Ивгъуыд аз Цхинвалы районы цæрджыты ‘хсæн культурон-дзыллон куыст зынгæ фæмидисджындæр. Районы культурæйы управленийы кусджытæ фылдæр хъусдард здæхтой сфæлдыстадон коллективты материалон базæ фидардæр кæнынмæ, кадрты квалификаци бæрзонддæр кæнынмæ æмæ цæрджыты сæрибар рæстæг хуыздæр организаци кæнынмæ. Раздæр арæзт чи æрцыдысты, уыцы сфæлдыстадон коллективтæ, ахæмтæ куыд адæмон ансамбль «Амонд», фольклорон ансамбль, адæмон театр, вокалон къорд «Ирон фæндыр» æмæ сывæллæтты ансамбль «Малусæг» раджы ахызтысты хæдархайгæ коллективты фæлгæттæй æмæ фæндаг ссардтой æппæт республикæйы сценæмæкæсджыты зæрдæтæм. Уыдонæй дарддæр ма архайынц вокалон-инструменталон ансамбль «Арвырон», сывæллæтты хореографион ансамблтæ Къостайыхъæуы, Тъбеты, Хелцуайы æмæ Дменисы хъæууон культурæйы хæдзæртты, афтæ ма алыгъуызон аивадон хæдархайгæ кружоктæ.
Аивгъуыйгæ азы мадзæлттæ райдыдтой ногазон мадзæлттæ организаци кæнынæй. Районы æппæт хъæууон клубты дæр уагъд æрцыдысты изæртæ, сывæллæтты утренниктæ, концерттæ, Тъбеты хъæууон культурæйы хæдзары та районы сывæллæттæн уагъд æрцыд Ногазон карнавал. Æппæт хъæууон клубты дæр мадзæлтты хайадисджытæн уæрст æрцыдысты ногазон лæвæрттæ.
Февралы ауагъд æрцыд Цхинвалы районы сфæлдыстадон коллективты хыгъдон концерт. Сыгъдæг Валентины бон та эстрадон концерттæ раттой культурæйы хæдзæртты.
Фыдыбæстæ хъахъхъæнæджы боны цытæн хъæууон библиотекæйы сарæзтой фотостендтæ, Стыр Фыдыбæстæйон хæсты ветерантæ æмæ ирон адæмы хъайтарты тыххæй литературæйы равдыстытæ, организаци цыдысты ветерантимæ фембæлдтытæ. Уыдонæн арфæ ракæнынмæ цыдысты сфæлдыстадон интеллигенцийы минæвæрттæ. Арæнгæрон заставæты æфсæддон службæгæнджытæн равдыстæуыд концерттæ.
Сылгоймæгты бæрæгбонмæ æппæт клубты дæр организаци æрцыдысты бæрæгбонон изæртæ, юмористон мадзæлттæ та – Юмор æмæ худæн бонмæ.
Хæрзаудæн концерттæ лæвæрд æрцыдысты Стыр Уæлахизы бонмæ дæр, уымæй дарддæр ма Тъбеты культурæйы хæдзары ауагъд æрцыдис æрыгон чиныгкæсджыты æмæ нывгæнджыты конкурс.
Районы культурæйы сфæлдыстадон коллективтæ активон хайад райстой республикæйы уагъдцæуæг Уæрæсейы Бонты. Афтæ ма активон хайад райстой РХИ-йы хæдбардзинад банымайыны боны цытæн цы мадзæлттæ организаци æрцыдысты, уыдоны.
Культурæйы управлени стыр куыст бакодта республикæйы 26 азы бæрæгбонмæ цæттæ кæныны фæдыл. Бакуыстгонд планмæ гæсгæ бæрæгбонон мадзæлттæ уагъд æрцыдысты Цхинвалы районы хъæуты.
Районы культурæйы управлени йæ архайды сæрмагонд хъусдард здæхта национ культурæ рæзын кæнынмæ здæхт мадзæлттæм. Сæрмагондæй бакуыст планмæ гæсгæ районы хъæууон клубтæ æмæ библиотекæты организаци кодтой чингуыты равдыстытæ, уагътой тематикон изæртæ, поэзийы изæртæ, диспуттæ ирон фысджыты сфæлдыстады фæдыл, концерттæ, æрыгон чиныгкæсджыты æмæ нывгæнджыты конкурстæ.
Хетæгкаты Къостайы райгуырды 157 азы бон Къостайыхъæуы нысан æрцыд сфæлдыстадон интеллигенциимæ фембæлдтытæй, концерттæ æмæ равдыстытæй. Æппæт объекттæ дæр ифтонг уыдысты цæстуынгæ агитацийæ, ауагъдæуыд æндæр мадзæлттæ дæр. Джеры хъæуы та уагъд æрцыд зынгæ ирон фыссæг Гуыцмæзты Алешы тыххæй мадзал.
Культурæйы управленийы кусджытæ æмæ сфæлдыстадон коллективтæ хайад райстой ахæм ахсджиаг мадзæлтты куыд гуырдзыйы агрессийы амæттæгты мысæн боны митинджы, бæгæныфыцджыты конкурс «Ирон бæгæны»-йы, кæцы уагъд цыд Къостайыхъæуы, Нафийы юбилейон изæры, Медицинон кусæджы боны æмæ БТК-4-йы юбилейы бæрæгбонон мадзæлтты.
Традицимæ гæсгæ хæрзаудæн акци уагъд æрцыд пансионат «Аудындзинад»-ы.
Районы культурæйы управленийы коллективтæ ивгъуыд аз æдæппæт радтой 20 концерты æмæ равдыстой 10 спектаклы республикæйы цæрджытæн. Хæрзаудæн концерттæ лæвæрд æрцыдысты Ленингоры районы дæр.
Ансамбль «Амонд» хайад райста фестиваль «Зори Алании»-йы, кæцы уагъд цыдис Дзæуджыхъæуы. Ессентукы горæты та фестиваль «Терпсихора России»-йы æмæ дзы райста Гран-при.
Азы кæрон декабры мæйы районы культурæйы æппæт объектты дæр ауагъд æрцыдысты хыгъдон мадзæлттæ.
Культурæйы объектты материалон-техникон базæйы тыххæй дзургæйæ, банысан кæнын хъæуы, уавæр бæрæг кæй фæхуыздæр, фæлæ уæддæр нæма фаг кæны дарæс сфæлдыстадон коллективтæн, цалцæг нæма æрцыдысты Дменис æмæ Зары культурæйы хæдзæрттæ. Зæгъын хъæуы уый дæр æмæ кæд 2011 азы сентябры мæйы республикæйы хицауад адæмон ансамбль «Амонд»-æн рахицæн кодта штатон иуæгтæ, уæддæр артисттæн се ‘мбис нырма кусынц æрдæг æмæ ноджы къаддæр мыздыл. Районы культурæйы управленийы сæргълæууæг Гаглойты Ростик уый фæдыл бахатыд районы администрацийы сæргълæууæгмæ, фæлæ фарст нырма скъуыддзаг не ‘рцыд.
Рæстæгыл мадзæлттæ ист æрцыдысты зымæджы сезонмæ бацæттæ кæныны фæдыл, бакуыстæуыд бынæттон периодикон мыхуыр рафыссыныл. Афтæ ма систематикон æгъдауæй уагъд цыдысты семинарон ахуыртæ районы культурон уагдæтты кусджытæн, практикон æххуыс сын цыдис бынæтты.
Бестауты Валя
Comments are closed, but trackbacks and pingbacks are open.