Газет «Хурзӕрин»-ы сӕдӕазон юбилейыл йӕ коллектив сӕмбӕлд куыстхъомӕй. Уыдоны ‘хсӕн ӕвӕллайгӕ ӕмӕ цӕсгомджын куыст кӕнынц корректортӕ Джиоты Фатимӕ ӕмӕ Лалыты Ленӕ.
Сӕ фӕлтӕрд цӕстытӕ, сӕ зонындзинӕдты руаджы сӕ фыссӕн сисы бынӕй нӕ ирвӕзы, сӕ куыст сӕйраджы цы у, уый – рӕдыдтытӕ раст кӕныны ахсджиаг хъуыддаг.
Джиоты Фатимӕ райгуырд Ирыстоны рӕсугъддӕр къуымтӕй сӕ иу – Дзауы районы Хуыцъейы хъӕуы 1960 азы бӕркадджын фӕззӕджы кӕфты мӕйы 20-ӕм бон. Ахуыр кӕнынмӕ бацыд Дзауы скъола-интернатмӕ. Интернаты алкӕй сывӕллонӕн нӕ уыд фадат ахуыр кӕнынӕн. Иуӕй, йӕ ном йӕхиуыл дзурӕг у, скъола – интернат – сидзӕр ӕмӕ дӕрддзӕф хъӕуты сывӕллӕттӕ кӕм ахуыр кӕнынц, ахӕм бынат. Аннӕмӕй та бирӕ ныййарджытӕ тырныдтой, цӕмӕй йӕ сывӕллон уырдӕм цӕуа ахуырмӕ, уымӕн ӕмӕ ахуыры процесс уагдоны уыд бӕрзонд ӕмвӕзадыл. Астӕуккаг ахуырад иттӕг хорз нысӕнттыл каст фӕуыны фӕстӕ, нӕ уацы хъайтар уӕлдӕр ахуырад райсыны нысанӕн бацыдис Хуссар Ирыстоны паддзахадон педагогон институтмӕ. 1983 азы каст фӕцис ирон-фӕсарӕйнаг факультет.
Уӕды рӕстӕджы уӕлдӕр ахуырад райсыны фӕстӕ ӕвзонг фӕсивӕды ӕрвыстой ӕндӕр ӕмӕ ӕндӕр рӕттӕм кусынмӕ, фӕлӕ уыцы амонд не ‘рхаудта Фатимӕмӕ. Куыстуарзаг ӕвзонг чызг аскъуыддзаг кодта, кӕй нӕ баддзӕн йӕ ныййарджыты къонайы фарсмӕ, фӕлӕ кӕмфӕндыдӕр кӕй бакусдзӕн.
Куыстагур ӕрцыд горӕтмӕ, ӕмӕ уыцы аз ирон ахуыргӕнӕджы бынат ссардта Знауыры районы Зиулеты астӕуккаг скъолайы. Скъолайы директоры нӕ уырныдта, зӕгъгӕ, ӕвзонг чызг горӕтӕй дӕрддзӕф, ӕцӕгӕлон хъӕуы нӕ бафӕраздзӕн ку-сын.
«Уыд ноябры мӕй. Фыццаг хатт мӕ мадыфсымӕримӕ ацыдтӕн Зиулетмӕ, скъоламӕ. Куыстон уал рӕстӕгмӕ. Уый фӕстӕ 1984 азӕй районы ахуырады уынаффӕмӕ гӕсгӕ 1 январӕй бӕстонӕй ӕрӕвнӕлдтон ахуыргӕнинӕгтӕн ирон ӕвзаг ӕмӕ литературӕ амонынмӕ», – зӕгъы Фатимӕ.
Уыцы хӕрзиуӕгон хъуыддаг ӕвзонг чызджы къухты бафтыд скъолайы къухдариуӕгады хъӕппӕрисӕй, уымӕн ӕмӕ районы ахуырады хайадмӕ ныффыстой фыстӕг, кӕй у намысджын, ӕмӕ цӕстуарзонӕй кӕй амоны йӕ предмет ахуыргӕнинӕгтӕн.
Фатимӕ ӕрмӕст ирон ӕвзаг ӕмӕ литературӕйы предмет нӕ амыдта фӕлӕ немыцаг ӕвзаг дӕр. Фӕлӕ царды фӕзилӕнтӕ ӕбӕрӕг сты. Скъолайы кусгӕйӕ куысты бынат ссардта, абон кӕй ӕнусон юбилейыл сӕмбӕлдыстӕм, нӕ уыцы уарзон ирон газеты.
Зиулеты скъолайы фӕкуыста 1987 азмӕ. Уыцы аз райхъал ӕвзонг чызджы амонд ӕмӕ йӕ цард баиу кодта Беджызаты хъал лӕппу Таймуразимæ. Схъомыл кодтой фы-ры хъулы хуызӕн фырт ӕмӕ Сатанайы хуызӕн чызджы.
«Мӕхи базонынхъом куы фӕдӕн, уӕдӕй фӕстӕмӕ мӕ иузӕрдион хӕларыл нымадтон газет «Хурзӕрин»-ы. Ӕнӕрхъӕцӕй ӕнхъӕлмӕ кастӕн, газеты радон номыр нӕм постхӕссӕг кӕд ӕрбахӕсдзӕн ӕмӕ та дзы цымыдисон цы ӕрмӕджытӕ, ног хабӕрттӕ кӕд бакӕсдзынӕн, уымӕн ӕмӕ уӕд дӕр ӕмӕ ныр дӕр иунӕг хабар ӕмӕ ӕрцӕугӕ цау дӕр йӕ иувӕрсты нӕ уагъта ӕмӕ нæ уадзы нӕ уарзон газет», – афтӕ хъомыл кодта нӕ газетмӕ цымыдисгӕнгӕйӕ, йӕ фидӕны корректор Фатимӕ. Ӕмӕ ныр йӕ лӕмбынӕг ӕмӕ бӕрнон ахасты руаджы мыхуырмӕ цы газет фӕцӕттӕ цӕуы, уый ӕрмӕджытӕ газеты сыгъдӕг цӕуынц орфографион ӕмӕ пунктуацион рӕдыдтытӕй.
Бирӕ хорз мысинӕгтӕ ӕрымысы абон нӕ газеты разагъта корректор, суанг йӕ фыццаг ӕрбакъахдзӕфӕй абоны онг газеты редакцийы кусгӕйӕ. Рӕстӕг куыд размӕ цӕуы ӕмӕ ивы, афтӕ ивы адӕймаджы уагахаст, йӕ цӕстӕнгас ӕмӕ ӕндӕр ӕууӕлтӕ, раздӕр, зӕгъгӕ, хъӕлдзӕгдӕр ӕмӕ ӕндӕрхуызон цыма уыдысты газеты кусджытӕ. Ныр кӕм хӕст, кӕм вирусы пандеми сӕхирдыгонау фӕд ныууагътой адӕймагыл, гъе та цард фӕвазыгджындӕр…
Йӕ иузӕрдион куысты руаджы Джиоты чызг хорзӕхджын ӕрцыд Республикӕ Хуссар Ирыстоны Президент ӕмӕ Парламенты Кады грамотатӕй, Информаци ӕмӕ мыхуыры паддзахадон комитеты Кады грамотайӕ, юбилеон майдан ӕмӕ Арфӕйы фыстӕджытӕй.
Ӕнхъӕлмӕ кастӕн газеты алы номырмӕ
Цӕмӕй кӕцыдӕр адӕймаджы цард, йӕ фӕллойадон архайд адӕмы размӕ рахӕссай, уый тыххӕй йӕ кӕнӕ хорз хъуамӕ зонай, кӕнӕ та йын хорз сахуыр кӕнай йӕ царды хабӕрттӕ. Лалыты Ленӕйы дӕр Фатимӕйау рагӕй зонын ӕмӕ мын ӕнцон у уый тыххӕй фыссын.
Ленӕ дӕр у ирон сылгоймаджы уӕздандандзинад ӕмӕ хиуылхӕцындзинады бӕрзонд миниуджытӕ хӕссӕг адӕймаг. Райгуырд Дзауы районы Нӕзыджыны хъӕуы алæмӕтон ӕрдзы хъӕбысы 1955 азы тӕргӕйтты мӕйы 10-æм бон. Астӕуккаг скъола каст фӕуыны фӕстӕ нӕ пединституты каст фӕцис дыууӕ факультеты – райдиан ахуыры педагогикӕ ӕмӕ методикӕйы ӕмӕ ирон ӕвзаг ӕмӕ литературӕйы факультет фӕсаууонмӕ.
Уӕлдӕр ахуырад райсыны хӕдфӕстӕ ӕвзонг чызджы арвыстой кусынмӕ Боржомы районы Гудзареты хъӕуы астӕуккаг скъоламӕ ахуыргӕнӕгӕй. Уым бакуыста дыууӕ азы. Уый фӕстӕ баздӕхт йӕ хъӕумӕ ӕмӕ куыста Хъемултайы скъолайы, уырдыгӕй та ацыд Цӕгат Ирыстонмӕ ӕмӕ Ногиры хъӕуы астӕуккаг скъолайы куыста ирон ӕвзаджы ахуыргӕнӕгӕй. Фӕлӕ уӕддӕр ӕвзонг чызджы райгуырӕн къуым йӕхимӕ ӕлвӕста ӕмӕ фӕстӕмӕ ӕрӕздӕхт Хуссар Ирыстонмӕ.
«Чысылӕй фӕстӕмӕ иузӕрдион уыдтӕн нӕ уарзон ирон газетыл. Мӕ фыд Гаврил-иу ӕрвылаз дӕр рафыста газет «Советон Ирыстон» (уӕд ахӕм номимӕ цыд «Хурзӕрин»). Мах, сывӕллӕттӕ дӕр тынг цымыдис кодтам газетмӕ. Абонау мӕ зӕрдыл лӕууы – мӕ фыд-иу газеты сыфтӕ куыд фӕлдӕхта ӕмӕ-иу сӕ куыд каст. Уый фӕстӕ та мах – рады лӕууыдыстӕм, газет нӕ бар кӕд бауыдзӕн, ӕмӕ йӕ мах та фӕстаг сыфӕй фӕрсын кӕд райдайдзыстӕм…», – Ленӕ куыд зӕгъы, афтӕмӕй йӕм цымыдисондӕр каст фӕстаг фарс ӕмӕ-иу ӕй уырдыгӕй райдыдта кӕсын.
Раздӕры рӕстӕджы «Советон Ирыстон»-мӕ ӕнцон нӕ уыд куыстмӕ бахауын. Ленӕ бирӕ фӕлвӕрдта газеты редакцимӕ кусынмӕ бацӕуыныл, ӕмӕ йӕ бӕллиц сӕххӕст – газеты корректоры куыст куы фӕзынд, уӕд ӕй райстой. Уый уыд 1982 азы. Уӕдӕй абонмӕ ӕнӕрынцой фӕллой кӕны ацы редакцийы Лалыты чызг.
Ӕнӕуӕрст адӕмӕй Ленӕмӕ йӕ рӕстӕджы ӕрхауд Дзукъаты Гоги. Мадымайрӕмы цӕст сын бауарзта иу фырт ӕмӕ иу чызджы. Фыдӕбӕттӕ кӕнгӕйӕ схъомыл кодтой сӕ кӕсдӕрты. Уыдон сӕ амӕндтӕ ссардтой, фӕлӕ, ӕвӕццӕгӕн, цин ӕмӕ хъыг ӕмдзу фӕкӕнынц царды. Фӕриссын кодтой ахъаззаг, йӕ фынӕйыл кӕмӕн нӕ хъӕцыдысты, уыцы фырты ӕнӕнхъӕлӕджы мӕлӕтӕй мад ӕмӕ фыды зӕрдӕтӕ. Хъомыл ын кӕнынц йӕ сидзӕр кӕсдӕрты Ленӕ ӕмӕ Гоги, сӕ удтӕ хъарынц, цӕмӕй сӕ царды сӕ къахыл слӕууын кӕной ӕмӕ сӕ раст фӕндагыл бафтауой…
Цыппор азӕй фылдӕр цы цӕсгомджын куыст кӕны Ленӕ газеты коллективы ӕхсӕн, уым ӕнӕбахынцгӕ нӕу йӕ иузӕрдион куыст. Уымӕ гӕсгӕ йӕ хорз куысты тыххӕй Лалыты чызг хорзӕхджын ӕрцыд Хуссар Ирыстоны Президенты Кады грамотайӕ, юбилеон майдан ӕмӕ Арфӕйы фыстӕгӕй.
Фатимӕ ӕмӕ Ленӕ иу цӕдисы галтау фӕрсӕй-фӕрстӕм кусынц, иумӕ кӕнынц сӕ фӕллойадон архайд. Бавзӕрстой алыгъуызон уӕззау рӕстӕджытӕ – хӕстон уӕззау азтӕ, коронавирусы пандеми… Абон, газет йӕ ӕнусон юбилейы сӕрты куы акаст, уӕд йӕ коллектив бирӕ арфӕтӕ исы хицауадӕй, хуымӕтӕг адӕмӕй, ӕдзух ӕй чи кӕсы ӕмӕ нӕ куыстӕн аргъ чи кӕны, уыдонӕй. Уыцы арфӕтӕ, кӕй зӕгъын ӕй хъӕуы, хауынц Фатимӕ ӕмӕ Ленӕмӕ дӕр.
КЪӔБУЛТЫ Маринӕ
