БАХЪАТЫ НУГЗАР

Ирыстоныл æрцыд уæззау зиан. Не ˊхсæнæй фæхъуыд поэт-публицист, къорд поэтикон æмбырдгондты автор Бахъаты Нугзар.

Бахъаты Ильяйы фырт Нугзар райгуырд Знауыры районы Бахъатыхъæуы 1934-æм азы, рухæны мæйы 25-æм бон. Райдиан скъолайы ахуыр кодта сæхи хъæуы. Йæ сабион æмæ æвзонджы бонтæ арвыста уым, 1953-æм азы каст фæцис Зиулеты астæуккаг скъола æмæ ахуыр кæнынмæ бацыд Хуссар Ирыстоны паддзахадон педагогон институты ирон филологон факультетмæ.

Каст æй куы фæцис, уæд дыууæ æмæ ссæдз азы куыста хъомылгæнæгæй. Уыд ахуыргæнæг, стæй  Уилда, Уæллаг Чере, Къоркъула, Уалыты хъæу æмæ Сарабукъы 8-азон скъолаты директортæй. Уыдон фæстæ куыста журнал «Фидиуæджы» критикæ æмæ публицистикæйы хайады редакторæй. Уыд рауагъдад «Ирыстон»-ы сæйраг редактор, стæй – йæ директор.

Бахъаты Нугзар фондз азы уыд Республикæ Хуссар Ирыстоны Парламенты депутат, уыимæ  ахуырад æмæ культурæйы комитеты сæрдар.

Нугзар æмдзæвгæтæ фыссын райдыдта, скъолайы ма куы ахуыр кодта, уæд, æмæ æппынæдзух тырныдта поэзийы сусæгдзинæдтæ рафæлгъауынмæ. Фæстæдæр уымæн загъта йæ царды нысан æвдисæгау: «Хиирхæфсæн нæу мæнæн поэзи – Кадæнхъæл лæгæн мæ худ нæ исын… Не знагæн йæ марæн нæмыг фестын, Ме ‘мбалæн та риссын æз йæ рисыл («Чиныгкæсæгмæ»).

Нугзар поэт-лирик кæй у, уый фæбæрæг йæ фыццаг æмдзæвгæтæй, стæй  йæ фыццаг чингуытæй: «Уалдзыгон райсом», «Ныстуан», «Æнæрынцой мелоди»-йæ æмæ абонмæ зарыд уыцы зæрдæйы уагæй. Цыбыр æмдзæвгæ фыстаид, æви кадæг, уæддæр дзы уынæм, лирикон хъайтары номæй йæхи зæрдæйæ чи фæулæфы, йæхæдæг кæуыл фæриссы, уыцы сагъæс.

Поэт æппынæдзух зарыд Фыдыбæстæ, мадæлон æвзаг, ирон лæджы удыхъæд, нæ ивгъуыд æмæ нæ абоныл. Ирыстон ын хицæнтæ никуы уыд: «мады риутæ дарынц къуыпп, дыууæ хохау, фæлæ сæ хъæбул нæ кæны хицæнтæ» («Ирыстон»). Адджын та йын, сæрыстыр кæмæй стæм, уыцы Чермен, Хазби, Иссæ æмæ бирæ ирон хъайтарты мад кæй басгуыхт, йæ авдæны сæ кæй ауызта, уый тыххæй уыд.

Бахъаты Нугзар уыд йæхирдыгон поэт. Цы дзæвгар аивадон чингуытæ ныффыссын ын бантыст: “Уарзондзинады зарджытæ”, “Уæлахизхæссæг”, “Фæстаг фыстæг”, “Мысæн бон”, “Уацмыстæ” æмæ æндæртæ, уыдон ын ирон адæмы ‘хсæн йæ ном амæлын никуы бауадздзысты.

Рухсаг у!

Ирыстоны Фысджыты цæдис