Тагъд Дзауы районы скусдзæн кабелон интернет «Юг-телеком» – фехъусын кодта ацы компанийы генералон директор Коцты Григори.
Ацы бастдзинады ног оператор нæ республикæйы фæзынд ивгъуыд аз. Уæдмæ нæ республикæйы цæрджытæ пайда кодтой æрмæстдæр «Мегафон»-ы бастдзинадæй. Раздæр дæр æмæ ныр дæр «Мегафон»-ы бастдзинадæй бирæтæ райгонд не сты. Фæлæ сын хуыздæр уавæр кæй нæй, уымæ гæсгæ быхсынц. Райгонд та не сты, фыццаджыдæр, йæ къуылымпыдзинадæй, уый фæстæ та трафиктæ тагъд кæй фæуд кæнынц, уымæй. Рæстæгæй-рæстæгмæ фæивынц сæ тарифтæ, фæлæ уый абоненттыл æвзæрæрдæм цы бандавы, æндæр дзы ницы хорздзинад банкъарынц. Ныртæккæ горæт Цхинвал, йæ микрорайонтæ, æмæ ма горæтмæ хæстæг Тъбеты хъæу дæр ифтонг сты кабелон бастдзинад «Юг-Телеком»-ы хызæгтæй.
Æнæлимитон кабелон интернеты фæрцы горæты цæрджытæн сæ царды фадæттæ бæрæг фæхуыздæр сты. «Юг-Телеком»-ы кабелон интернет куы фæзынд, уæдæй нырмæ бастдзинады лæггæдтæ куыд уыдысты, афтæ баззадысты æнæаивгæйæ. Бирæуæладзыгон хæдзæртты цæрджытæн интернет хахх бауадзыны лæггæдтæ лæууыдысты 3 900 сомы. Сæрмагонд хæдзæрттæм бауадзыны куыстытæ фылдæр кæй лæууыдысты, уымæ гæсгæ сæ хицæутты бафидын хъуыд 1 мин сом фылдæр. «Юг-Телеком» кусы ахæм тарифтæм гæсгæ, куыд 800, 900, 1200, 1500 сомы æргътæ.
Коцты Григори куыд зæгъы, афтæ-мæй ныр дзауæгтæй кæй фæнда, уый сæрибарæй рахиздзæн «Юг-Телеком»-ы лæггæдтæм: «Дзауы районæй нæм ивгъуыд азæй нырмæ цыд куырдиæттæ. Нæ сæйраг офисмæ æрбацæугæйæ-иу Дзау æмæ йæ районы цæрджытæ домдтой, цæмæй фæтагъд кæнæм куыстытæ æмæ сæ тагъддæр сифтонг кæнæм æнæлимитон интернетæй. Мах сын æмбарын кодтам, проектон-тестон куыстытæ компани йæхи сæрмагонд инвестицитæй кæй æххæст кæны, уымæ гæсгæ чысыл къуылымпытæ вæййы махмæ дæр, куыд алы куыстуаты, афтæ, цæмæй æххæстбæрцæй скуыстаид кабелон интернет Дзауы районы, уый тыххæй хъуыд бынæттон кусджытæ бацæттæ æмæ сахуыр кæнын», – загъта «Юг-Телеком»-ы генералон директор.
Коцты лæппу нын куыд загъта, афтæмæй «Юг-Телеком»-ы компани ныр та фæнд кæны Цхинвалы район Дменисы хъæуы дæр ахæм куыстытæ бакæнын. Уым куыстытæ фæуыдзысты ног азмæ, уый фæстæ та кабелон интернет арæзт æрцæудзæнис Знауыр, Ленингор æмæ Къуайсайы дæр. Зæгъы ма, зæгъгæ, уыцы иу рæстæ-джы компани кусы ног проектыл дæр. Иу хызæджы фæлгæтты абонентæн фадат уыдзæн IP-телефонæй æмæ интернет-телеуынынадæй пайда кæнынæн дæр.
«2020 азы республикæйы иу хъæу дæр нал баззайдзæнис æнæ интернет-бастдзинадæй. Дард районтæм дæр бастдзинады аргъ уыдзæнис, горæты куыд у, афтæ. Уымæй уæлдай абоненттæн лæггæдты аргъ бафидынæн горæты бирæ рæтты сæрмагонд терминалтæ куыд æрцыд æвæрд, районты дæр уыдзæн афтæ», – загъта Коцты Григори.
УАЗÆГТЫ Марфа
Comments are closed, but trackbacks and pingbacks are open.