Нæ республикæйы барадхъахъхъæнæг органтæ исынц æппæт мадзæлттæ, цæмæй Ногазон бæрæгбонтæ ацæуой сабырæй æмæ ма улæфтыты рæстæджы дæр мацы фæткхалæн цаутæ æрцæуа.
Алчидæр æвдисæн у, уынгты цæугæйæ алырæттæй кæй фехъуысынц пиротехникæйы гуыппытæ, æмæ уый та халы адæмы сабырад. Стæй дзы ахæм «гуыппгæнæнтæ» ис, æмæ гранаты срæмыгъд йæ цуры ницы у, – æгæрыстæмæй, ма бирæуæладзыгон бæстыхай дæр ма базмæлы. Уый фæстиуæгæн цæрджытæ хъаст кæнынц барадхъахъхъæнæг органтæм, ома, нæ бон нал у уынгты æдæрсгæйæ цæуын. Уый фæдыл ист æрцыдысты алыхуызон мадзæлттæ, цæмæй ацы «гуыппгæнæнты» мауал уæй кæной. Фæлæ нæм уæддæр разыны ахæм амалиуæггæнджытæ, кæцытæ сусæгæй уæй кæнынц пиротехникон дзаумæттæ, æмæ бынтондæр ууыл нæ хъуыды кæнынц, – искæй хæрзчысыл саби фæтæрсдзæнис, кæнæ искæй сывæллон цæрæнбонтæм инвалидæй баззай-дзæнис.
Милицийы кусджытæ ныр дыууæ къуырийы дæргъы зилынц магазинтыл, индивидуалон амалиуæггæнджытыл æмæ сæ фæдзæхсынц, цæмæй ма уæй кæной пиротехникон продукци. Знон рейдон мадзæлтты хайад райста милицийы кинологон службæ дæр, æмæ æрмахуыр куыдзы фæрцы чысыл базары территорийы ссардтой дыууæ амалиуæггæнæгмæ «гуыппгæнæнтæ». Пиротехникон дзаумæтты нымæц уыд 1656. Барадхалджытыл баконд æрцыдысты административон суагъæтæ æмæ сын сæ товар та сконфискаци кодтой.
Уымæй уæлдай ма милицийы Фæндагон змæлды æдасдзинады управленийы кусджытæ дæр скъоладзаутимæ ауагътой профилактикон мадзæлттæ. Ахуырдзаутæн бамбарын кодтой, цæмæй ма халой фæндагон змæлды фæткойтæ, уæлдайдæр та сын Ногазон улæфтыты бирæ рæстæг кæй уыдзæнис хъазынæн, æмæ бахъахъхъæной сæхи фыдбылызæй. Уæлдай тынгдæр сæ бафæдзæхстой, цæмæй æнæ хистæр кары адæмы æххуысæй ма пайда кæной пиротехникон дзаумæттæй.
ДЖИОТЫ Александр
Comments are closed, but trackbacks and pingbacks are open.