Алы аз дæр нæ республикæйы бирæ æрцæуы пиротехникæимæ баст æнамонд цаутæ. Хъыгагæн сæ фылдæр вæййынц сывæллæттæ. Уыдонмæ кæсы цинау уыцы «гуыпгæнæнтæ» уынгты æмæ ма скъолаты дæр рæмудзын. Контрафактон пиротехникæ бирæ ис æмæ дзуапп нæ фæдæттынц æмбæлон нормæтæн, афтæмæй æрцæуы фыдбылыз. Сывæллæттæй бирæтæ семæ архайын дæр нæ фæзонынц æмæ уый фæстиуæгæн дæр фехæлынц сæ къухты. Ахæм «срæмыгъды» фæстæ бахауынц рынчындонмæ, кæнæ та тынг фæтæрсынц.
Ӕрмæст сывæллæттæ нæ, фæлæ ма хистæр кары адæм дæр тынг тыхсынц ацы «гуыпгæнæнтæй». Ӕнæнхъæлæджы дæ цуры исты куы срæмудза, уæд адæймаг бар-æнæбары фæтæрсдзæнис. Ӕмæ адæмæй та бирæ ис низджынтæ, – чи йæ зæрдæйæ хъæрзы, кæмæн йæ туджы æлхъывдад бæрзонд вæййы. Ахæм гуыппы фæстæ сæхи фæхатынц бирæ æвзæрдæр æмæ дзы бирæтæ бахауынц рынчындонмæ дæр.
Сывæллон ууыл нæ хъуыды кæны æмæ фыдбылыз аразы. Фæлæ сæ хистæртæ хъуамæ хизой ацы æвзæрдзинадæй. Вæййы ахæм цаутæ дæр æмæ хистæртæ сæхæдæг фелхæнынц ацы контрафактон пиротехникон дзаумæттæ сæ сывæллæттæн æмæ фыдбылыз куы æрцæуы, уæд фæаххосджын кæнынц магазингæсты æмæ ма милицийы кусджыты дæр. Пиротехникон дзаумайы бынтондæр хорзæй ницы ис æмæ йæ дæ сывæллонæн дæр хъуамæ бамбарын кæнай æмæ йæм дæ хъус дарай, цæмæй дзулы бæсты «гуыпгæнæн» ма балхæна.
Цæмæй фыдбылыз ма æрцæуа, уый фæдыл æрвылаз дæр милицийы кусджытæ ауадзынц рейдон мадзæлттæ пиротехникæйы тыххæй. Ныридæгæн дæр зилынц горæты магазинтыл æмæ сæ фæдзæхсынц, цæмæй ма ласой Хуссар Ирыстоны территоримæ контрафактон пиротехникон дзаумæттæ æмæ сæ ма уæй кæной. Ссаргæ товар æрцæуы ист æмæ куынæг актмæ гæсгæ. Горæты милицийы фадыгон инспектортæ æрвылбон дæр бæрæг кæнынц сæ территорийы магазинты, фæлæ нырма нæ рабæрæг кодтой «гуыпгæнæнтæ» уæй кæныны цаутæ. Рейдон мадзæлттæ уагъд цæудзысты республикæйы районты дæр. Фæлæ ныридæгæн дæр уынгты фехъусæн ис гуыппытæ. Уый та ууыл дзурæг у, æмæ чидæртæ уæддæр сусæгæй кæй уæй кæнынц æнæзакъонæй ацы пиротехникон дзаумæттæ.
Джиоты Александр
Comments are closed, but trackbacks and pingbacks are open.