæрдæтæ.
Концерты кæрон ахуырад æмæ зонады министр Гасситы Натали стыр бузныг загъта сабидæтты хъомылгæнджытæ æмæ ныййарджытæн, мадзал афтæ хорз кæй бацæттæ кодтой, уый тыххæй æмæ уый фæстæ схорзæхджын кодта уæлахизуæвджыты. «Сценæйыл æцæгæйдæр уыдысты чысыл стъалытæ. Ног азы къæсæрыл мæ фæнды раарфæ кæнын æппæт сывæллæттæн дæр, уадз, æмæ уæ алкæмæй дæр фидæны рауайæт æцæг стъалытæ, æнæниз æмæ амондджын ут кæддæриддæр. Стыр бузныг æппæт сабидæтты хъомылгæнджытæн æмæ музыкæйы ахуыргæнджытæн дæр, сæ ныййарджытæн, кæцытæ хайад райстой мадзал бацæттæ кæнынмæ», – банысан кодта Гасситы Натали.
Мадзалы «РХИ-йы ахуырады сгуыхт кусæджы» кадджын ном лæвæрд æрцыд Джиоты Сæлимæтæн.
Республикон конкурс «Сегодня звездочки, завтра звезды»-йы III-аг къæпхæны дипломæй хорзæхджын æрцыдысты 3, 2 æмæ 6-æм сабидæттæ. II -æм къæпхæны дипломæй хорзæхджын æрцыдысты 7, 3, 15 сабидæттæ æмæ I – æм къæпхæны дипломæй та – 16, 5, 4 æмæ 20 сабидæттæ.
Сабидæтты хъомылгæнджытæ æмæ ныййарджытæ стыр бузныг загътой мадзалы организацигæнджытæн, сæ сывæллæттæн сын ахæм рæсугъд бæрæгбон кæй балæвар кодтой, уый тыххæй.
Уæлахиздзаутæн лæвæрд æрцыдысты зæрдылдарæн лæвæрттæ, суазæг сæ кодтой адджинæгтæй.
Кокайты Заринæ
Comments are closed, but trackbacks and pingbacks are open.