Аивгъуыйгæ азы Цхинвалы районы администрацийы Культурæйы управлени бæрæг куыст кодта цæрджыты сæрибар рæстæг æмбæлон æмвæзадыл организаци кæныныл æмæ районы фæсивæды национ культурæмæ æрбаввахсдæр кæныныл. Уый та, Культурæйы управленийы хистæр Гаглойты Ростик куыд зæгъы, афтæмæй къухты æфтыд культурæйы объектты материалон-техникон базæ кæй хуыздæр кодта æмæ сфæлдыстадон коллективты профессионалон æмвæзад рæзын кæныныл стыр куыст кæй цæуы, уый фæстиуæгæн.
Раздæры азты арæзт чи æрцыдысты, уыцы сфæлдыстадон коллективтæ – адæмон ансамбль “Амонд” , фольклорон ансамбль, адæмон театр, вокалон къорд “Ирон фæндыр”, æмæ сывæллæтты ансамбль “Малусæг” ахызтысты хæдархайгæ коллективты фæлгæттæй æмæ сæхи бауарзын кодтой республикæйы æппæт сценæмæкæсджытæн дæр. Районы культурæйы управленийы ма архайынц вокалон-инструменталон ансамбль “Арвырон”, сывæллæтты хореографион ансамблтæ Къостайыхъæуы, Хелцуайы, Тъбет æмæ Дменисы хъæууон культурæйы хæдзæртты, афтæ ма бæрæг куыст кæнынц хæдархайгæ аивады алыгъуызон кружоктæ дæр. Аивгъуыйгæ азы карантинон мадзæлттæ баконд кæй æрцыдысты, уымæ гæсгæ районы культурæйы управленийы куыст зынгæбæрцæй бакъуылымпы. Фæлæ, уæддæр зæгъæн ис бирæ арæзт кæй æрцыдис.
Культурæйы къабазы фæдыл ивгъуыд аз райдыдта ногазон бæрæгбонтæй. Цхинвалы районы сывæллæттæн бакодтой ногазон лæвæрттæ æрмæст районы культурæйы номæй нæ, фæлæ РХИ-йы Президент æмæ районы администрацийы сæргълæууæджы номæй дæр. Афтæ ма организаци æрцыдысты бæрæгбонон изæртæ, сывæллæтты утрениктæ, концерттæ. Дменисы культурæйы хæдзары ауагъдæуыд ногазон карнавал Цхинвалы районы сывæллæттæн.
Сыгъдæг Валентины бон эстрадон концерттæ ауагъд æрцыдысты районы культурæйы хæдзæрт-ты. Централон библиотекæйы кусджытæ сорганизаци кодтой мадзал “Уарзæтты бон”, зæгъгæ.
Фыдыбæстæ хъахъхъæнæджы бонмæ хъæууон клубты организаци æрцыдысты фембæлдтытæ æфсæддон службæгæнджытимæ. Вокалон къорд “Ирон фæндыр” æмæ вокалон инструменталон ансамбль “Арвырон” концерттæ радтой арæнгæрон заставæты. Октябры мæйы бацæттæ æрцыд мадзал “Табуйаг сты нæ рухс кувæндæттæ”, зæгъгæ, кæцы хъуамæ уагъд æрцыдаид Джеры дзуары кувæндоны территорийыл, фæлæ карантины фæстиуæгæн уый уагъд не ‘рцыд.
Сентябры мæйы Зары культурæйы хæдзары ауагъдæуыд конкурс “Цæйут чызджытæ”, зæгъгæ, Цхинвалы культурæйы хæдзæртты æхсæн. Фæуæлахизуæвджытæ хорзæхджын æрцыдысты лæвæрттæ æмæ грамотæтæй.
Хетæгкаты Къостайы райгуырдыл 162 азы сæххæсты бон культурæйы управленийы кусджытæ дидинджытæ сæвæрдтой Къостайы цырты раз, хъæууон библиотекæты организаци æрцыдысты Хетæгкаты Къостайы цард æмæ сфæлдыстадимæ баст равдыстытæ.
Банысан кæнын хъæуы адæмон театр, вокалон къорд “Ирон фæндыр” æмæ вокалон-инструменталон ансамбль “Арвырон”-ы архайд, кæцытæ аивгъуыйгæ азы дæргъы систематикон æгъдауæй æвдыстой спектаклтæ æмæ концерттæ республикæйы хъæуты цæрджытæн. Ныртæккæ Цхинвалы районы культурæйы объектты техникон уавæр мæгуырау нæу. Фæлæ Тъбеты культурæйы хæдзары хъармгæнæн системæйы хъæуы капиталон цалцæг. Районы культурæйы царды аивгъуыйгæ аз ахсджиаг цау уыдис Дменисы культурæйы хæдзар эксплуатацимæ раттын. Уый хъæуæг ифтонггæрзтæй сифтонг кæнынмæ стыр хайбавæрд бахаста РХИ-йы Президент Бибылты Анатоли. Йæ рахицæнгонд фæрæзтæй самал чындæуыд хъæдын дзаумæттæ æмæ сценикон дарæс. Фæлæ культурæйы хæдзар нырма дæр хъуаг у музыкалон аппаратурæйæ.
Банысан кæнын хъæуы уый, æмæ ныр цалдæр азы дæргъы æнæаскъуыддзаггондæй кæй зайы адæмон ансамбль “Амонд”-æн штаттæ рахицæн кæныны фарст. Артисттæн се`мбис кусынц æрдæг штаттыл æмæ сын цъус мызд кæй ис, уый тыххæй бæрзонд у кадрты ивылынад. Ансамбль “Амонд”у республикæйы сæйрагдæр сфæлдыстадон кол-лективтæй иу, кæцы нæ бæстæйы кад хъахъхъæны арæнтæй æддейæ дæр. У бирæ æппæтуæрæсейон æмæ дунеон фестивалты лауреат æмæ призер. Ныртæккæ дæр ансамбль “Амонд” у паддзахадон ансамбль “Симдæн” кадртæ цæттæгæнæг.
Æмбæлон куыст бачындæуыд ахæм фарстытыл, куыд зымæгон сезонмæ бацæттæ кæнын æмæ бынæттон периодикон мыхуыр рафыссын кæныныл дæр.
БЕСТАУТЫ Валя
Comments are closed, but trackbacks and pingbacks are open.