Ивгъуыд азы кæрон РХИ-йы бастдзинад æмæ дзыллон коммуникациты комитеты сæргълæууæг Джиголаты Хасан фехъусын кодта, республикæйы кæй фæзынд ног провайдер, ома, интернеты лæггæдтæ æххæстгæнæг организаци: «2018 азы уалдзæджы интернет бастдзинад æппæт хъомысадæй фæзын-дзæнис, нырма уал бирæуæладзыгон хæдзæртты, августы мæймæ та – хисæрмагонд хæдзæртты. Уый фæстæ та республикæйы районты», зæгъы компани «Юг-Телеком»-ы директор Коцты Григори.
Ацы компани кæд бирæ æвзонгдæр у, ныртæккæ нæ республикæйы цы иунæг оператор архайы, уыцы «Мегафон»-æй, уæддæр ныридæгæн йæхи равдыста æууæнкджынæй интернет лæггæдты къабазы. Ацы компани цалынмæ Хуссар Ирыстонмæ не ‘рцыд хуынд, уæдмæ уал æнгас лæггæдтæ бакодта Хъырымы, Цæгат Ирыстон æмæ Уæрæсейы Федерацийы ноджы цалдæр регионы.
Компани ныридæгæн йæ фæлхасгæнджытæн сæ 35 проценты бæрц сифтонг кодта кабелон интернетæй.
«Юг-Телеком»-ы къухдариуæггæнæг ма куыд зæгъы, афтæмæй проекты тестон куыстытæ æххæст цæудзысты сæрмагонд инвесторты фæрцы. Уымæй дарддæр ма йын РХИ-йы Хицауады ‘рдыгæй дæр цæуы административон ресурсон æххуыс.
«Мæ хъуыды у ахæм: XXI æнусы раст нæу, цæмæй иу кæнæ иннæ адæм цух уой интернеты лæггæдтæй. «Юг-Телеком» уæй кæндзæн интернет лæггæдты дыууæ тарифон планы – 800 æмæ 900 сомы аргъ чи уа, ахæмтæ. Уыцыиу рæстæджы нæ компани кусдзæнис ног проектыл дæр. Иу хызæджы фæлгæтты абонентæн уыдзæн фадат IP-телефонæй æмæ интернет телеуынадæй пайда кæнын», – зæгъы «Юг-Телеком»-ы директор.
Уый куыд радзырдта, афтæмæй ацы хъæппæрисæн æрмæст экономикон бындур нæй. «Мах фæнды республикæйы цæрджыты царды фадæттæ фæхуыздæр кæнын, нæ компани, ныридæгæн сарæзта кусæгон бынæттæ. Чи дзы кусынц, уыдонæй 11 сты квалификациджын специалисттæ. Сæ куыстмызд хæццæ кæны 25 мин соммæ», – загъта уый.
Ныртæккæ «Юг-Телеком»-ы лæггæдтæй пайда кæнын райдыдтой горæты хуссар фарсы цæрджытæ. Бирæуæладзыгон хæдзæртты чи цæры, уыдон интернет хахх бауадзыны тыххæй фидынц 3 900 сомы. Сæрмагонд хæдзæрттæм бауадзæн куыстытæ фылдæр кæй сты, уымæ гæсгæ сæ хицæутты бафидын хъæуы 1 мин сомы фылдæр.
Гафезы уынджы цæрæг, кæцы æрæджы ссис «Юг-Телеком»-ы абонент, зæгъы: «Тынг райгонд дæн, ныртæккæ нæм цы интернет ис, уымæй. Бинонтæ иууылдæр сæрибарæй пайда кæнæм ацы бастдзинадæй. Кæд мæйы мидæг 900 сом бафидæм, уæддæр интернет кусы æнæкъуылымпытæй. Нæ бон у кæсæм кинонывтæм дæр, сабитæ та – мультфильмтæм. Хатт исты къуылымпыдзинад куы сæвзæры, уæд та бадзурæм оператормæ æмæ уадид аиуварс кæнынц згъуыдтæ».
Коцты Григорийы ныхæстæм гæсгæ, тагъд горæты цæгатварсы цæрджытæн дæр фадат фæзындзæн компани «Юг-Телеком»-ы лæггæдтæй пайда кæнынæн, уый фæстæ та – æгас республикæйы цæрджытæ дæр.
Бастдзинады ног операторы фæзындæн ма йæ иу хорздзинад уый у æмæ абоненттæн ацы лæггæдты къабазы кæй уыдзæн равзарыны фадат. Ныры онг адæм пайда кодтой уыцыиу операторы лæггæдтæй æмæ дзы кæд бирæтæ райгонд нæ уыдысты, уæддæр сын хуыздæр уавæр нæ уыд, æмæ фæрæзтой алы къуылымпыдзинадæн дæр. Ныр нæ республикæйы разамынады æххуыс æмæ хайадисты фæрцы адæмы ацы зындзинад дæр иуварс æрцæудзæн.
Comments are closed, but trackbacks and pingbacks are open.